Iyayaak olom mè nwa
19
Mgbọ Jisọs otumube ikọ cha isan̄a,
inenije inan̄a me Galili isi agan̄ ijọn̄ Judia eyi òkup me usaba okwaan̄ Jodan.
2 Ogbogbo ebi ene efafan̄a igọọk ọmọ me agan̄ ya,
igwagwa owuwa ebi lek ikanyege me ere ya.
3 Usini ebi Farisi enunu ibenileke ọmọ ikọ me otu,
mè inido ọmọ ibe,
“Ìre îtat me Ikan ibe ene iyaak ogwu nwa mije inu geelek?”
4 Jisọs ofọfọọk ema ibe,
“Ìre enyi kpefuk inu egebe me Ikpa Mbuban ibe,
me ibebene,
ke Awaji ìrom ema enerieen̄ mè enenwaan̄,a
5 mè itumu si ibe,
mije keyi,
ogwu enerieen̄ môtele ogwu ute mè ogwu uga,
mè isa lek kan̄ ichim iriaak me lek ogwu nwa,
ema ene iba mênenikana ire akpalek geb?
6 Sa me ikeya,
ema kpeyaka ire ene iba ofifi,
ema eyaka inire ene ge kpọi.
Eya orọ,
inu Awaji ogbaan̄be ibuk,
ene geege ikayiyala.”
7 Ema enenido ọmọ ibe,
“Ìre keke orọ Mosis onyibe Ikan ibe ire ogwu iweek iyayaak ogwu nwa,
ige ikpa iyaak-olom inyi,
mè ilap isibi?”
8 Jisọs ofọfọọk ema ibe,
“Îre mije unye-ejit kinyi ke Mosis otele ibe enyi ekejit nwa kinyi.
Ire,
ìkakup ikeya bene me ibebene.
9 Emi ǹkitumu inyi enyi ibe,
ene geelek òyayaak ogwu nwa,
mè isi ido ofifi enenwaan̄,
ene ya îrọn̄ ikan ugan-nwa ikeme ogwu nwa,
îtata mè ogwu nwa ya ìnanan̄a me lek kan̄ isi isi ene.”
10 Ebi udun̄ kan̄ etutumu inyi ọmọ ibe,
“Ire ikeya ke îkup me etete olom mè nwa,
înwọn ibe ekado nwa,
mè ekabat olom.”
11 Jisọs ofọfọọk ema ibe,
“Ìkare otutuuk ene ebekọt ibọkọ ijejeen̄ keyi itap,
îre ebi Awaji osun̄be inyi gaalek ebekọt ibọkọ itap.
12 Mije,
inu òkirọ inyi ene ikakaan̄ nwa,
mè ìyaka ire ikakaan̄ olom,
miwa.
Usini ene ke eman ikeya,
usini ene ke ebilene esan̄a òsok,
sà usini ene ebak me lek mkpulu emen inyọn̄ ijit ikakaan̄ nwa,
mè ìre ikakaan̄ olom.
Ene geelek òbokọt ibọkọ ijejeen̄ keyi itap,
ibọkọ itap.”
Jisọs îgbana nsabọn
13 Ebi ene enenisa asa nsabọn kiban̄ ijet Jisọs ibe itoon̄ ubọk me lek,
mè iriaak uriaak inyi.
Ire,
ebi udun̄ kan̄ ekekigana ikọ inyi ebi ìkisa nsabọn cha inu.
14 Jisọs otutumu inyi ema ibe,
“Ìtele inyi asa nsabọn cha enu me lek n̄a,
ikakput ema.
Mije,
îre ebi ìkup kubọk nsabọn ke mkpulu eyi Awaji okup inyi.”
15 Itotoon̄ nsabọn cha ubọk me lek isan̄a,
mè ije inan̄a me ere ya.
Gwun̄ enerieen̄ òbọbọọn̄ ubọọn̄
16 Mgbọ Jisọs onan̄abe me ere ya ikije inyi isi,
ogwu enerieen̄ ge onenije inu me lek kan̄,
mè ibe ọmọ,
“Ogwu Ijejeen̄,
ìre kpasi ata inu ke mbarọ,
mè ikaan̄ ugwem ikakaan̄ge itata?”
