DEUTERONOMIO
Moisésnën ashikin Israel unibu usai bëráma 'ikan bana ñuixuntëkëan
1
Ënë banakama ka Moisésnën kamabi Israel kama anu uni 'ikëma me amiaxa bari urukë Jordán kakë baka anuxun ñuixuankëxa, ax ka anua uni 'ikëma me Arabá kakë Suf kakë a 'ukëmanan anu 'iakëxa, ax ka Parán, Tófel, Haserot 'imainun Dizahab kakë anu 'iakëxa. 2 Aín bashi Sinaí anuax kuantankëx Cadés-barnea kakë anu bëbai kuani kuanti ka mapai rabë́ 'imainun achúshi nëtë niti 'iakëxa, ax ka anun Seír kakë me 'ikëbia Edom kakinribi anëkë me anu kuanti bai a 'iakëxa. 3-4 Treinta 'imainun nueve baritia 'itankëxa cuarenta baritia 'irukë anua atux nitsi në́a a sënë́nkëbëa mapai rabë́ 'imainun achúshi 'uxë 'irutabakëbëtan ka Israel unikama kakëxa, Moisésnën ka ënë banakama kaisama pain 'ixun abë 'akanankin Sihón kakë amorreo unikaman 'apu axa Hesbón menu tsókë a 'imainun, Og kakë axa Bazán menu 'ianan Astarot kakë ëmanu tsókë ax ka Edrei kakë me anu 'iakëxa. Usa 'ikë ka Moisésnën Israel unikama Nukën 'Ibu usai atux 'itia kanun kakë a banakama kakëxa. 5 Moisésnën ka amiaxa bari urukë Jordán kakë baka anu 'ikë Moab kakë me anuxun Israel unikama usaía 'iti banakama ñuixunkin kakin pëuakëxa:6 Nukën 'Ibu Diosan ka aín bashi Sinaí kakë anuxun ësokin nu kakëxa: Mitsux kamina 'itsa baritia 'imi aín bashi tanain ënu 'ian. 7 Usa 'ain kamina mitsun ñu mëniobiani anua amorreo unikama 'imainun a 'urama 'ikë unikaman me anuribi kuanti 'ain: Ax ka Arabá kakë me 'imainun bashiñu me 'imainun, me sapankama 'ianan Négueb kakë me 'imainun parúmpapa chá aín kuëbí anua cananeokama 'ikë a këñunbi Líbano, anuxunbi chaiira baka Éufrates kakë akamabi bitsiküanti 'ain. 8 'Ën kana a mekama mitsu 'inánuxun sinánkën; usa 'ain kamina kuantankëxun a mekama biti 'ain bikëkana 'ën mitsun bikë kuati 'ain, ax ka mitsun chaitiokëkama sinanatëkëntima okin 'inánuxun 'ën ka a 'ikën, akamax ka Abraham Isaac 'imainun Jacob aín rëbúnkikama 'inánuxun ka me a 'ikën.