Ijejeen̄ ofolek ebi Farisi mè ebi ìjeen̄ Ikan
23
Jisọs onenitumu inyi ebi urum ene cha mè ebi udun̄ kan̄ ibe,
2 “Ebi Farisi mè ebi ìjeen̄ Ikan ere ebi ìkakaan̄ unye ikpakpa Ikan kè Mosis iwele ijeen̄ ebi ene.
3 Eya orọ,
enyi ìkigban̄ utọn̄ ìnyi ema,
mè ìkirọ otutuuk inu geelek ema ekitumu inyi enyi.
Ire,
ikalululuk ìrọ inu ema ekirọ,
mije,
ema kpekirọ inu ema ekijeen̄.
4 Ema ekitap ulobo akpan iben ikeme ene me ibot.
Ire,
ema me lek kiban̄ kpekiweweek ichachak ubọk me lek akpan ya igọọk ibeme.
5 “Inu geelek ema ekirọ,
ekirọ inyi ebilene emun̄ ema.
Ọkpọk egebe ikọ Awaji itap me emen,
mè ikisa fanti itobo ikam me inyọn̄ isi melek ubọk me mgbọ ekiriaak uriaak,
eyi otutuuk ene ìkire sọntiik.
Ire,
eyi kiban̄,
ikpele ile.
Mgbidim afilafa òkididen̄ me utọn̄ ekwut ekisa ichit lek iriaak uriaak,
eyi kiban̄ ujọn̄ọ ile.
6 Ema ekima ikwekweek me irek umin me ere geelek ekirie ijọk,
mè ikwekweek me inyọn̄ ikasi esun̄be inyi ebi ibot me uwu ntitiin̄.
7 Ema ekinwọọn̄ si ibe ebi ene eketọp ema ata amọn me emen ewe ere ebi ene ewabe,
mè ikima ibe ekegwen ema ‘Ebi Ijejeen̄.’
8 “Ire,
ikachieek ibe ekegwen enyi ‘Ebi Ijejeen̄,’
mije,
Ogwu Ijejeen̄ ge gaalek ke enyi ekaan̄,
melek si,
enyi otutuuk ene ìre ngwan̄ ngwan̄.
9 Ikagwen ene geege me linyọn̄ keyi ‘Ute,’
mije,
Ute ge gaalek ke enyi ekaan̄,
òrere ogwu òkup me emen inyọn̄.
10 Ikachieek si ibe egwen enyi ‘Ogwu Ibot,’
mije,
Ogwu Ibot ge gaalek ke enyi ekaan̄,
òrere ogwu Awaji otọkọbe aran̄ me ibot.
11 Ogwu òmimin ichit me etete kinyi môre ogwu òkisi ikwaan̄ inyi enyi.
12 Mije,
ogwu ikibene lek,
mêsiki.
Ogwu isiki lek kan̄ me ijọn̄,
mêbene ifo inyọn̄.”
Jisọs îgana ere inyi ebi ìjeen̄ Ikan mè ebi Farisi
13 Jisọs onenibene ikigana ere inyi ema ibe,
“Môfieek inyi enyi ebi ìjeen̄ Ikan,
mè ebi Farisi,
enyi ebi isi iba kechi!
Enyi ekigwuk isotu mkpulu eyi Awaji ikwek ebi ìbeninin̄.
Enyi me lek kinyi,
ninin̄,
enyi kpeweek ininin̄.
Yaka tetele inyi ebi ìweweek ininin̄ enin̄,
enyi kpechieek. [
14 Môfieek inyi enyi,
ebi ìjeen̄ Ikan mè ebi Farisi,
enyi ebi isi iba kechi!
Enyi ekifeen̄ ebi nwakpa ibọkọ uwu kiban̄,
mè ikinwọọn̄ irariaak ujọn̄ọ uriaak isa ikibene lek kinyi me isi ebilene.
Eya orọ,
osusut kinyi mônye enenen.]
