Jisọs înin̄ Jeruselem kubọk ogwu ubọọn̄
21
Mgbọ ema enan̄abe me Jeriko ikije isi Jeruselem,
ema enenije ire gwun̄ ama ge ekigwen Betifegi,
òkup me inyọn̄ ogoon̄ Olifu,
Jisọs oraria ene iba me lek ebi udun̄ kan̄ ibe,
2 “Ìje ìsi gwun̄ ama yilọ òkup me isi kinyi,
ke enyi mêmun̄ inyinya akpan ge etobobe me lek uti,
mè ogwu gwun̄ me agba lek.
Ìtọn̄ọ ema ìsa ìjet emi.
3 Ire ikaan̄ ogwu isan̄a amọn me lek anam cha,
ìtumu ìnyi ibe ke Okaan̄-ene oweek,
ke ene ya môtele inyi enyi esa eje mgbọ yaage.”
4 Inu yi îrọ iso ikọ Awaji otumube inan̄a me otu ogwu nriran ge ibe,
5 “Tumu nyi ujuja ama Sayọn ibe,
‘Ìkpọ,
ogwu ubọọn̄ kinyi òkinu me lek kinyi.
Îsiki lek kan̄,
mè ikilibi me inyọn̄ inyinya akpan inu,
me inyọn̄ gwun̄ inyinya akpan ke îkilibi inu!’ ”a
6 Ebi udun̄ kan̄ cha esisi,
mè irọ ubọk îtemebe ema,
7 mè isa inyinya akpan ya melek ogwu gwun̄ inu,
mè isan̄a ofọnti kiban̄ iwele me inyọn̄ anam cha,
Jisọs onenene inyọn̄ kiban̄ ikweek.
8 Owuwa ene esasan̄a si ofọnti kiban̄ iwele me ijọn̄ me oniin̄,
usini ene ekekep nlak mè inwan̄ me lek ito me oniin̄.
9 Urum ene ebi ìkije me isi mè ebi ìkije me udun̄ ekekibọn̄ okoko ibe,
“Osana!
Itọn̄ ikup inyi Gwun̄ kè Debit!
Ugbana ikup inyi ogwu ònunu me erieen̄ Okumugwem!b
Itọn̄ ikup inyi Awaji me emen inyọn̄,
ere òbebene ichit!”
10 Jisọs ininin̄ Jeruselem,
ama ofafan̄a kep.
Ebi ene ebebene ikidido ibe,
“Ìre ekene ore ogwa òkinu?”
11 Ebi urum ene cha ekekifọọk ibe ke îre Jisọs,
ogwu nriran ònan̄a me Najeret me agan̄ Galili.
Jisọs înin̄ Uwu Mbuban
12 Jisọs ojeje inin̄ emen Uwu Mbuban,
mè ilap otutuuk ebi ìkinyam ewe mè ebi ìkilep inu me emen uwu ya isibi,
mè ida ikasi ebi ìkinwene ikpoko mè ogboon̄ ebi ìkinyam ekerekwukwu me emen uwu ya ikana ichit,
13 mè ikitumu inyi ema ibe,
“Ege me Ikpa Mbuban ibe ke Awaji ibe,
‘Mêkigwen uwu n̄a uwu uriaak.’c
Ire,
enyi eyaka ikisa uwu ya irọ ere ebi inọ ekinu inilet lek.d”
14 Ebi ǹnàan̄ mè ebi akọọk enunu si me lek kan̄ me Uwu Mbuban ya,
igwagwa ema.
15 Ire,
mgbọ ebi ibot ngwugwa mè ebi ìjeen̄ Ikan emun̄be inu ukechieen̄ cha Jisọs orọbe,
mè inọ si ike nsabọn ekibọn̄ okoko me Uwu Mbuban ya isa ikitọn̄ ọmọ ibe,
“Itọn̄ ikup inyi Gwun̄ kè Debit!”
ema enanaan̄ ejit enenen,
16 mè inu inido ọmọ ibe,
“Ìre onọ inu nsabọn chi ekitumu?”
Jisọs ofọfọọk ema ibe,
“Iin̄,
nnọ.
Ìre enyi kperarak ifuk inu egebe ibak Awaji me Ikpa Mbuban,
ibe,
“ ‘Òjot òjot itọn̄ înan̄a me otu nsabọn,
mè otu asa nsabọn ebi ìkinwọ ebe igọọk owu’e?”
17 Jisọs onanan̄a isibi itele ema,
mè ije isi Betani,
ere îlaakbe iwele egwe.