17 Jisọs ododo ọmọ ibe,
“Keke orọ okido emi idodo ofolek ata inu?
Îre Awaji gaalek ore ogwu ònwọnwọn.
Ire oweek ininin̄ emen ugwem ya,
sun̄ Ikan Awaji onyibe.”
18 Ogwu enerieen̄ ya ododo ọmọ ibe mè ìre Ikan echi owa?
Jisọs onenikigo Ikan cha inyi ọmọ ibe,
“Kakpan̄ ene,
kagan nwa ene,
kachiin̄ inọ,
kakeke ata-ikọ eyi ataak,
19 libi nte kwun̄ mè nga kwun̄,c
mè ma ogwu melek kwun̄ kubọk omabe akpalek kwun̄.d”
20 Ogwu enerieen̄ ya otutumu inyi Jisọs ibe ke ọmọ îkisun̄ otutuuk ikan kecha iso,
mè ìre îkaan̄ ofifi òsisik ọmọ ikasun̄ge?
21 Jisọs onenifọọk ọmọ ibe,
“Ire oweek inwọnwọn isan̄a,
fo mè si kpulu otutuuk inu okaan̄be nyam,
mè sa ikpoko cha che nyi ebi ugbọọn̄,
ke owu môkaan̄ inu ubọọn̄ isun̄ iban lek kwun̄ me emen inyọn̄.
Osirọ isan̄a gwu kom na,
na gọọk emi.”
22 Ire,
mgbọ gwun̄ enerieen̄ ya onọbe ikọ ya,
ejit ofefieek ọmọ enenen,
inanan̄a ije ifo,
mije,
îbọọn̄ ubọọn̄ enenen.
23 Jisọs onenitumu inyi ebi udun̄ kan̄ ibe,
“Me atikọ,
ǹkitumu inyi enyi ibe ke îyọt enenen ogwu òbọbọọn̄ ubọọn̄ ininin̄ mkpulu emen inyọn̄.
24 Ǹkitumu si inyi enyi ibe ke aligọ ijeje itibi chieen̄ alaga îfet igak ogwu òbọbọọn̄ ubọọn̄ ininin̄ mkpulu eyi Awaji.”
25 Mgbọ ebi udun̄ kan̄ enọbe ikọ ya,
ukpook otetet ema enenen,
ema enenido ibe,
“Ire ikeya,
ìre ekene ke mênyan̄a?”
26 Jisọs okpọkpọ ema siì,
mè inibe ema,
“Ire me lek ebilene,
inu keyi ìkafet.
Ire,
me lek Awaji,
inu geelek îkup mfufet.”
27 Pita onenido ọmọ ibe,
“Mgbọ keyi,
eji mîtele otutuuk inu geelek,
mè igọọk owu,
ìre keke ke eji ebekaan̄ me useen̄?”
28 Jisọs ofọfọọk ema ibe,
“Ǹkitumu atikọ inyi enyi ibe,
mgbọ inu geelek môkanabe ayaya,
mgbọ Gwun̄ Ebilene môkweekbe irek me inyọn̄ ogboon̄ ubọọn̄ kan̄ me ujamgbugbo eyi emen inyọn̄,
enyi akọp mè ene iba ebi ìkigọọk emi me udun̄,
mêkweek si irek me inyọn̄ akọp mè ogboon̄ ubọọn̄ iba ikisibi oyerebet me ibot akọp mè otoko iba ebi Ijeren.
29 Mgbọ ya,
ene geelek ogwu òtetele ogwu ute,
mè ìre ogwu uga,
mè ìre ebi ngwan̄ kan̄ ebirieen̄,
mè ìre ebi ngwan̄ kan̄ ebibaan̄,
mè ìre uwu,
mè ìre bọn,
mè ìre ijọn̄ uko,
mije n̄a,
ene ya môbọkọ inu cha geelek iwa efit mgbọ igak echi îtelebe,
mè ikaan̄ si ugwem ikakaan̄ge itata igbaalek.
30 Ire,
owuwa ebi ìrere ebi adasi me mgbọ keyi mêkana ire ebi òta,
ebi ìrere ebi òta me mgbọ keyi mêkana ire ebi adasi.”