ÉXODO
Egipto menuaxa Israel unibu tëmëra ñuikë bana
1
Ënëx ka Israel unibunën anë axa Jacobë Egipto menu bëba akama 'ikën, a unikamax ka achúshi achúshinëx aín aintsikama 'imainun aín xanu, aín bëchikë kamabëbi kuankëxa: 2 Ax ka 'iakëxa, Rubén, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad 'imainun Aser. 5 Usa 'ain ka Jacobnën rëbúnkikamax tupúnkëx setenta uni 'iakëxa. Ax pain kuan 'aish Josénëx Egipto menu tsótan.6 Usa 'ain ka José 'imainun aín xukë́nkamax, a menu pain tsótankëx ñuakëxa; 7 'aínbi ka Israel unikama atun 'aisamaira 'inun Egipto menuxunbi bëchipakëxa, usa 'aish ka atux 'aisamaira 'inun 'uakamë 'ëoi kushiirabu 'iakëxa. Usa 'ain ka atu xëshi a menu 'uakamë 'ëokëxa.
8 Usai 'itsa baritia anu Israel unikama tsókë 'aínbi ka Egipto menu bëtsi 'apu faraón kakin anëkë an José isama anu 'iakëa, usa 'ixun ka a ëmanu 'ikë aín aintsikama kakëxa: 9 Mitsúnbi kamina 'unanin Israel unikamax ka 'aisamaira 'inun 'uakamë 'ëoia usa 'aish ka nubë sënë́nma 'ianan kushiirabu 'ikën; 10 usa 'ain kananuna uisa karanuna ënë unikama oti 'ain kixun isti 'ain, nuxnu 'akanankëbë atuma abë nux 'akanankë bëtsi unikamabë amikatamëxun nu 'abiani ënë menuax abákania usa 'ain.
11 Usakin sinánxun ka Egiptonu 'ikë 'apun an ñu mëëia bërúanxun israel unikama timëti uni anëakëxa, anëkëxun ka a unikaman 'aisamaira okin ñu mëëmiakëxa. Usakin ñu mëëmikin ka Pitón 'imainun Ramsés kakë ëma aribia 'anun 'amiakëxa, ax ka anua Egiptonu 'ikë 'apun, anu piti bukúnti 'amikë 'iakëxa. 12 'Aínbi ka 'itsaira 'atima okankëxbi atiainra, 'aisamaira 'inun 'uakamë 'ëokëxa. Usai 'ikëbë ka egipcio unikamax atumi 'itsaira rakuë́akëxa.
13 Usa 'ain ka egipcio unikaman Israel unibu 'aisamaira okin ñu mëëmikin tëmëramiakëxa. 14 Tëmëramikin ka 'aisamaira ñu mënun 'amikin ami xuamati nishkin atu mëakëxa, 'imainun ka me tëi ladrillo 'ati mëskuti 'amianan, atun naënu 'ikë ñu mëëtiribi 'amiakëxa. 'Amikin ka Israel unikama atun 'atimaira okin tëmëramiakëxa.
Egipto menu 'ikë 'apu Israel unibunën bëbu bëchikë bakënia 'amiti kia bana
15 Usa 'ain ka Egipto menu 'ikë 'apu ax Sifrá kakë 'imainun Puá kakë abë banakëxa, ax ka hebrea xanukama an nachikitia 'akinkë xanu rabë́ 'iakëxa:
16 —Min hebrea xanukama bakënun 'akinkë 'ixun kamina isti 'ain, uisa tuá kara nachikitia xanu 'imainun kara bëbu tuá 'ia kixun. Xanu 'ikë kamina kanitanun ënti 'ain, bëbu tuá 'ia ¡kamina 'ati 'ain! 17 Usakian kakëxunbi ka an nachikitia xanukama 'akinkë Sifrá 'imainun Puá an Diosmi rakuë́kin 'apu faraónën kakësabiokin akinma bëbu tuákama kanitanun ëankëxa. 18 Usoia kuakin ka 'apu faraónën a xanu rabë́ kamiakëxa:
—Kamikëxa anu kuankë ka ësokin kakëxa. ¿Uisa kupín kaina bëbu tuákama kanitanun ënin? 19 Ësokian ñukákëxun ka kakëxa:
—Hebrea xanukamax ka egipcia xanusama 'ikë kixun xanu rabë́ an kakëxa. Usa 'aish ka atux kushiirabu 'aish nukamax nachikiminux nukukë 'aímabi atux pain bakënkë 'ia kixun.
20 Usai ka Israel unikama 'aisamaira 'inun 'uakamë 'ëokëxa, 'ianan ka 'aisamaira 'inun kamabi nëtën 'uákamë 'ëoi kushiirabu 'iakëxa. 21 Usaia 'iabi ka Diosmi rakuë́kin an xanu bakëmikë rabë́ an tuapatia aín aintsikamabëbi 'uakamë 'ëonun ëankëxa. 22 Usaia 'ikëbëtan a kuëënkinma faraónën, aín unikama kakëxa: Kamina Israel bëbu tuá bakënia bakami niti 'ain, nianan kamina xanu tuakamaishi kania 'uakamë 'ëotanun ënti 'ain.