Idodo ofolek unye kè Jisọs
20
Usen ge mgbọ Jisọs okijeen̄ ebi ene inu,
mè ikilook ata etip me emen oyet egep Uwu Mbuban,
ebi ibot ngwugwa mè ebi ìjeen̄ Ikan,
melek ebi ugane ama enunu me lek kan̄,
Luk 20:1-26
2 mè inido ọmọ ibe,
“Tumu nyi eji nu,
ìre kpasi unye ke okisa ìrọ ikwaan̄ chi?
Ìre ekene onyi owu unye yi?”
3 Jisọs onenibe ema,
“Mgbọ keyi,
emi mâdo enyi ikọ ge.
4 Ìre unye eyi Jọn okisa igwook ene mun̄ ìnan̄a me ubọk Awaji?
Sà ìre ìnan̄a me ubọk ebilene?”
5 Ema eninin̄ oru me lek kiban̄,
mè ibe,
“Ire eji ifọọk ibe ke unye ya ìnan̄a me ubọk Awaji,
môdo eji ibe mè ìre keke orọ eji kpechieek ikọ kè Jọn?
6 Ire eji ifọọk ibe ke ìnan̄a me ubọk ebilene,
otutuuk ebi ene ìkup me ere yi mêteen̄ ewuuk itọbọ eji,
mije,
otutuuk ene mîchieek ibe ke Jọn ìre ogwu nriran.”
7 Eya orọ,
ema efọfọọk Jisọs ibe,
“Eji kperiọọn̄ ere unye kè Jọn ya onan̄abe.”
8 Jisọs otutumu inyi ema ibe,
“Emi si,
m̀kpatumu ere unye eyi nkisa irọ inu chi geelek onan̄abe inyi enyi.”
Urọk ebi ikwaan̄ uko
9 Jisọs onenito urọk ge inyi ema ibe,
“Ogwu enerieen̄ ge oniwop uko gerep ge,
mè isa uko ya itap me ubọk ebi ikwaan̄ uko ibe ekekpọ chieen̄ me lek,
mè inan̄a isi ije me ofifi ido,
mè ikup ifiin̄ me oniin̄ ije ya.
10 Mgbọ mgbọ irọrọkọ inu me uko okembe,
ogwukaan̄ uko ya oraria ogwu ikwaan̄ kan̄ ge isi lek ebi ikwaan̄ uko cha ibe isi ibọkọ uche mfut eyi kan̄ isa ijet ọmọ.
Ire,
ebi ikwaan̄ uko cha etetet ogwu ikwaan̄ ya isut,
mè iria ọmọ ifo ukpọk ubọk.
11 Ogwukaan̄ uko ya oneniria ofifi ogwu ikwaan̄ isi lek ebi ikwaan̄ uko cha.
Ire,
ife cha etetet ogwu ikwaan̄ keya si isut,
mè irọ ọmọ inu esip,
mè iria ọmọ si ifo ukpọk ubọk.
12 Ogwukaan̄ uko ya oraria òso ogwu ikwaan̄ ita isi lek ife cha.
Ema etetet ogwu ikwaan̄ keya isulu itap unan me lek,
mè ilap isibi ukpọk ubọk.
13 “Ogwukaan̄ uko ya onenibe,
‘Jei,
ìre keke ke mbayaka irọ?
Usini mgbọ,
ire nria ibot gwun̄ ge n̄a,
ogwu mmabe,
isi lek ife cha,
ife cha mênyi gwun̄ ya ulibi.’
14 “Ire,
mgbọ ebi ikwaan̄ uko cha emun̄be gwun̄ ya,
ema etọtọt me etete kiban̄ ibe,
‘Ogwu òbonirie uko yi me ìrot ire ogwulọ òkinu.
Eji enetet ekpan̄,
inyi ìrot kan̄ yi ikana ire eyi kiji.’
15 Ema etetet gwun̄ ya,
mè itaba isibi me emen uko ya,
mè ikpan̄.”
Mgbọ Jisọs otobe urọk ya isan̄a,
inenibe ebi ife cha,
“Ìre keke ke enyi ekeek ibe ogwukaan̄ uko ya oborọ ebi ikwaan̄ cha?
16 Ìbokpakpan̄ otutuuk ife cha isan̄a,
mè ibọkọ uko ya isa inyi ebi ofifi ene.”
