Anuax Nukën 'Ibubë mërananti xubu ñuikë bana
40
16 Uisakin kara Nukën 'Ibun kaia usakinbi ka kamabi ñu Moisésnën 'akëxa. 17 Anúan Egipto menuax chikíkë achúshi bari këñutankëxa rabë́ bari 'inux 'irukë a 'uxë achúshi nëtë 'ikëbëtan ka anuax Diosbë banati xubu chukúma 'akankëxa. 18 Usa 'ain ka Moisés 'imainun Israel unikaman Diosan kakësabiokin anuax abë banati 'akin, ami puruti i kamapain nitsintankëxun, aín 'irakanti akamaribi 'atankëxun aín ikamaribi puruakëxa, 19 purutankëxun ka chupasa okían 'akë anun aín manámi mapuakëxa, aín namëkama axa mapukë 'itánun, usakin Nukën 'Ibun 'anun kakësabiokin ka anuax abë banati 'akëxa.20-21 Usakin akamapain sënë́ontankëxun ka Moisésnën ax kikësabi oi 'iti bana kuënëokë maxá pará rabë́ a bunántisa kurin ratakakakë mëu 'aruakëxa; 'arutankëxun ka bunántisa kurin ratakakakë aín ñaruantikama 'akëxa, 'imainun ka aín maputiribi 'atankëxun xubu chatani aín kata upíira a 'ukëmëu uankëxa; uanxun ka chuparibi bunántisa kurin ratakakakë axa 'ukëmëu 'inun nëbëtsin amo rabë́ 'itanun bëarakin bëpankëxa; Nukën 'Ibun usakin 'anun kakësabiokin ka 'akëxa.
22 'Atankëxun ka anuax Nukën 'Ibubë mërananti xubu chukúma okin 'akë anu pain atsínti anu mesa achúshi nankëxa ax ka aín tsipumiu chupa bëpankë a 'uri nankë 'iakëxa. 23 Anu ka pán Diosan ka nun piti cha 'inania kixun 'unántiokin nankëxa, usakin 'anúan Nukën 'Ibun kakësabiokin.
24 'Atankëxun ka anu pain atsínti anu tirí nanti xubusa okían 'akë 'ukëmëu anua mesa nankë a bëtánain aua bari urukë upíira kakë anu nankëxa, 25 'atankëxun ka anupain atsínti anu tirícha kurin 'akë, axa siete lamparínñu 'ikëa nanti xubusa okían 'akë 'ukëmëu anua mesa nankë a bëtanain aua bari urukë upí kakë anu nankëxa. 26 'Atankëxun ka kuri 'akë anuxun sanuira ñu xaroti aribi xubusa okin 'akë 'ukëmëu kata itsi, upíira kakë chupan bëpankë anu nankëxa, 27 anuxun ka tsëpasa ro sanuira xarokëxa, Nukën 'Ibun 'anun kakësabiokin.
28 Usakin 'atankëxun ka Moisésnën anun upíira kakë anu atsínkiantinu chupa an bëpanti tëkërë kamiakëxa; 29 'amianan ka anuxun ñuina xarotia 'amikë manë uxua 'akë aribi, anun xubusa okin 'akë upíira upí kakë anun atsínkianti aín xëkuë 'urama ëman nankëxa, anuxun ka ñuina xaronan ñu bimi upíirabu xarokëxa Nukën 'Ibun usakin 'anun kakësabiokin.
30 Usakin 'amianan ka ëman anuxun ñuina xarotia 'amikë manë uxua chookin 'akë aribi anun xubusa okin 'akë upíira kakë anu atsínkianti aín xëkuë 'urama nankëxa, nanxun ka anun mëchukati 'umpax anu buákakëxa. 31 Anua ka Moisés, Aarón 'imainun aín bakë bëchikëkaman anun mëchukanan tachukati 'umpax biakëxa. 32 Anun ka uínsaran kara xubusa okían 'akë anu atsímianan, anuxun ñuina xaroti 'akë a 'urama oia anun ka 'umpax a bitankëx chukakëxa, usaía 'inun Nukën 'Ibun Moisés kakësabi oi.
33 Usokin pain kamabi 'amitankëxun ka Moisésnën xubusa okin 'akë a 'imainun, anuxun ñuina xara otia 'akë rapasu me mëníokë a chupan buinarakin anun atsintinu 'ikë a bëararákëxa.
Xubusa okin chupa 'akë ain kaxunu kuin 'ia bana
Usokin ka Moisésnën xubusokin anua Diosbë banati a këñuakëxa, 34 këñúkë ka kuinan xubusa okin chupa 'akë anu 'ibúkin mapumainun ka Nukën 'Ibun kushin 'ain namë anu ichúkin tsitsiarakëxa. 35 Usakian xubusa okin 'akëa anu 'ibúti tsóbukin kuinan mapukë 'ain ka, Moisés anu atsíama 'ikën, Nukën 'Ibun kushian aín namë upí kakë a tsitsiarakë 'ain.
36 Usai xubusa okin chupa 'akë anu, 'ibútankëx kuin manámi niruia iskin ka Israel unikaman xubusa okían chupa chukúmokin atux anu 'iti 'akë a mëniobiani anua 'ikë anuax kuankëxa, 37 'aínbi ka uinu kara kuin nirakëtia anu nirakëtankëxun kuin nirukëmapain 'ain, Israel unikamanribi atux anu 'ikë anuax kuanuxun kuin niruiapain kainkin anua 'ikë a mëniomapan 'ikën. 38 Munu 'ikiania Israel unikama kuankëbë ka xubusa okin 'akë aín manámia kamabi nëtën kuin 'ibútia isakëxa, 'imainun ka kamabi imë́ribi kuin 'ibúkë anu tirí chaiira atux anu 'ikë abi pë́kai mërakëxa, usakin ka Nukën 'Ibun Israel unikama 'akiankëxa anuishi.