Jisọs îfieek otu inyi uti figi
18 Me ewelegwe,
mgbọ Jisọs mè ebi udun̄ kan̄ enan̄abe me Betani igwu ikom ikije isi Jeruselem,
uraafiọọn̄ onenitaka ọmọ.
19 Ibebene chieen̄ imun̄ uti figi ge inwan̄ ojotbe lek me agba oniin̄ ya,
mè ije isi lek.
Ire,
ìkamun̄ mfut geege me inyọn̄.
Ifefieek otu inyi uti figi ya ibe,
“Bene me chereyi,
kayaka ìkpọk ìto mfut ofifi.”
Mgbọ yaage,
uti figi ya ochachiaak isan̄a.
20 Inu ya okeke ebi udun̄ kan̄ chieen̄ enenen.
Ema ekekido ibe,
“Ìre uti figi ya ìjeje igwat lek ichiaak isan̄a ikeya?”
21 Jisọs ofọfọọk ema ibe,
“Ǹkitumu atikọ inyi enyi ibe,
ire enyi ikaan̄ ichechieek,
mè kpekaan̄ ejit iba,
ìkare inu enyi emun̄be òrọrọ me lek uti figi yi gaalek ke enyi ebekọt irọ.
Enyi mêkọt itumu si inyi ogoon̄ yi ibe,
‘Jibi nan̄a me ere yi,
mè si rọn̄ me okwaan̄,’
mè òkup si ikeya.
22 Ire enyi ikaan̄ ichechieek,
enyi mêbọkọ inu geelek enyi ebeekbe me uriaak.”
Idodo ofolek unye kè Jisọs
23 Mgbọ Jisọs ojebe isi inin̄ Uwu Mbuban,
mè ikijeen̄ inu,
ebi ibot ngwugwa,
mè ebi ugane ama enunu me lek kan̄,
mè inido ọmọ ibe,
“Tumu-nu,
ìre kpasi unye ke okisa irọ otutuuk inu chi?
Ìre ekene onyi owu unye yi?”
24 Jisọs ofọfọọk ema ibe,
“Emi nkaan̄ si idodo ge mbado enyi.
Ire enyi ifọọk idodo n̄a,
mâtumu unye nkisa irọ otutuuk inu chi ijeen̄ enyi.
25 Ìre unye eyi Jọn okisa igwook ene mun̄ ìnan̄a me owa?
Ìre ìnan̄a me ubọk Awaji?
Sà ìre ìnan̄a me ubọk ebilene?”
Ema eninin̄ oru me lek kiban̄,
mè ibe,
“Ire eji ifọọk ibe ke ìnan̄a me ubọk Awaji,
môdo eji ibe ìre keke orọ eji kpechieek ikọ kè Jọn.
26 Ire eji ifọọk ibe ke ìnan̄a me ubọk ebilene,
eya ìkpotat,
bak me lek ufieek-owot eji ekaan̄be me lek ebilene.
Mije,
otutuuk ene mîchieek ibe ke Jọn ìre ogwu nriran.”
27 Eya orọ,
ema efọfọọk Jisọs ibe ke ema kperiọọn̄.
Jisọs ofọfọọk ema ibe,
“Emi si m̀kpatumu ere unye nkisa irọ otutuuk inu chi onan̄abe inyi enyi.”
Urọk bọn ebirieen̄ iba
28 Jisọs onenido ema ibe,
“Ìre keke ke enyi ekeek ofolek inu keyi?”
mè inito urọk ge inyi ema ibe,
“Ogwu enerieen̄ ge okaan̄ ibot bọn ebirieen̄ iba,
mè initumu inyi ogwu adasi ibe,
‘Si rọ ikwaan̄ me uko gerep chereyi nyi emi!’
29 “Gwun̄ ya ofọfọọk ogwu ute ibe ke ọmọ ìkposi.
Ire,
me mgburudun̄ mgbọ,
inwenwene ejit,
mè isi irọ ikwaan̄ ya.
30 “Ogwu ute ya onenisi lek gwun̄ kan̄ ogwu òso iba,
mè itumu si ikọ yaage inyi.
“Gwun̄ ya ochechieek ibe iin̄ ke ọmọ môsi.
Ire,
ìkasi.”
31 Jisọs onenido ebi ife cha ibe,
“Me etete bọn ebirieen̄ iba cha,
ìre ogwu owa orọ inu nte kiban̄ oweekbe?”
Ema efọfọọk ibe ke îre ogwu adasi.