Mgbọ ebi ìkup me ere ya enọbe urọk ya Jisọs otobe,
ema ebebe,
“Awaji ikachieek!”
17 Jisọs okpọkpọ ema siì,
mè inibe ema,
“Ire ikeya,
ìbum-nu ibot ikọ egebe me Ikpa Mbuban ibe,
“ ‘Ewuuk eyi ebi ìnama uwu ejitbe,
ọmọ oyaka inikana ata ibot uwu.’a
18 Ene geelek ònanan̄a irọn̄ me inyọn̄ ewuuk ya môkpọk isan.
Ene geelek ewuuk yi orọn̄be ikeme,
ìbokpukpukpuku si.”
19 Ebi ìjeen̄ Ikan mè ebi ibot ngwugwa eweweek oniin̄ ema ebesa itet Jisọs mgbọ yaage,
mije,
ema mîriọọn̄ ibe ke îre ema ke îto urọk ya ikeme.
Ire,
ema kpekọt itet Jisọs,
mije ukpook ebi ene.
Idodo ofolek otitip ido
20 Ebi ìjeen̄ Ikan mè ebi ibot ngwugwa cha ekekikpọ mgbọ Jisọs môrọbe inu ilọ,
inyi ema etet.
Ema eraria ebi ene ibe erọ lek kiban̄ kubọk ema ìre ata ebi ìriọọn̄ Ikan,
mè ekegban̄ Jisọs ikọ me otu,
inyi ema ekọt ekaan̄ inu ema mêsabe itet Jisọs ikana itap me ubọk ogwu ibot mkpulu ebi Rom ogwu òkup me agan̄ ya,
inyi itip ọmọ oyerebet.
21 Ebi eriabe cha enenido Jisọs ibe,
“Ogwu Ijejeen̄,
eji mîriọọn̄ ibe ke ikọ kwun̄ mè ijejeen̄ kwun̄ ìkpọkpọ ikitat;
ke owu òkakikpọ si ene geege chieen̄ me isi.
Me atikọ,
owu òkijeen̄ ebi ene oniin̄ eyi Awaji ubọk îgbebe.
22 Tumu-nu,
ìre îtat ibe eji eketip otitip ido enyi ogwu Sisa,
ogwu ibot mkpulu ebi Rom,
sà ìre ìkatat?”
23 Jisọs omọmọọn̄ isi iba kiban̄,
mè ibe ema,
24 “Ìjeen̄ emi dinari ge nu.”
Ife cha emọmọnọ dinari ge isibi ijeen̄.
Idodo ema ibe,
“Ìre ogugo kè ekene,
mè erieen̄ kè ekene okup me lek ikpoko yi?”
25 Ema efọfọọk ibe ke îre eyi ogwu Sisa.
Jisọs otutumu inyi ema ibe,
“Ire ikeya,
ìsa inu ogwu Sisa ìnyi ogwu Sisa,
mè ìsa eyi Awaji ìnyi Awaji.”
26 Ufọọk-otu kè Jisọs yi ogwogwook ema mbiribọ me lek,
otu ochichit ema.
Ema kpekọt isa ikọ geege Jisọs otumube me isi ebi ene itet ọmọ me ikan.
Idodo ofolek ijojomo me mkpa
27 Usini ebi Sadusi,
ebi ekachieekge ibe ke ebi ìkwakwaan̄ mêjomo me mkpa,
enunu me lek kè Jisọs,
mè inido ọmọ ibe,
Luk 20:27-47
28 “Ogwu Ijejeen̄,
Mosis îge me emen Ikan inyi eji ibe,
ire ene ido nwa,
mè ikwu itele,
ìkabon gwun̄ geege me owot ogwu enenwaan̄ ya,
mè ngwan̄ ogwu òkwukwu ya imọnọ nwakpa ya me lek nwa,
mè ibon bọn inyi ogwu ngwan̄ ya òkwukwu.
29 Me ere ngwan̄ ebirieen̄ jaaba ekupbe,
ogwu ugane me lek kiban̄ onenido nwa,
mè ikwu itele,
ìkabon gwun̄ geege.
30 Ogwu òso iba omọmọnọ ogwu enenwaan̄ ya ikaan̄ me lek nwa,
mè ikwu itele si,
ìkabon gwun̄ geege.
31 Ogwu òso ita si omọmọnọ ogwu enenwaan̄ ya ikaan̄,
mè ikwu itele,
ìkabon gwun̄ geege.
