15 A nëtë́an xubusa okin chupa 'akë a sënë́onkë a nëtënbi ka manámiax ubukin Diosan amikëxun kuinan a xubu mapuakëxa, mapukëx ka pëkaratamainun usai 'iakëxa. 16 Usakin ka kamabi nëtën kuinan xubusa okin 'akë a mapuakëxa: usa 'ikë ka imë́ribi tsi rëkirukësa 'ixun kuinan mapukë Israel unikaman isakëxa. 17 Uisaran kara xubusa okin chupa 'akë aín kaxunuax kuin niruia anun ka Israel unikamax mëníokakiani anua 'ikë anuax kuani uinu kara kuinsa ax nirakëtia anubi Israel unikamax anu 'i nirakëakëxa. 18 'Imainun ka uínsaran kara Nukën 'Ibun atu kuanun kaia a nëtën kuni kuanux anu pain 'i bërukankëxa, anuax kuinsa nirakëkëbë anu pain i bërúakëxa. Anu ka uiti nëtë kara 'iti 'ikë, ati nëtë xubusa okin chupa 'akë anu kuin 'iakëxa. 19 Kuin axa xubusa okin 'akë anu pain basi 'ikëbë ka Israel unikamax kuaníma anu pain bukuxun Nukën 'Ibu Dios rabikankëxa. 20 Kuin axa xubusa okin 'akë anuax 'itsama nëtë́ishi 'inun Diosan 'imitankëxua anuax kuanun 'imikëbë ka Israel unikama a nuibiani kuankëxa, kuaníbi ka kuin axa Diosan nirakënun 'imikëbë atúxribi nirakëakëxa. 21 'Imainun ka 'ikatsi imë́ nirakëónxa, pëkarakëbë kuin ax kuankëbë nirukiani Israel unikamax kuankëxa. Usaia imë́ 'ikësairibi nëtën 'ikëbë ka a isbiani atúxribi kuankëxa. 22 Kuin axa xubusa okin chupa 'akë anu nirakëti 'itsama nëtë 'ianan, achúshi 'uxë 'ikatsi 'ianan achúshi baritia 'ikatsi nirakëtankëx kuankëbë ka Israel unikama atux pain rëkuë́nkianima anu pain 'i bërúakëxa. 'Aínbi ka kuin axa kuankëbë kuni atúxribi a nuibiani kuankëxa. 23 Nukën 'Ibun ka kuantima 'ikë kixun nirakëmikëbë bërúanan ka kuanti 'ikë kiax kikëbë kuni kuankëxa. Aínbi ka Diosan kuin 'ianan tsi rëkirukësa a kuanun 'imikëbë atúxribi kuankëxa, 'aínbi ka uinu kara kuin nirakëaxa anuxun Dios rabiakëxa, usakian Israel unibu kanun Moisés Nukën 'Ibun kásabiokin 'akëxa.