Otitọt ikpakpan̄ Jisọs
26
Mgbọ Jisọs ojeen̄be otutuuk inu cha isan̄a,
inenitumu inyi ebi udun̄ kan̄ ibe,
2 “Enyi mîriọọn̄ ibe ke egwe iba gaalek osik ijọk Iraraka môrebe.
Mgbọ ya,
mêleke emi Gwun̄ Ebilene inyi egon ekpan̄ me inyọn̄ uti nkwurieen̄.”
3 Ebi ibot ngwugwa mè ebi ugane ama enenititiin̄ me uwu ogwu ibot ngwugwa ekigwen Keyefas,
4 mè ikitọt ike ema ebesa inween̄ lek ileke Jisọs itet ikpan̄.
5 Ire,
ema etutumu ifieek ibe ke ìkpore me emen ijọk ya,
inyi ebi ene ekato akọn̄.
Mîtọkọ Jisọs aran̄ me ibot me Betani
6 Mgbọ Jisọs okupbe me Betani,
me uwu kè Saimọn ogwu òfafiak orukan̄ inyakpa,
7 ogwu enenwaan̄ ge osasa iko alabasita aran̄ utop olu ònyenye ewe enenen ojotbe emen inu me lek kè Jisọs me lek ikasi ere îkweekbe irek,
mè ikana aran̄ ya igwook Jisọs me ibot.
8 Mgbọ ebi udun̄ kan̄ emun̄be inu ogwu enenwaan̄ ya orọbe,
ema enanaan̄ ejit,
mè ikinunuun̄ me lek kiban̄ ibe,
“Iyak!
Sà ichep keyi ye?
9 Mêkọt inyam aran̄ yi me unye otu ewe,
mè esa ikpoko ònan̄a me lek eche enyi ebi ugbọọn̄.”
10 Jisọs orọriọọn̄ inu ema ekitumu,
mè inido ema ibe,
“Ìre keke orọ enyi ekisisaak ogwu enenwaan̄ yi?
Ogwu enenwaan̄ yi îrọ inu ògbegbe,
mè ijaan̄,
inyi emi.
11 Mije,
ebi ugbọọn̄ melek kinyi ekikup mgbọ geelek.
Ire,
emi m̀kpagọọk enyi ikup mgbọ geelek.
12 Aran̄ yi ogwu enenwaan̄ yi ogwookbe emi me lek,
ìsa ibala akpalek n̄a isun̄ iban ifufuun̄ n̄a.
13 Me atikọ,
ǹkitumu inyi enyi ibe,
ere geelek mêlookbe ata etip yi me otutuuk linyọn̄,
mêtumu inu ogwu enenwaan̄ yi orọbe igbaalek,
inyi ekesa ekeek ogwu enenwaan̄ yi.”
Judas îchieek ileleke Jisọs
14 Mgbọ ya Judas Isikariọt,
ene ge me lek akọp mè ene iba ebi udun̄ kè Jisọs onenisi lek ebi ibot ngwugwa,
15 mè isi ido ema ibe,
“Ìre keke ke enyi ebechieek inyinyi emi,
ire nleke Jisọs itap enyi me ubọk?”
Ife cha efufuk akọp ikpoko alata okuket itaa isibi isa inyi ọmọ.
16 Bene me mgbọ ya,
Judas obebene ikiweek mgbọ irek môsibibe inyi ọmọ ileke Jisọs inyi ebi ife cha.
Jisọs melek ebi udun̄ kan̄ mîrie inorie ijọk Iraraka
17 Me adasi usen eyi ijọk Fituru Kpunube Olat me lek,
ebi udun̄ kè Jisọs enenido Jisọs ibe,
“Ìre ere owa ke oweek ibe eji erọ inorie ijọk Iraraka enyi owu?”
18 Jisọs obebe ema,
“Ìje ìnin̄ emen ama Jeruselem,
ke enyi mêmun̄ ogwu enerieen̄ ge.
Ìtumu inyi ibe ke Ogwu Ijejeen̄ ìbe ke mgbọ kan̄ îkem;
ke ọmọ ìkiweek irerie ijọk Iraraka melek ebi udun̄ kan̄ me uwu kwun̄.”
19 Ebi udun̄ kan̄ cha erọrọ ike Jisọs otemebe ema,
mè irọ inorie ijọk Iraraka ya si.
20 Me otu ikakwun̄ usen ya,
Jisọs mè akọp mè ebi otuchieen̄ iba kan̄ cha ekwekweek irek me lek ikasi ikirie inorie ya.
21 Mgbọ ema ekirie inorie ya,
Jisọs onenitumu inyi ema ibe,
“Me atikọ,
ǹkitumu inyi enyi ibe ke ene ge me lek kinyi môleke emi inyi ekpan̄.”
