Ogwu òmimin ichit me mkpulu emen inyọn̄
18
Me mgbọ ya ebi udun̄ kè Jisọs enunu me lek kan̄,
mè inido ọmọ ibe,
“Ìre ekene omin ichit me mkpulu emen inyọn̄?”
2 Jisọs ogwegwen sọntiik gwun̄ ge,
ibe inikeke me etete kiban̄,
3 mè initumu inyi ema ibe,
“Me atikọ,
ǹkitumu inyi enyi ibe,
îtata enyi egwugwu ikom,
mè ikana ikup kubọk asa nsabọn,
enyi kpebenin̄ mkpulu emen inyọn̄.
4 Eya orọ,
ene geelek ògegele lek kan̄ isiki kubọk sọntiik gwun̄ yi,
ene ya ore ogwu òmimin ichit me mkpulu emen inyọn̄.
5 Ikeya si,
ogwu geelek òbọbọkọ sọntiik gwun̄ òkup ikeyi itap me erieen̄ n̄a,
îre emi ke ene ya obọkọ itap.
6 “Ire,
kpan̄asi ene orọbe inyi ge me lek nsabọn chi ebi ìchechieek me lek n̄a irọ ijo inu,
mônwọn me lek ene ya ire itobo ewuuk ekisa ikọk akpa me ebek kan̄,
mè iben ọmọ isi itọp ito me ejit okwaan̄,
inyi igen.
7 Môfieek inyi linyọn̄ keyi mije owuwa inu òkirọ inyi ebi ene ekerọ ijo inu.
Me atikọ,
ojelek inu kechi kpolọlọ inunu.
Ire,
môfieek enenen inyi ene geelek òsasa ojelek inu chi inu.
8 Ire ubọk kwun̄,
mè ìre ukot kwun̄ ikirọ inyi owu òrọ ijo inu,
fieek tọp fiin̄,
mije,
mônwọn owu isasa ukot ge mè ìre ubọk ge inin̄ emen ugwem,
igak owu ikakaan̄ ukot iba mè ubọk iba,
ire,
ebeben owu itọp itap me emen ukan̄ òkpọkpọ ikilomo ire mgbọ geelek.
9 Ikeya si,
ire chieen̄ kwun̄ ikirọ inyi owu òkorọ ijo inu,
rọkọ chieen̄ ya tọp fiin̄,
mije,
mônwọn ibe owu òsa agan̄ chieen̄ ge ònin̄ emen ugwem,
igak owu ikakaan̄ chieen̄ iba me lek ibot,
ire,
ebeben owu itọp itap me emen ukan̄ ama yọk.
Urọk arọọn̄ òchechep
10 “Ikakpọ ene geege me etete asa nsabọn chi chieen̄ ìsiki,
mije,
ǹkitumu inyi enyi ibe,
me emen inyọn̄,
ebi osat Awaji ìkikpọ chieen̄ me lek nsabọn chi ekikup me isi kè Nte n̄a ogwu òkup me emen inyọn̄ mgbọ geelek.
[
11 “Emi Gwun̄ Ebilene ǹnu ineninyan̄a ebi ìchechep.]
12 Ire ene ikaan̄ efit arọọn̄,
ge oneninan̄a me lek ije ilọ oniin̄,
ìre enyi kpekeek ibe ke ene ya môtele akọp arọọn̄ onaan̄ge mè onaan̄ge kechilọ me inyọn̄ ogoon̄,
mè ikijijen̄e ikana iweek ge ya òjeje ilọ ọmọ chieen̄?
13 Me atikọ,
ǹkitumu inyi enyi ibe,
ire ene ya iweek arọọn̄ ge ya imun̄,
môbele ejit me lek arọọn̄ ge ya igak me lek akọp arọọn̄ onaan̄ge mè onaan̄ge kechilọ echi ikajege ìlọ ogwukaan̄ chieen̄.
14 Ikeya si,
Nte kinyi ogwu òkup me emen inyọn̄ ìkaweek ibe ge me lek asa nsabọn chi inan̄a ichep.
Ogwu òrọrọ ogwu ngwan̄ ilọ
15 “Ire ngwan̄ kwun̄ irọ owu ilọ,
je si lek kan̄,
owu melek kan̄ gaalek,
mè jeen̄ ọmọ inu eyi îrọbe owu ilọ.
Ire igban̄ utọn̄,
mè ichieek ibe ke ọmọ îrọ owu ilọ,
owu okpọk ikaan̄ ọmọ me lek ngwan̄.
16 Ire,
ire ìkachieek,
gwen ene ge,
mè ìre ene iba,
sa gbaalek kwun̄ si lek kan̄,
inyi utọn̄ ebi ata-ikọ iba,
mè ìre ita,
inọ,
mè irọ ikọ geelek etumube inye.a
17 Ire ijit igbagban̄ ida ebi ata-ikọ cha,
si kpa inu ya nyi ebi ntitiin̄ Awaji.
Ire ijit si igbagban̄ ida ebi ntitiin̄ Awaji,
mọnọ ọmọ kubọk ogwu ikariọọn̄ge Awaji,
mè ìyaka ire ogwu otitip ido.