Jisọs onenibe ema,
“Me atikọ,
ǹkitumu inyi enyi ibe ke ebi ìkibọkọ otitip ido mè ebi òje oyet mêkidasi inin̄ mkpulu eyi Awaji me isi kinyi.
32 Mije,
Jọn ògwook mun̄ înu ibonijeen̄ enyi oniin̄ ike enyi ebesa ikana ebi ata irọrọ me isi Awaji,
enyi kpechieek ikọ kan̄.
Ire,
ebi ìkibọkọ otitip ido mè ebi òje oyet mîchieek ikọ kan̄.
Enyi esasa chieen̄ kinyi ikimun̄ ubọk ebi ijo chi ekigwu ikom,
mè ikpọkpọ itet si ejit kinyi inye,
mè ijit inwenwene ejit,
mè ichieek ikọ kè Jọn.”
Urọk ijo ebi ikwaan̄ uko
33 Jisọs onenibe ema “Ìgban̄ ofifi urọk.
Îkaan̄ ogwu enerieen̄ ge òkakaan̄ ijọn̄ uko,
mè iwop gerep,
mè inama ogọ ikana uko ya,
mè irọkọ udọn̄ ere ebekichimi mun̄ isibi me lek mfut gerep cha,
mè inama uwu-oket ere ebekikup ibem uko ya,
mè inisa uko ya inyi ebi ikwaan̄ uko ibe ekekpọ chieen̄ me lek,
mè inan̄a isi ije me ofifi ido.
34 Me mgbọ irọrọkọ inu me uko okembe,
ogwukaan̄ uko ya oneniria ebi usun̄ kan̄ isi lek ebi ikwaan̄ uko cha ibe esi ebọkọ uche mfut eyi kan̄ ejet ọmọ.
35 “Ebi ikwaan̄ uko cha etetet ebi usun̄ cha,
mè isut ene ge me lek kiban̄,
mè ikpan̄ ogwu òso iba,
mè isa ewuuk itọbọ ogwu òso ita.
36 Ogwukaan̄ uko ya okpọkpọk iria ebi usun̄ ìwawa igak ebi îriabe me adasi mgbọ ibe esi ebọkọ uche mfut eyi kan̄ ejet ọmọ.
Ife cha erọrọ si ebi usun̄ kechi ike erọbe ebi adasi.
37 Me mgburudun̄ kan̄,
ogwukaan̄ uko ya oraria gwun̄ kan̄ ibe isi lek ife cha,
mè ikeek ibe ke ife cha mêlibi gwun̄ kan̄.
38 “Ire,
mgbọ ebi ikwaan̄ uko cha emun̄be gwun̄ ogwukaan̄ uko ya okinu,
ema etọtọt ibe,
‘Kpọ gwun̄ ogwukaan̄ uko ire eyi,
eji enetet ekpan̄,
inyi ìrot ìbokaan̄ ikana ire eyi kiji.’
39 Mgbọ gwun̄ ya onube,
ema etetet,
mè itaba isibi me emen uko gerep ya,
mè ikpan̄.”
40 Jisọs onenido ebi ìkigban̄ urọk ya ibe,
“Mgbọ ogwukaan̄ uko gerep ya isinu,
ìre keke ke ìborọ ebi ikwaan̄ uko cha?”
41 Ife cha efọfọọk ibe ke ìbokpakpan̄ otutuuk ijo ebi ikwaan̄ uko cha isan̄a,
mè isa uko kan̄ inyi ofifi ebi ikwaan̄ uko,
ebi ìbekinyi ọmọ uche mfut eyi kan̄ mgbọ geelek erọkọbe mfut me uko.
42 Jisọs onenido ema ibe,
“Ìre enyi kpefuk inu egebe me Ikpa Mbuban ibe,
“ ‘Ewuuk ebi ìnama uwu ejitbe,
ọmọ oyaka inikana atà ibot uwu;
eyi ìre inu Okumugwem orọbe,
inu yi îjaan̄ enenen me chieen̄ kiji?f’
43 “Eya orọ,
ǹkitumu inyi enyi ibe ke mêbọkọ mkpulu eyi Awaji isan̄a me ubọk kinyi,
mè isa inyi ebi ìbesa mfut ògbegbe inu. [
44 Ene geelek ònanan̄a irọn̄ me inyọn̄ ewuuk yi môkpọk isan,
ire,
ene geelek ewuuk yi môrọn̄be ikeme ìbokpukpukpuku si.”]