22 Ejit îfieek ema enenen mgbọ ema enọbe ikọ ya.
Ema ebebene,
me ge me ge,
ikido Jisọs ibe,
“Okaan̄-ene,
ke ìkare emi ke okitumu wa?”
23 Jisọs ofọfọọk ibe,
“Ogwu ògọgọọk emi igbaan̄ ijiin̄ fituru me emen alala usun̄ ge môleke emi inyi ekpan̄.
24 Gwun̄ Ebilene môkwu mkpa kubọk egebe ibak ọmọ me emen Ikpa Mbuban.
Ire,
môfieek inyi ene ya ogwu môlekebe Gwun̄ Ebilene inyi ekpan̄.
Kè ònwọn ire kpememaman ene ya.”
25 Judas ogwu òboleke ọmọ ya onenido ọmọ ibe,
“Ogwu Ijejeen̄,
ke ìkare emi wa?”
Jisọs ofọfọọk ọmọ ibe,
“Iin̄,
owu gaalek osa otu kwun̄ itumu ma!”
26 Me irek inorie ya si,
Jisọs onenimọnọ fituru,
mè igbana,
mè ikpọkọ,
mè isa inyi ebi udun̄ kan̄,
mè itumu inyi ema ibe,
“Ìbọkọ,
mè ìtaka,
eyi ìre akpalek n̄a.”
27 Ikeya si,
ineniben ekpen̄ miin̄,
mè igbana,
mè ibene itap ema me ubọk,
mè itumu inyi ema ibe,
“Ìbọkọ ìnwọ,
enyi otutuuk ene.
28 Eyi ìre eje n̄a eyi esabe irọ inyan̄a-ibot Awaji onyan̄abe inyi ebilene inye.
Îre eje n̄a eyi egwookbe mije ibot owuwa ene,
inyi Awaji isa me ikeya itele ijo ebilene.
29 Me atikọ,
emi m̀kpayaka inwọ miin̄ ònan̄a me lek mfut gerep yi ofifi,
mege ire mgbọ emi melek kinyi mêkpọkbe inwọ eyi ayaya me emen mkpulu eyi Nte n̄a.”
30 Mgbọ ema eriebe inorie ya isan̄a,
ema ekọkọt okwa itọn̄ Awaji,
mè inan̄a isibi ije ifo inyọn̄ ogoon̄ Olifu.
Jisọs îtumu ibe ke Pita môjit ọmọ
31 Me ere ya,
Jisọs onenitumu inyi ema ibe,
“Me eririeen̄ keyi,
enyi otutuuk ene mêyat itele emi,
kubọk egebe me Ikpa Mbuban ibe ke Awaji ìbe,
“ ‘Mâkpan̄ ogwu òkpukpo arọọn̄,
urum arọọn̄ môyiyala.’b
32 Ire,
nsijomo me mkpa,
mâsi ikup me Galili iban enyi.”
33 Pita obebe,
“Ìrere otutuuk ene etetele owu,
emi m̀kpatele owu.”
34 Jisọs ofọfọọk ọmọ ibe,
“Me atikọ,
me eririeen̄ keyi,
sabum unọn obosan̄a amọn,
owu môjit emi mgbọ ita.”
35 Ire Pita okpọkpọk itumu inye si ibe,
“Emi m̀kpajit owu kubọk ge,
ìrere ebegbagbaan̄ emi melek kwun̄ ikpan̄.”
Inu yaage si ke otutuuk ebi udun̄ kan̄ kechilọ etumu.
Jisọs îriaak uriaak me Gesemeni
36 Me inyọn̄ ogoon̄ Olifu ya,
Jisọs onenisa ebi udun̄ kan̄ isi ere ekigwen Gesemeni,
mè ibe ema,
“Ìkup me ere keyi,
inyi ǹje ǹsi ere keyilọ ǹsi ǹriaak uriaak.”
37 Isasa Pita mè bọn ebirieen̄ iba kè Jebidi igbaalek kan̄ ije ifo isi sọnja.
Lek kan̄ osisisik enenen,
ibebene ikikup me uga ufieejit.
38 Itutumu inyi ema ibe,
“Ufieejit òkup emi me ejit îmin enenen ire lek môkọtbe ikpan̄ emi.
Ìkup me ere keyi,
mè ìgọọk emi ìkibem.”
39 Jisọs otetele ema,
mè ije ifo isi sọnja,
mè irọn̄ inyana me ijọn̄,
mè ikana isi ichit,
mè ikiriaak uriaak ibe,
“Jei,
Nte n̄a!
Ire ikup mfufet,
soso ben ekpen̄ ufialek yi san̄a emi me lek.
Ire,
nkeek kwun̄ irọ,
ikare me nkeek eyi n̄a.”
