—Min xukë́n Aarón kamina ësokin kati 'ain, bëtsi nëtë́an uisaxi anu 'ëx 'ikë upíira kakë chupa bëpankë a kaxú atsíaxma 'inun kanan kamina, bunántisa okin 'akë anun mapukë a 'urama oxuma 'anun kati 'ain, anu kuaníbi ka bamati 'ikën; 'ëx kana aín mapúti 'ikë anu kuin mëu mërati 'ain. 3 Aarónën ka upíira kakë anua 'ëbë banati anu atsínkin achúshi vaca bëna aín 'ucha kupí buánan achúshi carnero 'ë rabikin 'aímai këñutanun xaroti buánti 'ikën. 4 Usai anu kuankin ka aín tari upíira, sacerdotekaman pañukë chupa lino 'akë, 'anan ka a 'ukëmëu pañukë lino 'akë a 'imainun, anun tsitëkërëkiti 'akë anun tsitëkërëkianan aín mañuti akë aribi mañuax kuanti 'ikën. Ax ka chupa kata upíira a 'ikën, usa 'ain ka akama pañunux pain upiti nashiti 'ikën.

5 Usai 'itankëxun ka Israel unikama 'axúnti rabë́ chibu bitankëxun Aarónën atun 'ucha kupí 'axuanan ka achúshi carnero 'aímai këñutanun 'ë xaroxunti 'ikën. 6 'Atankëxun ka vaca bëna bëkë a aín 'uchakë kupí xarokësa 'inun 'anan ka 'ën aín 'uchakëkama mëníonan aín aintsi 'ibukaman 'uchakë kupínribi 'ati 'ikën. 7 Usakin 'atankëxun ka cabra rabë́ aribi, 'ë 'axunkin anun 'ëbë mëranani atsínti xubusa okin 'akë aín xëkuë ëman 'urama anuxun 'ati 'ikën; 8 'atankëxun ka ñuratsu amo rabë́bi kuënëoxun uimiu kara pakëtia isnuxun anun cabra rabë́ a tanti 'ikën: Uinu 'ikë ax kara 'ënan 'iti 'ikën 'imainun kara uinu 'ikë ax Azazelnan ikë isnuxun tanti 'ikën. 9 Usakin ñuratsukun tankëxa amioi kuënëokë pakëkë ax ka 'ënan 'iti 'ikën, a ka Aarónën kamabi Israel unikaman 'ucha kupí xaroti 'ikën; 10 aínbi ka ñuratsu ainan 'itanun 'akë ax amiki pakëkë ax ka Azazelnan 'iti 'ikën. A ka rëkëma asábi anun aín kata itsi upíira anu atsínkianti aín xëkuë a 'urama anu bëkë 'iti 'ikën, anu bëkë 'ain ka atun 'uchakama mëníokin anu 'aruia ka anu uni 'ikëma me anua Azazel kakë ñunshin 'atima 'ikë anu atun 'uchakama buani kuantanun xuti 'ikën.

11 Aarónën ka vaca bakë a rëtankëxun 'uchakama kupí xaroti 'ikën, usakin 'aia kana aín 'ucha tërëanan aín aintsi 'uchakamaribi tërëxunti 'ain. 12 'Atankëxun ka tasunsa okin 'akë anu 'arukin aín tsi ënxaira a kata itsi upíira anuax Nukën 'Ibubë banati anua biti 'ikën, bianan ka aín chimapu sanuira rënkë a mëkën rabë́ okin bixun mëskukin 'arubiankin anua kata itsi upíira 'ikë anun bëpankë chupa 'ukëmëu anu uanti 'ikën; 13 usakin 'axun ka kata itsi upíira kakë chupa këxtú a rapasu 'ikë tsísa anu 'ën istisabi okin uanxun ro sanuira a nanti 'ikën, usakin anu nankëx aín kuinan tëxëkirukin bunántisa kurin ratakakakin 'akë a mapukë 'ain ka. Aarón ñutima 'ikën.

14 Usakin 'atankëxun ka vaca bakë imi chukúmashi, aín mëkën mëpukankixun anun bunántisa okin 'akë aín mapúti ánskati 'ikën, 'anan ka aín 'ipitiu 'ikëishi ñuina imi anun ánskati 'ikën. 'Atankëxun ka mapai achúshi 'imainun rabë́ okin ñuina imin aín mapúti aín rëbumi 'ikë aribi ánskati 'ikën, 15 usakin 'atankëx anuax chikítankëxun ka chibu aribi Israel unibunën 'ucha kupí rëti 'ikën, rëkin aín imi 'itsamashi xampami bitankëxun ka kata itsi upíira a 'ukëmëu 'ikë chupan bëpankë a kaxú uantakëxun; anun bunántisa okin kurin ratakakakin 'akë aín mapúti kaxú 'anan aín rëbu vaca bëna imin 'akësaribi okin anun ánskati 'ikën. 16 Usakian 'akëxun ka kata itsi upíira a mëníokin anua ñu upíshi 'ati 'ikëbi 'aíma 'atima ñu 'ai 'uchakin Israel unikaman 'akëma 'imainun ñunshinakëkin ñu 'ai 'uchakë akama mëníoti 'ikën. Usaribi okin ka anuax 'ëbë banati xubusa okin 'akë atu nëbëtsi 'ikë ñu 'atima 'akëbëtan atun 'uchakaman 'atimokë 'ikëbi aribi mëníoti 'ikën. 17 Usakin 'anun 'ën kakëxun 'aia Aarón kata itsi upíira a 'ukëmëu 'imainun ka ax pain sënë́ntamainun uíxbi xubusa okin 'akë anu kuantima 'ikën. Usakin 'akin ain 'ucha 'imainun aín xanu aín bakë bëchikë kamanan 'imainun kamabi Israel unikaman 'ucha mëníotankëx, 18 chikíkiani kuanxun ka anuxun ñuina 'ë xaroxunti aribi mëníoti 'ikën. Vaca bëna aín imi 'imainun chibu imi a chukúmashi bitankëxun, ka anun i vaca manchansa okin 'akë aribi 'anan anuxun ñuina xaroti 'akë aribi buinarakin anun shiti 'ikën, 19 'anan ka mëkën rëbun imi bikë ami pukatankëxun anun mapai 'imainun rabë́ okin anuxun ñuina xaroti a ánskati 'ikën. Usakin 'akin ka 'atima ñuishi 'akian Israel unikaman tsáimikë a upí 'itánun mëníoti 'ikën.

