Urọk ijo ebi ikwaan̄ uko
12
Jisọs onenito urọk ge inyi ema ibe,
“Îkaan̄ ene ge òwowop uko gerep,
mè inama ogọ ikana,
mè irọkọ udọn̄ ere ebekichimi mun̄ isibi me lek mfut gerep cha,
mè inama uwu-oket ere ebekinene isi ikup ikibem uko ya,
mè inisa uko ya inyi ebi ikwaan̄ uko ibe ekekpọ chieen̄ me lek,
mè inan̄a isi ije me ofifi ido.
2 Mgbọ gerep cha oren̄ebe,
ogwukaan̄ uko ya oneniria ogwu usun̄ kan̄ ge ibe isi lek ebi ikwaan̄ uko cha isi ibọkọ uche mfut eyi òrere ọmọ lek isa ijet ọmọ.
3 Ebi ikwaan̄ uko cha etetet ogwu usun̄ ya isut,
mè irieen̄ itap me oniin̄,
ukpọk ubọk.
4 Ogwukaan̄ uko ya oyayaka iria ofifi ogwu usun̄.
Ebi ikwaan̄ uko cha etetet isulu ibot ibum,
mè irọ ọmọ inu esip.
5 Ogwukaan̄ uko ya oneniria si ofifi ogwu usun̄.
Ebi ikwaan̄ uko cha etetet ogwugwa ikpan̄.
Ikeyi ke ogwukaan̄ uko ya okpọkpọ ikiria ebi usun̄ kan̄.
Ife cha esusut usini,
mè ikpan̄ usini.
6 “Ene ge òsisik iraria ìre gwun̄ ogwukaan̄ uko ya okaan̄be.
Gwun̄ ya ìre gwun̄ îmabe enenen.
Ọmọ ore ogwu mgburudun̄ îriabe isi lek ebi ikwaan̄ uko cha.
Ekiket kan̄ ìre ke ife cha mênyi gwun̄ kan̄ ulibi.
7 “Ire,
mgbọ ebi ikwaan̄ uko cha emun̄be gwun̄ ya okinu,
ema eninin̄ oru me lek kiban̄ ibe,
‘Kpọ gwun̄ ogwukaan̄ uko ya okinu yilọ!
Isinu,
eji etet ekpan̄,
inyi ìrot ìbokaan̄ ikana ire eyi kiji.’
8 Ikeyi ke ema etet gwun̄ ogwukaan̄ uko ya ikpan̄,
mè itaba nkwukwu kan̄ isibi me uko ya.”
9 Jisọs onenido ebi ibot ebi Ju cha ibe,
“Ìre enyi ekeek ibe ke ogwukaan̄ uko ya ìborọrọ?
Ìbonunu inikpan̄ ebi ikwaan̄ uko cha isan̄a,
mè isa uko gerep kan̄ ya inyi ofifi ebi ikwaan̄ uko.
10 Ìre enyi kpefuk me Ikpa Mbuban ibe,
“ ‘Ewuuk ebi ìnama uwu ejitbe,
ọmọ oyaka inikana ata ibot uwu.
11 Eyi ìre inu Okumugwem orọbe,
inu yi îjaan̄ enenen me chieen̄ kiji’a?”
12 Ebi ibot ebi Ju cha erọriọọn̄ ibe ke îre ema ke Jisọs okitumu ikọ chi ibak.
Eya orọ ema ekekiweek oniin̄ ebesa itet ọmọ me ere ya.
Ire,
ukpook ebi ene ìkachieek.
Ema ejujuuk ọmọ itele,
mè isibi ifon.
Idodo ofolek otitip ido
13 Ebi ibot ebi Ju cha eneniria usini ebi Farisi mè usini ebi ìkigọọk Erọdu ibe esi eleke Jisọs ikọ me otu.
14 Ife chi enunu me lek kè Jisọs,
mè inibe ọmọ,
“Ogwu Ijejeen̄,
eji mîriọọn̄ ibe ke owu ìre ogwu òkitumu atikọ,
òkakilibi ene chieen̄,
òkakikpọ ene geege chieen̄ me isi.
Kpan̄asi ikeya,
owu òkijeen̄ ebi ene oniin̄ Awaji me atikọ.
Tumu nyi eji nu,
ìre îgbe ibe eketip otitip ido enyi ogwu Sisa,
sà ìre ìkagbe?
