Urọk ebi ikwaan̄ uko gerep
20
Jisọs onenitumu ibe,
“Mkpulu eyi Awaji ìkup kubọk ogwu enerieen̄ ge òkiwop uko,
mè inan̄a isibi me agan̄ egwe isi igwen ebi ikwaan̄ ibe enesi ikwaan̄ me uko gerep kan̄.
2 Mgbọ îgwenbe ife cha,
igọgọọk ema itumu ifieek ibe ema esi esi ikwaan̄ me uko gerep kan̄,
ke ọmọ môkpe ebibi geelek dinari ge ge,
òrere ikpoko ekikpe ogwu ikwaan̄ ge me egwe usen ge.
3 “Mgbọ òfuk-mgbọ osulube onaan̄ge eyi ewelegwe,
ogwu enerieen̄ ya ojeje isi oyet ewe,
mè isi imun̄ ebi ikwaan̄ ekekebe ikana ere ya ukpọk ubọk.
4 Igwegwen ema ibe enesi egọọk esi ikwaan̄ me uko gerep kan̄ si,
ke ọmọ môkpe ebibi mkpukpe ògbegbe.
5 Ife cha echechieek,
mè isi igọọk isi ikwaan̄ me uko ya.
Ogwukaan̄ uko ya okpọkpọk inan̄a isibi si mgbọ òfuk-mgbọ osulube akọp mè iba eyi ejit ikarek,
mè isibi si mgbọ îsulube ita eyi ikarek,
mè igween̄ si ebi ikwaan̄ itap me uko kan̄,
mè ichieek si ikpekpe ema mkpukpe ògbegbe.
6 Mgbọ òfuk-mgbọ osulube go eyi ikakwun̄,
ogwukaan̄ uko ya okpọkpọk inan̄a isibi,
mè isi imun̄ si ofifi ebi ikwaan̄ ekekebe ikana ere ya,
mè inido ema ibe,
‘Ìre keke orọ enyi ekikeke ikana ukpọk ubọk karake ewelegwe?’
7 “Ife cha efọfọọk ọmọ ibe,
‘Kpunu ene geege ògwegwen eji me ikwaan̄ ma!’
“Ibebe ema si enegọọk esi esi ikwaan̄ me uko gerep kan̄.
8 “Me agan̄ ikakwun̄,
ogwukaan̄ uko gerep ya otutumu inyi ogwu ibot ikwaan̄ kan̄ ibe,
‘Gwen ebi ikwaan̄ cha titiin̄,
mè kpe ema mkpukpe kiban̄,
bene me lek ebi ìnunu mgburudun̄ si re lek ebi egwenbe me adasi.’
9 “Ebi ikwaan̄ egwenbe me mgbọ òfuk-mgbọ osulube go eyi ikakwun̄ enunu,
ogwu ibot ikwaan̄ ya okpekpe ema dinari ge ge me ene.
10 Eya orọ,
mgbọ ebi egwenbe me adasi cha enube,
ema ekekikeek ibe ke mkpukpe kiban̄ mômin igak eyi ebibilọ ebọkọbe.
Ire,
ogwu ibot ikwaan̄ ya okpekpe si ema ene ge dinari ge,
ubọk îkpebe ebibilọ.
11 Mgbọ ema ebọkọbe ikpoko cha ire ubọk,
ema ebebene ikikaan̄ uduk me lek ogwukaan̄ uko ya,
12 mè itumu inyi ọmọ ibe,
‘Ife chi ebi egwenbe mgburudun̄ esi ikwaan̄ mbubak mgbọ ge gaalek.
Ìre keke orọ owu ogbaan̄be ema melek kiji ikpe ikpoko ìkike,
me ere eji esibe ikwaan̄ bene me karake ewelegwe,
ura otataka eji otutuuk mgbọ cha,
eji emumun̄ otutuuk ufialek ikwaan̄ ya ibene me ewelegwe ire agan̄ ikakwun̄?’
13 “Ire,
ogwukaan̄ uko ya ofọfọọk ene ge me lek kiban̄ ibe,
‘Une,
ǹkafeen̄ owu kubọk ge.
Mgbọ ngwenbe owu me ikwaan̄,
ìre ìkare dinari ge ke owu ochieek ibe emi m̀kpe owu me ikwaan̄ usen ge?
14 Bọkọ ikpoko ikwaan̄ kwun̄,
mè je fo,
ke m̀bakpe ogwu ngwenbe me ikwaan̄ mgburudun̄ mkpukpe ìkike melek kwun̄.
15 Ìre ǹkakaan̄ unye isasa ikpoko n̄a irọ inu geelek òneneme emi?
Sà ìre owu òkikaan̄ ejit mba me lek n̄a mije nchilibe ubọk irọ inu?’ ”
16 Mgbọ Jisọs otobe urọk ya isan̄a,
inenitumu inyi ebi udun̄ kan̄ ibe,
“Ikeyi ke ìbokup si,
ebi mgburudun̄ mêkana ire ebi adasi,
ebi adasi mêkana ire ebi mgburudun̄.”