40 Inenigwu ikom inu me lek ebi udun̄ kan̄ ita cha,
mè inimun̄ ema ekilaak,
mè ido Pita ibe,
“Ìre keke orọ enyi kpekọt igọọk emi itop chieen̄ ukpọk ukpọk lek mbubak mgbọ ge gaalek?
41 “Ìkup me mbem,
mè ìkiriaak uriaak,
inyi enyi ekarọn̄ ìnin̄ me emen ntọ-mkpọ.
Mmun̄ ibe ke ekwukwu kinyi îbem lek me atikọ,
ire,
akpalek kinyi îwọ.”
42 Jisọs itutumu ikeya isan̄a,
itetele ema,
mè ije isi iriaak uriaak òso mgbọ iba,
ibe,
“Nte n̄a,
ire ìkakup mfufet ibe owu òben ekpen̄ ufialek yi òsan̄a emi me lek îtata ǹnwọnwọ,
nkeek kwun̄ irọ!”
43 Igwugwu ikom si inu me lek kiban̄,
mè inimun̄ ema ekilaak,
mije,
ilaak îtet ema enenen.
44 Itetele ema,
mè ikpọk ije isi iriaak uriaak òso mgbọ ita,
mè iriaak si otu uriaak yaage.
45 Mgbọ îgwube ikom inu me lek ebi udun̄ kan̄ ita cha,
inenimun̄ ike ema ekilaak,
mè ibe ema,
“Ìre enyi ekilalaak,
mè ikisiki efuuk ire mgbọ keyi?
Ìkpọ,
mgbọ ebeleke Gwun̄ Ebilene ikana itap me ubọk ebi ijo îkem.
46 Ìnan̄a ìkeke,
inyi eji eneje,
ke ogwu òboleke emi inyi ekpan̄ ore ogwulọ òkinu.”
Mîtet Jisọs
47 Jisọs òkitutumu ikọ ya me otu,
Judas ene ge me lek ebi akọp mè ebi udun̄ kan̄ iba cha,
okakana isibi,
ọmọ melek ogbogbo ebi ene ìkaan̄ m̀gbele mè oge akọn̄ me ubọk.
Ebi ibot ngwugwa mè ebi ugane ama eria ife cha ibe enetet Jisọs.
48 Sabum ema enire ere ya,
Judas îwuuk lek itumu inyi ema ibe,
ene geelek ọmọ môkanabe ikat,
ke ene ya ore ogwa,
mè ebibi etet.
49 Ema irere ere ya,
Judas okpọkpọ iraka isi ge igọọk Jisọs,
mè itọp ọmọ amọn ibe,
“Ogwu Ijejeen̄,”
mè ikana ọmọ ikat.
50 Jisọs obebe ọmọ,
“Une,
inu ya obenbe me ejit inu,
rọ ma!”
Ebi ife cha egbugbuku inin̄ lek kè Jisọs,
mè ikana ọmọ itet,
mè itet inye.
51 Mije keya,
ene ge me lek ebi ìkigọọk Jisọs me udun̄ otatap ubọk iwọọk oge akọn̄ kan̄ isibi,
mè ikep ogwu usun̄ ogwu òban Awaji,
mè ifieek utọn̄ agan̄ ge isan̄a me agba ibot ogwu usun̄ ya.
52 Jisọs otutumu inyi ogwu udun̄ kan̄ ya ibe,
“Yaka oge akọn̄ kwun̄ tap me emen ogan,
mije,
ogwu òkep oge ìbokwu me otu oge.
53 Ìre owu òkariọọn̄ ibe ke mâkọt igwen Nte n̄a mgbọ keyi,
mè Nte n̄a onyi emi ebi osat ìwawa iraka akọp mè urum iba,
inyi enetim akọn̄ me ibot n̄a?
54 Ire,
ire nnirọ ikeya,
ìre inu egebe me Ikpa Mbuban ìbojeje inirọ iso ike egebe ibe ke môrọ?”
55 Jisọs onenido ogbogbo ebi ife cha ibe,
“Ìre emi ìre ogwu òkichiin̄ inọ me afa,
eyi enyi esabe oge akọn̄ mè m̀gbele isibi inu ibenitet emi?
Usen geelek,
ke ǹkigọgọọk enyi ikup me Uwu Mbuban ikijeen̄ inu,
enyi kpetet emi.
56 Ire,
otutuuk inu chi ìkimọnọ irek isasa irọ inu ebi nriran egebe me Ikpa Mbuban iso.”
Mgbọ ya,
otutuuk ebi udun̄ kan̄ eyayat itele ọmọ,
mè ilibi inan̄a.
Mîsa Jisọs isi isi Oru ebi Ju
57 Ebi ìtetet Jisọs esasa ọmọ ije isi uwu kè Keyefas ogwu òban Awaji,
ere ebi ìjeen̄ Ikan mè ebi ugane ama etitiin̄be.