18 “Me atikọ,
ǹkitumu inyi enyi ibe,
inu geelek enyi ebọpbe me linyọn̄,
mêbọp si me emen inyọn̄.
Inu geelek enyi etọn̄ọbe me linyọn̄,
mêtọn̄ọ si me emen inyọn̄.
19 “Ofifi kan̄,
ǹkitumu si inyi enyi ibe,
ire ene iba me etete kinyi ikup me linyọn̄ keyi igbaan̄ ichieek me lek inu geelek enyi ekiriaak uriaak ofolek,
Nte n̄a ogwu òkup me emen inyọn̄ môrọ ikeya si inyi enyi.
20 Mije,
ere ene iba mè ìre ene ita egbaan̄be ititiin̄ me erieen̄ n̄a,
emi òwa me ere ya melek kiban̄.”
Urọk ogwu ikwaan̄ ikakaan̄ge ejit nsan
21 Pita oneninu me lek kè Jisọs,
mè inido ọmọ ibe,
“Okaan̄-ene,
ìre ngwan̄ n̄a ìborọ emi ilọ mgbọ inen,
mè emi ǹtele ǹnyi?
Ìre môso mgbọ jaaba?”
22 Jisọs ofọfọọk ọmọ ibe,
“Ìkare mgbọ jaaba gaalek,
îre akọp mgbọ jaaba irek jaaba.
23 “Eya orọ,
mkpulu eyi Awaji ìkup kubọk ogwu ubọọn̄ ge òweweek irọrọ ifuk melek ebi ikwaan̄ kan̄.
24 Mgbọ îbenebe ifuk ya,
esasa ene ge ogwu òkakaan̄ ọmọ urieek owuwa obop akpa ikpoko ijet ọmọ.
25 Mije ogwu enerieen̄ ya ikakọtge ìkpe urieek ya,
ogwu nte uwu kiban̄ onyinyi ida ibe ekpulu ogwu enerieen̄ ya,
mè ogwu nwa,
mè nsabọn kan̄,
mè otutuuk inu îkaan̄be esi enyam,
mè esa ikpoko ya enekpe ọmọ urieek kan̄ ya.
26 “Ogwu ikwaan̄ ya ogwogwook ekpe me ijọn̄,
mè iriaak ogwu ute-uwu ya ibe,
‘Soso,
kaan̄ ukarajit sọnja mgbọ me lek n̄a,
ke mâkpe owu otutuuk urieek nkaan̄be owu.’
27 Ogwu ute-uwu ya okakaan̄ ejit nsan me lek kan̄,
mè ifuk otutuuk urieek cha ichep inyi,
mè itele ibe ifo.
28 “Mgbọ yaage ogwu ikwaan̄ ya onan̄abe isibi,
ichichichini ofifi ogwu ikwaan̄ ogbo kan̄ ge ogwu òkakaan̄ ọmọ urieek sọntiik ikpoko mêkọtbe isa ikpe ogwu ikwaan̄ ge onyan̄ ita gaalek,
mè ikana ene ya itet me ebek,
mè ikinwan,
mè itumu inyi ibe,
‘Kpe emi otutuuk urieek okaan̄be emi.’
29 “Ene ya ogwogwook ekpe me ijọn̄,
mè ikiriaak ibe,
‘Soso,
kaan̄ ukarajit me lek n̄a sọnja mgbọ,
ke mâkpe owu otutuuk urieek nkaan̄be owu.’
30 “Ire,
ogwu enerieen̄ yi ìkachieek.
Kpan̄asi ikeya,
itetet ogwu ikwaan̄ ogbo kan̄ ya ijet ibe etap me mkpọn,
inyi ikup me ere ya mege ire mgbọ geelek môkọtbe ikpe ọmọ otutuuk urieek kan̄ isan̄a.
31 Mgbọ ebi ikwaan̄ ogbo kiban̄ emun̄be inu ya òrọrọ,
ejit îfieek ema enenen.
Ema ebeben inu ya isi ikpa inyi nte uwu kiban̄.
32 “Nte uwu kiban̄ oraria ikwaan̄ igwen ogwu enerieen̄ ya,
mè itumu inyi ibe,
‘Iyak,
owu òjeje ifieek ikeyi?
Emi mfuk ikpele urieek owu okaan̄be emi ichep,
mije owu oriaakbe emi.
33 Ìre keke orọ owu òkakọt ìkaan̄ ejit nsan me lek ogwu ikwaan̄ ogbo kwun̄ ike emi nkaan̄be me lek kwun̄?’
34 Ogwu ute-uwu ya osasa me unaan̄-ejit ikana ọmọ inyi ibe etap me mkpọn,
mè ikup me ere ya mege ire mgbọ môkọtbe ikpe ọmọ otutuuk urieek îkaan̄be ọmọ isan̄a kpai.”
35 Jisọs onenitumu inyi ema ibe,
“Ikeyi si ke Nte n̄a ogwu òkup me emen inyọn̄ oborọ enyi,
îtata enyi esasa me otutuuk ejit kinyi itele ijo geelek ebi ngwan̄ kinyi erọbe enyi.”