20 Usakin anuax 'ëbë banati xubusa okin 'akë a mëua 'ikë upí kakë akëñun anuxun ñuina xaroti akama pain mëníokin sënë́ontankëxuan Aarónën, chibu rëkëma a bitánun kakëxun bitsínkin, 21 bëkëbëtan ka ñuinanën maxkánu aín mëkën rabë́ nankin, kamabi Israel unikaman bana kuakinma ñu 'atima 'akë 'imainun atun 'uchakama ami chikínati 'ikën. Usakin 'akëx ka chibun maxkánu a 'uchakama bërúti 'ikën, usakin 'axun ka achúshi uni anu uni 'ikëma menu buanxun ëntanun kati 'ikën. 22 Kakëxun uanxuan ënkëx anu uni 'ikëma menuax kuani nëtë́kiankin ka chibu an Israel unikaman ñu 'atima 'akë anu uni 'ikëmaira me ruá panákë anuira buánti 'ikën.

23 Usakin 'atankëx xubusa okin chupa 'akë anu atsínuxun ka Aarónën kata itsi upíira kakë anu atsínuxuan pañukë lino 'akë aín chupa a pëtankëxun anubi nanti 'ikën. 24 Usakin 'atankëx ka xubusa okin 'akë anua 'ikë 'umpax anunbi nashianan aín chupa itsi pañutankëx anuax chikixun aín ñuina a pain aín 'ucha kupí 'atankëxun Israel unikamanan aribi 'axúnti 'ikën, usakin 'akëbë ka ain 'uchakama tërëanan Israel unikaman 'ucharibi tërënxunkë 'iti 'ikën. 25 'Imainun ka atun 'ucha kupí xarokë ñuina aín xëni aribi anuxun ñuina xaroti 'akë anuxunbi xaroti 'ikën; 26 usokin 'amainun ka uin kara anu uni 'ikëma me anua Azazel 'ikë anu chibu ëbëtsinkë uni axribi aín chupa chukanan upiti nashitankëx anua 'ikankë anu atsínti 'ikën.

27 Usakin 'atankëxun ka vaca bakë 'imainun chibu atun 'ucha kupí xaronan, aín imi kata itsi upíira kakë anu atun 'ucha tërënxunun buánkë a, ka bibiankin buánxun anua 'ikankë a urinxun aín ñukama aín xaká aín puku 'imainun aín nami tukapakë a kamabi xaroti 'ikën. 28 Xarotankëx ka uni an ñuina nami xarokë ax 'umpaxan nashianan aín chupa chukatankëx, anua 'ikankë anu kuantëkënti 'ikën.

29 Ënëx ka achúshi bana ax kikësabi oi mitsux 'iti bana 'iti 'ikën: mapai achúshi 'imainun rabë́ 'uxë 'irukë anúan mapai rabë́ sënë́nkë nëtë anun kamina mitsux ñu pima samáti 'ain, 'imainun kamina mitsun ñu mëtikamaribi a nëtën 'atima 'ain, usakin mitsun 'akëbëtan ka axa mitsubë tsókë bëtsi menu 'ikë unikaman usaribi okin 'ati 'ikë, 30 usakin 'akëbëtan a nëtënbi mitsun 'uchakama 'ën tërënxunkëbë ka a ñukama mëníokin tërënxukë 'aish atux upí 'iti 'ikën. 31 Ax ka a ënima xënibua 'aínbi ax kikësabi oi 'iti bana a 'ikën: ax ka achúshi nëtë upíira mitsunan anun ñu pima tanti samáti nëtë 'iti 'ikën.

32 Usa 'ain ka sacerdotenën bëchikë aín papan 'akësaribi okin kaísun anëkë an ishi, usakin 'ati bana kikësabi okinshi atun 'atimakëkama tërënxunun 'ati 'ikën; 'anuxun ka aín chupa lino 'akë sacerdotekaman pañukë a pañuti 'ikën. 33 Usai mëníokatankëxun ka kata itsi upíira upí kakë a mëníonan xubusa okin chupa 'akë aribi 'anan anuxun ñuina xarokë aribi mëníoti 'ikën, 'usakin 'akëbëtan kana sacerdotenën 'atimakëkama 'anan kamabi unix 'atimakëkama tërënti 'ain.

34 Ënëx ka uínsaranbi ënimami ax kikësabi oi mitsux 'iti achúshi bana 'iti 'ikën: usa 'ain ka achúshi achúshi baritia 'irukëbëtan a sinánkin ënë bana kikësabiokin Israel unikaman aín 'ucha tërënun 'ati 'ikën.

Usakin anua Nukën 'Ibun Moisés kásabiokin ka usakin 'akëxa.