58 Pita okekije me ujọn̄ọ ere igọọk Jisọs me udun̄,
mè igọọk ije iraka inin̄ emen oyet egep ogwu òban Awaji,
mè isi igọọk ebi ìkibem ere isiki ikweek,
inyi ọmọ imun̄ inu cha geelek ire òta kan̄.
59 Ebi ibot ngwugwa mè otutuuk ebi Oru ebi Ju ekekiweek ataak ataak inu ata-ikọ ebesa itoon̄ Jisọs uraamọn,
inyi ekọt ekpan̄ ọmọ.
60 Ire,
kpekọt ikaan̄ geege,
ubọk geelek owuwa ebi ata-ikọ ataak enan̄abe isibi.
Me òta kan̄,
ene iba enenisibi inu,
61 mè initumu ibe ke ema mînọ Jisọs otumube ibe ke ọmọ môkọt igbugbọ Uwu Mbuban igwook,
mè isa egwe ita gaalek ikpọk inama isan̄a.
62 Mgbọ yaage,
ogwu òban Awaji onanan̄a ikeke,
mè ibe Jisọs,
“Ìre owu òkakaan̄ inu geege obofọọk?
Ìre keke ke ife chi ekitumu ikeme owu ikeyi?”
63 Ire,
Jisọs okpọkpọ iriaan̄ otu.
Ogwu òban Awaji obebe Jisọs,
“Me erieen̄ Awaji òkup me ugwem,
ire owu ore Karais ya,
òrere Gwun̄ Awaji,
tumu nyi eji mgbọ keyi.”
64 Jisọs ofọfọọk ọmọ ibe,
“Iin̄,
îre ikeya ubọk owu otumube.
Ire,
sọntiik mgbọ me isi,
enyi mêmun̄ Gwun̄ Ebilene osikibe ikweek irek me agan̄ ubọk ulom Awaji Ogwu Òkaan̄ Unye Geelek,
mè inan̄a me isinyọn̄ ikinu me emen oduku inyọn̄.”
65 Mgbọ ogwu òban Awaji onọbe ikọ ya Jisọs otumube,
isasa me unaan̄-ejit itaba ofọnti kan̄ igwak,
mè ibe,
“Ene yi îtumu Awaji ifiat!
Ìre kpasi ata-ikọ ke enyi eyaka ikiweek?
Ìre enyi otutuuk ene kpesa utọn̄ kinyi inọ ijo ikọ ya îtumube?
66 Nkeek kinyi ye?”
Otutuuk ene echechieek igwook ibe ke îgbe mkpa.
67 Ema ebebene ikicho ataak igwook ọmọ me isi,
mè ikisa akpọ igon ọmọ.
Usini ene ekekitap ọmọ ada me isi,
68 mè ikitumu inyi ọmọ ibe,
“Karais,
ben nriran nyi eji nu.
Ìre ekene osulu owu?”
Pita îjit Jisọs
69 Mgbọ Pita okupbe me emen oyet egep ya,
gwun̄ enenwaan̄ ge me lek ebi usun̄ ogwu òban Awaji onenije inu me lek kan̄,
mè ibe ọmọ,
“Ke owu melek Jisọs ogwu Galili ya ekije.”
70 Ire,
Pita okakan̄,
mè itumu me isi otutuuk kiban̄ inyi gwun̄ enenwaan̄ ya ibe,
“Emi ǹkariọọn̄ inu owu okitumu ikọ ibak,”
71 mè inan̄a me ere ya ije isi ikeke me otunchit.
Me ere ya,
ofifi gwun̄ enenwaan̄ ge omumun̄ ọmọ si,
mè itumu inyi ebi ìkup me ere ya ibe,
“Ene yi ìre ene ge me lek ebi ìkigọọk Jisọs ogwu Najeret me udun̄.”
72 Pita okpọkpọk ikan̄,
mè inyan̄a ibot ibe,
“Ǹkariọọn̄ ogwu enerieen̄ ya enyi ekitumu ikọ ibak.”
73 Sọnja mgbọ iraraka,
ebi ìkekeke me ere ya ejeje isi lek kè Pita,
mè itumu inyi ọmọ ibe,
“Me atikọ,
owu ìre ene ge me lek ebi ife cha,
mije,
ida usem kwun̄ îkpọk owu mbum.”
74 Pita obebene ikitap awọ inyi lek kan̄,
mè ikinyan̄a ibot inyi ife cha ibe,
“Ǹkariọọn̄ ogwu enerieen̄ ya.”
Mgbọ yaage,
unọn osasan̄a amọn.
75 Pita onenisi ikeek ikọ ya Jisọs otumube inyi ọmọ ibe,
“Sabum unọn ònosan̄a amọn,
owu môjit emi mgbọ ita.”
Inanan̄a ije isibi oyet,
me isi ikup ikito ujat ito.