Sa me ikeya,
otutuuk ebirieen̄ jaaba cha ekakaan̄ ogwu enenwaan̄ ya me lek nwa iso,
mè ikwaan̄ itele,
kpebon gwun̄ geege.
32 Me òta kan̄ si,
ogwu enenwaan̄ ya okwukwu.
33 Me mgbọ ebi ìkwakwaan̄ mêjomobe me mkpa,
ìre ogwu enenwaan̄ ya ìbore nwa inyi ekene me etete ngwan̄ ebirieen̄ jaaba cha,
mije,
otutuuk kiban̄ mîkaan̄ ọmọ me lek nwa iso?”
34 Jisọs ofọfọọk ema ibe,
“Ebi ukot keyi mîkido nwa,
mè ikibat olom.
35 Ire,
ebi geelek Awaji omun̄be ibe ke mîgbe igọgọọk iluk ugwem me mgbọ ya mgbọ ebi ìkwakwaan̄ mêjomobe me mkpa,
ife cha kpebedo nwa,
kpebebat si olom.
36 Ema si kpebeyaka ikwu ofifi,
mije,
ema ebekup kubọk ebi osat Awaji.
Ema mêkana ire bọn Awaji,
nan̄a me lek ema mêjomobe me mkpa.
37 Ire me lek ikọ ijojomo me mkpa,
Mosis me lek kan̄ îjeen̄ ibe ke ebi ìkwakwaan̄ mêjomo me mkpa.
Mije,
mgbọ Mosis ogebe inu ofolek uti ukan̄ okilomo me lek ya,
erieen̄ îgwenbe Okumugwem ìre ‘Awaji kè Ebereyam,
mè Awaji kè Ajiki,
mè Awaji kè Jekọp.’b
Ife chi mîwuuk lek ikwaan̄ iraka isan̄a sabum mgbọ ya.
38 Eya orọ,
Awaji ìkare Awaji ebi ìkwakwaan̄.
Ire,
Awaji ìre Awaji ebi ìkup me ugwem,
mije,
me lek Awaji,
otutuuk ebilene ekup me ògat ugwem,
ebi ìkwakwaan̄ mè ebi ìkup me ugwem.”
39 Usini ebi ìjeen̄ Ikan ìkup me ere ya ebebe ọmọ,
“Ogwu Ijejeen̄,
owu ofọọk itat!”
40 Eya iraraka,
kpunu ene geege òyayaka ichat lek ido ọmọ ofifi ikọ.
Idodo ofolek ogwu Awaji otọkọbe aran̄ me ibot
41 Jisọs onenido ema ibe,
“Ìre keke orọ ebi ene ekitumu ibe ke ogwu Awaji otọkọbe aran̄ me ibot ìnan̄a me owot iman kè Debit?
42 Mije,
Debit me lek kan̄ ìge me emen ikpa Okwa ibe,
“ ‘Okumugwem ìtumu inyi Okaan̄ n̄a ibe,
“Siki kweek me agan̄ ubọk ulom n̄a,
43 mege ire mgbọ mâsabe ebi
ochicha kwun̄ irọ inu ibene ukot inyi owu.” ’c
44 Ìtumu-nu,
ogwu Debit me lek kan̄ ogwenbe Okaan̄-ene,
ìbojeje iyaka inire gwun̄ inyi Debit?”
Nteme ofolek ebi ìjeen̄ Ikan
45 Me isi otutuuk ene ìkukup me ere ya ikigban̄ ikọ,
Jisọs otutumu inyi ebi udun̄ kan̄ ibe,
46 “Ìgbala chieen̄ me lek ebi ìjeen̄ Ikan!
Ife chi ekima isasa ujọn̄ọ ofọnti kiban̄ ikije ikana ere,
mè ikima ibe ebi ene eketọp ema ata amọn eyi umin me emen ewe,
ere ebi ene ewabe,
mè ikima si ikwekweek me inyọn̄ ikasi esun̄be inyi ebi ibot me emen uwu ntitiin̄,
mè ikwekweek me irek umin me ere geelek ekirie ijọk.
47 Ife chi ekifeen̄ ebi nwakpa,
mè ikibọkọ uwu kiban̄ isak,
mè ikinwọọn̄ irariaak ujọn̄ọ uriaak isasa ijeen̄ ebi ene ibe ke ema mîriọọn̄ Awaji igana.
Osusut kiban̄ obomin ichit.”