—Aín bashi Abarim kakë anu mapërakëtankëxun kamina anuxun 'ën Israel unikama 'inánti me a min bërúnbi isti 'ain. 13 Usakin a mekama istánkëx kamina min xukë́n Aarón 'iásaribiti ñukiani kuantankëx min chaitiokëkaman raraitsibë min raraitsi biranani kuanti 'ikën, 14 mi rabëtan kamina 'ën kakësabiokin 'akinma, anu uni 'ikëma me Sin kakë anuxun israel unikaman 'umpax ñui bënëkin ñukákëxun atun ismainun 'ën kakësabiokin 'ama 'ain. (Ënëx ka Meribá kakë 'umpax Cadés kakë ëma, anu uni 'ikëma me Sin kakë anuaxmi 'ia a 'ikën.) 15 Usakian kakëxun ka Moisésnën Nukën 'Ibu kakëxa:

16-17 —Dios 'imainun 'ën 'Ibu, min kamina kamabi uni tsónun 'imin, usa 'ain kamina min achúshi uni ain 'apu 'ixúan, an min kaískë unikama an bëruánti uni 'aíma aín ñuina 'arakakë kuaínbëkini nikë usai 'itima kupín an bërúanti anëti 'ain. 18 Ësokian kakëxun ka Nukën 'Ibun Moisés kakëxa:

—Josué Nunnën bëchikë ax ka achúshi uni upí sinánñu 'ën kaískë 'ikën. Usa 'ain kamina aín maxkánu min mëkën nankin kati 'ain. 19 Nankin anëtankëxun kamina sacerdote Eleazar anu unikaman ismainunbi uantankëxun, aín ñu mëëti 'anun kamabi unin ismainunbi 'inánti 'ain; 20 'inánkin kamina minmi 'akësaribi okin 'anun kati 'ain, usa 'ain ka kamabi Israel unikaman an kakësabiokin aín bana tankin 'ati 'ikën. 21 'Aínbi ka Josuénëx sacerdote Eleazar anu pain kuanti 'ikën, Josué axa anu kuankë 'ain ka Eleazarnëx an kakësa 'itánun Urim kakë ñu anun aín anë ñui 'ëbë banati 'ikën. Usakin 'akëxuan Josuénën kakëxun ka Israel unikama añu 'anun kara kaia akama 'ati 'ikën. 22 Usakin 'anuan Nukën 'Ibun Moisés kakësabiokin ka 'akëxa. 'Akin ka Josué sacerdote Eleazar anu uantakëxun kamabi unían ax ka 'apu anëkë 'ikë kixun isnun 'unánmiakëxa. 23 Unamikin ka axa 'apu 'inun aín maxkánu mëkën nankin Nukën 'Ibun Moisés kásabiokin 'akëxa.