15 “Môfieek inyi enyi ebi ìjeen̄ Ikan,
mè ebi Farisi,
enyi ebi isi iba kechi!
Enyi ekije inan̄a me ama ge isi ire ofifi ama,
mè ikisaba owuwa okwaan̄,
mè ikikwukwulu ikiweek ibot ejit ge òbogwu ikom igọọk enyi.
Enyi isikọt ikaan̄ ene ge,
enyi mîra irọ inyi ene ya iyaka ifieek igak enyi mgbọ iba,
mè ikana ire ogwu ama yọk igak ike enyi erebe.
16 “Môfieek inyi enyi ebi ǹnàan̄ ìkisa ene ijeen̄ oniin̄.
Enyi ekitumu ibe,
ire ene isa Uwu Mbuban inyan̄a ibot,
ke inyan̄a-ibot keya ìkakup melek inu geege.
Ire,
ire ene isa alata araran̄ òkup me Uwu Mbuban inyan̄a ibot,
ke inyan̄a-ibot keya ore eyi ònyenye.
17 Enyi burubut ebi ǹnàan̄ kechi!
Alata araran̄ melek Uwu Mbuban eyi òrọrọ inyi alata araran̄ ya ikup mbuban,
ìre eyi owa omin igak?
18 Enyi ekijeen̄ si ibe ire ene isa ntook ngwugwa Awaji inyan̄a ibot,
ke inyan̄a-ibot keya ìkakup me lek inu geege.
Ire,
ire ene isa inu òkup me inyọn̄ ntook ya eyi ebesa igwa ngwugwa inyan̄a ibot,
ke inyan̄a-ibot keya onye.
19 Enyi ebi ǹnàan̄ kechi!
Ǹdo-nu enyi,
inu ebesa igwa ngwugwa melek ntook eyi òrọrọ inyi inu ngwugwa ya ikup mbuban,
ìre eyi owa omin igak?
20 Ene geelek òsasa ntook ngwugwa inyan̄a ibot,
ìsa ntook ya melek otutuuk inu ngwugwa òkup me inyọn̄ ntook ya inyan̄a ibot.
21 Ikeya si,
ene geelek òsasa Uwu Mbuban inyan̄a ibot ìsa Uwu Mbuban ya melek Awaji ogwu òluk me emen Uwu Mbuban ya inyan̄a ibot.
22 Ene geelek òsasa emen inyọn̄ inyan̄a ibot ìsa ogboon̄ ubọọn̄ Awaji melek Awaji ogwu òkweek me inyọn̄ ogboon̄ ubọọn̄ ya inyan̄a ibot.
23 “Môfieek inyi enyi ebi ìjeen̄ Ikan mè ebi Farisi,
enyi ebi isi iba kechi!
Enyi ekichieek mkpa ikinyi irek ge me etete akọp irek me ibot asabọn inwan̄ uti ekisa irọ inorie itop,
kubọk echi ekigwen mînt mè dîn mè kumìn,
ire,
mè ikikpọ chieen̄ ilọ me lek ikpele inu òkukup me uyọt me emen Ikan kinyi,
kubọk irọrọ atikọ,
mè ikakaan̄ ejit nsan,
mè igbegbe utoon̄-ejit.
Kpan̄asi ikeya,
echi ilile cha òkukup me uyọt ke enyi mekikpọ chieen̄ me lek,
mè ikikeek si echilọ cha echi ìkamalek ìkup me uyọt.
24 Enyi ebi ǹnàan̄ ìkisa ene ijeen̄ oniin̄!
Enyi ekiruk atat isan̄a me emen miin̄,
mè ikimeen̄ eriembuuk me emen miin̄ ya.
25 “Môfieek inyi enyi ebi ìjeen̄ Ikan mè ebi Farisi,
enyi ebi isi iba!
Enyi ekigwọk udun̄ ekpen̄ kinyi mè alala kinyi.
Ire,
emen cha,
inu enyi ekaan̄be me chieen̄ ile mè ubumu-ejit ìjojot.