Jisọs îtumu ikọ ibak mkpa kan̄ òso mgbọ ita
17 Me oniin̄,
mgbọ ema ekije isi Jeruselem,
Jisọs ogwegwen ebi udun̄ kan̄ ida ibọkọ,
mè itumu inyi ema ibe,
18 “Ìgban̄ utọn̄,
eji ebesi Jeruselem.
Me ama ya,
mêleke emi Gwun̄ Ebilene ikana itap me ubọk ebi ibot ngwugwa mè ebi ìjeen̄ Ikan.
Ife chi mêtitip emi oyerebet mkpa,
19 mè iyaka emi itap me ubọk ebi ekarege ebi Ju,
ebi mêsabe emi irọ inu ochak,
mè isulu emi me njijan̄,
mè igon emi ikpan̄ me inyọn̄ uti nkwurieen̄.
Ire,
òso egwe ita,
mâjomo me mkpa.”
Mbeek nga kè Jemis mè Jọn obeekbe
20 Nwa kè Jebidi onenisa bọn kan̄ iba,
Jemis mè Jọn,
inu me lek kè Jisọs,
mè initọbọ ekpe me ijọn̄,
mè ikibeek mbeek me ubọk kè Jisọs.
21 Jisọs ododo ọmọ ibe,
“Ìre keke ke oweek ibe emi ǹrọ ǹnyi owu?”
Ogwu enenwaan̄ ya ofọfọọk ọmọ ibe,
“Soso,
chieek ibe bọn ebirieen̄ iba n̄a chi egọọk owu ekweek irek me mkpulu kwun̄,
ene ge me agan̄ ulom kwun̄,
ene ge me agan̄ ujit kwun̄.”
22 Jisọs onenibe ema,
“Enyi kperiọọn̄ inu enyi ekibeek.
Ìre enyi mêkọt inwọ inu ònan̄a me emen ekpen̄ ufieejit eyi emi mbanwọ?”
Ema efọfọọk ibe ke ema mêkọt inwọ.
23 Jisọs onenitumu inyi ema ibe,
“Me atikọ,
enyi mênwọ inu ònan̄a me emen ekpen̄ ufieejit eyi mbanwọ.
Ire,
emi ǹkakaan̄ unye igogobo ebi ìbekweek irek me agan̄ ubọk ulom n̄a,
mè agan̄ ubọk ujit n̄a,
mije,
irek cha ìkup inyi ebi Nte n̄a onen̄ebe isun̄ iban.”
24 Mgbọ akọp ebi udun̄ kan̄ kechilọ enọbe inu ya òrọrọ,
ema enanaan̄ ejit enenen inyi ngwan̄ iba cha.
25 Jisọs ogwegwen ema ititiin̄,
mè ibe ema,
“Enyi mîriọọn̄ ibe ke ebi ìkikpulu ido ebi ekarege ebi Ju ekisa me unye ubọk ikikpulu ebi ìkup me irak kiban̄.
Ebi ilile me ido cha si ekitọ eyi òneme ema inyi ebi ema ekikpulu.
26 Ire,
ìkabore ikeya me etete kinyi.
Ire ikaan̄ ogwu iweek irere ogwu ibot me etete kinyi,
ene ya môkana ire ogwu òkisi ikwaan̄ inyi enyi.
27 Ogwu geelek òweweek irere adasi me etete kinyi,
ene ya môkana ogwu usun̄ inyi enyi,
28 kubọk Gwun̄ Ebilene onube,
ìkanu ibe ebi ene enesi ikwaan̄ enyi ọmọ.
Ire,
ìnu inenisi ikwaan̄ inyi ebi ene,
mè isa ugwem kan̄ igwa ngwugwa me ibot owuwa ene.”
Jisọs îgwa ebi ǹnàan̄ iba
29 Mgbọ Jisọs mè ebi udun̄ kan̄ ekinan̄a me Jeriko ije isibi,
ogbogbo ebi ene egbugbuku ikigọọk ọmọ me udun̄.
30 Îkaan̄ ebi ǹnàan̄ iba ìkukup me agba oniin̄ ya.
Mgbọ ife chi enọbe ibe ke Jisọs mônije iraka me oniin̄ ya,
ema ebebene ikitaan̄ ukpo igwen ọmọ ibe,
“Okaan̄-ene,
Gwun̄ kè Debit,
soso rọ eji nsan.”
31 Ogbogbo ebi ene cha ekekirama ema ibe,
“Ìchit otu kinyi me ere ya.”
Ire,
ema erọriọọn̄ ikibọn̄ ukpo ibene ida ikibe ọmọ,
“Okaan̄-ene,
Gwun̄ kè Debit,
soso rọ eji nsan ma.”
32 Jisọs oyayaka ikeke,
mè igwen ema ibe enu,
mè inido ema ibe,
“Ìre keke ke enyi ekiweek ibe emi ǹrọ ǹnyi enyi?”
33 Ema ebebe ọmọ,
“Okaan̄-ene,
eji ekiweek ibe owu òrọ inyi eji emọọn̄ inu.”
34 Jisọs ototo ema nsan,
mè itoon̄ ubọk me chieen̄ kiban̄.
Mgbọ yaage,
ema emọmọọn̄ inu,
mè ibene ikije igọọk Jisọs.