15 Ìre eji eketip,
sà ìre eji ekakitip?”
Jisọs orọriọọn̄ ejit uleke kiban̄,
mè ido ema ibe,
“Ìre keke orọ enyi ekitip ufe inyi emi?
Ìsa dinari ge ìjet emi m̀kpọ-nu.”
16 Ema esasa inu.
Jisọs onenido ema ibe,
“Ìre ogugo kè ekene mè erieen̄ kè ekene ire echi me lek ikpoko yi?”
Ema efọfọọk ọmọ ibe ke îre eyi ogwu Sisa.
17 Jisọs obebe ema,
“Ìsa inu ogwu Sisa ìnyi ogwu Sisa,
mè ìsa eyi Awaji ìnyi Awaji.”
Mije ufọọk-otu keyi,
ukpook kè Jisọs otetet ema enenen.
Idodo ofolek ijojomo me mkpa
18 Ebi Sadusi,
ebi ìkibe ke ene kpekijomo me mkpa,
eneninu me lek kè Jisọs,
mè inibe ọmọ,
19 “Ogwu Ijejeen̄,
Mosis ìnyi eji Ikan ibe,
ire ene ikwu itele ogwu nwa,
ìkabon gwun̄,
mè ngwan̄ ene ya imọnọ nwakpa ngwan̄ kan̄ okwube itele ya me lek nwa,
mè ibon bọn me owot inyi ngwan̄ kan̄ ogwu òkwukwu.b
20 Me ere ngwan̄ ebirieen̄ jaaba ekupbe,
ogwu adasi me etete kiban̄ onenido nwa,
mè ikwu itele,
ìkabon gwun̄.
21 Ogwu òso iba onenimọnọ nwakpa ya me lek nwa,
mè ikwu si itele,
ìkabon gwun̄.
Ikeya ke ogwu òso ita orọ si.
22 Ikeya si ke otutuuk ebi ngwan̄ kechilọ cha erọ.
Ema ene jaaba cha erere olom inyi ogwu enenwaan̄ ya iso,
mè ikwaan̄ ita,
kpebon gwun̄ me owot ogwu enenwaan̄ ya.
Me mgburudun̄ kan̄,
ogwu enenwaan̄ ya si okwukwu.
23 Me mgbọ ebi ìkwakwaan̄ mêjomobe me mkpa,
ìre ogwu enenwaan̄ yi ìbore nwa inyi ekene me etete ebi ngwan̄ jaaba cha,
mije,
otutuuk kiban̄ mîkaan̄ ọmọ me lek nwa iso?”
24 Jisọs ofọfọọk ema ibe,
“Berebet ke enyi kperiọọn̄ inu egebe me Ikpa Mbuban,
enyi kperiọọn̄ si unye Awaji okaan̄be.
Mkpọ si enyi ekije ilọ!
25 Me mgbọ ijojomo me mkpa,
ebilene ebeluk kubọk ebi osat Awaji ìkup me emen inyọn̄ ekiluk.
Kpebekaan̄ olom,
kpebekaan̄ si nwa.
26 Ire me lek ikọ ebi ìkwakwaan̄ ijojomo me mkpa,
ìre enyi kpefuk me ikpa kè Mosis,
ere òtutumu ikọ ofolek ukan̄ òlolomo me lek uti,
ike Awaji otumube inyi Mosis ibe,
‘Emi ìre Awaji kè Ebereyam,
mè Awaji kè Ajiki,
mè Awaji kè Jekọp’c?
27 Awaji ìre Awaji ebi ìkup me ugwem,
ìkare Awaji ebi ìkwakwaan̄.
Enyi mîje ilọ enenen!”
Ikan òmimin ichit
28 Ike mgbọ ya,
ene ge me lek ebi ìjeen̄ Ikan înọ ema ekiwut ifan̄a ya,
mè imun̄ ibe ke Jisọs îfọọk ebi Sadusi cha itat,
mè inido Jisọs ibe,
“Me etete otutuuk Ikan,
ìre Ikan eyi owa okup me uyọt ichit?”
29 Jisọs ofọfọọk ọmọ ibe,
“Ikan eyi òkukup me uyọt igak otutuuk Ikan ìre eyi òbe,
“ ‘Ebi Ijeren,
ìgban̄!
Okumugwem Awaji kiji,
ìre Awaji ge gaalek.