26 Owu ogwu Farisi,
ogwu ǹnàan̄,
dasi gwọk emen ekpen̄ kwun̄ mè alala kwun̄,
ke udun̄ cha môtana si.
27 “Môfieek inyi enyi ebi ìjeen̄ Ikan mè ebi Farisi,
ebi isi iba!
Enyi ekup kubọk udọn̄-ufuun̄ ekenbe agba okuket me ntut oyet,
inyi ijaan̄.
Ire,
ukwuuk nkwukwu ene mè njijọ inu ojot emen.
28 Ikeya si,
me akpalek kinyi,
enyi ekup me chieen̄ ene kubọk ebi ata irọrọ.
Ire,
me emen kinyi,
ugwem isi iba mè inu ikpak geelek ìjojot.
29 “Môfieek inyi enyi ebi ìjeen̄ Ikan mè ebi Farisi,
ebi isi iba kechi!
Enyi ekiwat ujuja ewuuk me inyọn̄ udọn̄-ufuun̄ ebi nriran,
mè ikibala udọn̄-ufuun̄ ebi ata irọrọ,
30 mè ikitumu ibe ke more enyi ekup me ukot ebi nte nte kinyi cha,
ke enyi kpemegọọk ema ifiin̄ eje ebi nriran.
31 Sa me ikeya,
enyi mîkeke ata-ikọ ikeme lek kinyi ibe ke enyi ìre bọn bọn ebi ìkpan̄ ebi nriran me afa.
32 Ire ikeya,
ebi nriran ebi nte nte kinyi ekpan̄be isik cha,
enyi me lek kinyi ìkpan̄ ìsan̄a ma!
33 “Enyi ulu kechi!
Enyi bọn ijo ulu kechi!
Ìre enyi ebejeje inwọnọ itip-oyerebet eyi môsabe enyi itap me ama yọk?
34 Eya orọ,
emi mâria ebi nriran,
mè ebi ìriọọn̄ inu,
mè ebi ijejeen̄ ijet enyi.
Ire,
enyi mêkpan̄ usini kiban̄,
mè igon usini me inyọn̄ uti nkwurieen̄,
mè itet usini isut me emen uwu ntitiin̄ kinyi,
mè ikilibi ikana me ama me ama ikiweek itetet ema.
35 Sa me ikeya,
eje otutuuk ebi ata irọrọ ekpan̄be me linyọn̄ môtoon̄ enyi me ibot,
bene me lek eje kè Eben ogwu ikarọge ijo inu geege si re lek eje kè Jekaraya gwun̄ kè Berekaya ogwu enyi etetbe ikpan̄ me etete ere mbuban melek ntook ngwugwa me emen Uwu Mbuban.
36 Me atikọ,
ǹkitumu inyi enyi ibe ke osusut otutuuk ijo irọrọ chi ìbotoon̄ enyi ebi mgbọ kechi me ibot.”
Jisọs îto njijin Jeruselem
37 Jisọs onenibọn̄ ukpo ibe,
“Jei,
ebi Jeruselem,
Jeruselem,
enyi ebi ìkikpan̄ ebi nriran,
mè ikisa ewuuk itọọn̄ ebi osat geelek Awaji oriabe ijet enyi!
Owuwa mgbọ,
emi nkisa iweek ichachiaan̄ ebi kinyi igba lek n̄a,
inyi ǹchit enyi kubọk uman unọn okichit ebi bọn me irak uwop kan̄,
ire,
enyi kpechieek.
38 Enyi ebi Jeruselem,
ìkpọ,
mêtele Uwu Mbuban kinyi inyi enyi ukpọk emen.
39 Ǹkitumu inyi enyi ibe ke enyi kpebeyaka imun̄ emi ofifi mege ire mgbọ enyi mêtumube ibe,
‘Ugbana ikup inyi ogwu ònunu me erieen̄ Okumugwem.’a ”