30 Ma Okumugwem Awaji kwun̄
me otutuuk ejit kwun̄,
mè otutuuk ibot ejit kwun̄,
mè otutuuk ekiket kwun̄,
mè otutuuk unye kwun̄.’d
31 Ikan eyi òkup me uyọt igọọk eya ìre eyi òbe,
“ ‘Ma ogwu ebilene ogbo kwun̄
kubọk omabe akpalek kwun̄.’e
Kpunu ofifi Ikan òmimin igak Ikan iba kechi.”
32 Ogwu òjeen̄ Ikan ya obebe Jisọs,
“Ogwu Ijejeen̄,
owu ofọọk itat.
Owu otumu atikọ ibe ke Okumugwem gaalek ore Awaji;
ke kpunu ofifi Awaji òkukup isan̄a me lek Okumugwem;
33 ke ene môma Awaji me otutuuk ejit kan̄,
mè otutuuk ekiket kan̄,
mè otutuuk unye kan̄,
mè ima si ogwu melek kan̄ kubọk îmabe lek kan̄;
ke isusun̄ Ikan iba chi îkup me uyọt igak isasa anam mè ngwugwa òkup esese esese inigwa inyi Awaji.”
34 Jisọs omumun̄ ibe ke ene ya îgobo ikọ ya itet,
mè ifọọk inen,
mè initumu inyi ọmọ ibe,
“Owu òkajọn̄ọ ere me ininin̄ mkpulu eyi Awaji.”
Eya iraraka,
kpunu ene geege òyayaka ikọt isan̄a mgbugba me lek ido Jisọs ikọ ofifi.
Idodo ofolek ogwu Awaji otọkọbe aran̄ me ibot
35 Mgbọ Jisọs okijeen̄ inu me Uwu Mbuban ya,
inenikido ibe,
“Ìre ebi ìjeen̄ Ikan ejeje ikitumu ibe ke ogwu Mesaya (òrere ogwu Awaji otọkọbe aran̄ me ibot) ìbonan̄a me owot iman kè Debit isibi?
36 Debit me lek kan̄ îben nriran me unye Ekwukwu Mbuban,
mè itumu ibe,
“ ‘Okumugwem ìtumu inyi Okaan̄ n̄a ibe,
“Siki kweek irek me agan̄ ubọk ulom n̄a,
mege ire mgbọ mâsabe ebi ochicha
kwun̄ irọ inu ibene ukot inyi owu.” ’f
37 Ìre ogwu Debit me lek kan̄ ogwenbe Okaan̄-ene ìbojeje iyaka inire gwun̄ ònan̄a me owot iman kè Debit isibi?”
Ogbogbo ebi ene ìkukup me ere ya ekekigban̄ ikọ kè Jisọs,
mè ikibele ejit me lek.
Nteme ofolek ebi ìjeen̄ Ikan
38 Ike Jisọs okijeen̄ inu me ere ya,
ikekitaba ebi ene ubọk me utọn̄ ibe,
“Ìgbala chieen̄ me lek ebi ìjeen̄ Ikan,
ebi ìkinwọọn̄ itatap ujọn̄ọ ofọnti mgbọ geelek,
mè ikima ibe eketọp ema ata amọn eyi umin me ere ene ewabe.
39 Ema ekima ikwekweek me inyọn̄ ikasi esun̄be inyi ebi ibot me uwu ntitiin̄,
mè ikwekweek me irek umin me ere geelek ekirie ijọk,
40 mè ikima si ifefeen̄ ebi nwakpa ibọkọ uwu kiban̄ isak,
mè ikinwọọn̄ irariaak ujọn̄ọ uriaak isa ikifiaan̄ ebi ene ibe ke ema mîriọọn̄ Awaji igana.
Osusut kiban̄ obomin igak.”
Inyinyi ogwu nwakpa ge onyibe
41 Jisọs onenisiki ikweek iriaak me ere ekitap ikpoko me emen Uwu Mbuban ya,
mè ikikpọ ubọk ebi ene ekinu initap ikpoko.
Owuwa ebi ìkakaan̄ ikpoko ekekinu initap owuwa ikpoko.
The Widow’s offering (Mark 12:41-44)
42 Nwakpa ge,
ogwu ugbọọn̄,
ojeje inu,
mè initap asabọn ikpoko ekwe iba (echi otu ewe kiban̄ osipbe enenen igak ata ikpoko ge).