24
Usa 'aínbi ka Balaamnën Nukën 'Ibun iskëxa an Israel unibu upíokin sinánxunkë ax asábi 'ikë 'unánkëxa, usa 'ain ka amiribishi nëtë itsin kuakësa okin Diosan usaía 'iti ñukama ñuikin kakëxun kuatëkëni kuanma 'ikën, kuantëkënkima ka anuxunbi anu uni 'ikëma me ami bësukinshi isakëxa. 2 Usakian Balaamnën Israel kama anu 'ikë anua ain aintsibë aintsibë bukukë a iskëbëshi ka Diosan bëru ñunshin anu uakëxa; 3 'ai anu 'irukëbë ka Balaam ësai kiakëxa:'Ëx kana Balaam Beornën bëchikë 'ain, usa 'ixun kana Diosan kara uisai kinun 'ë kaia unánan upíokin añu kara 'ia akama 'unánkë uni 'ëx 'ain,
4 usa 'ixun kana 'ën Diosan bëru ñunshinan 'ë 'unánmikëxun upíokin unánkin 'aia ka Dios kushiira kushi an 'ë namákësa okin ismianan ain banaribi 'unánmia.
5 ¡Jacobnën rëbúnki, mitsun xubusa okin chupa këxtú 'akë akamax ka upíira upíbu 'ikën! ¡Israel unibu anu mitsux 'ikë axribi ka upíira 'ikën!
6 Usa 'aish kamina ënën menma kuani sëtë́kë xëbin iskësa 'ain, 'ianan kamina achúshi naë baka 'urama 'ikënu ñu 'apákësa usaribi 'ain, 'ianan kamina unin 'apákëxa áloes kakë i Nukën 'Ibu 'apákë uábukë upíira iskësa 'ain, ¡'imainun kamina kunxan i upíira baka kuëbí nikë iskësa usaribi 'ain!
7 Israel unibunëx ka a xëati 'umpax 'itsairañu 'ianan anun atun ñu 'apákë chabótiñu 'iti 'ikën. 'Imainun ka ain 'apu ax ka Agagbëtan sënë́maira 'iti 'ikën; a 'apu aín kushi ka chaiira 'iti 'ikën.
8 Dios an Egipto menua chikinbëtsikin atu bëa ax ka atun Dios 'ikën, usa 'aish ka vaca ain bënë raëkëma manchañu aín kushisa 'ikën. Usa 'ixun ka Israel unibunën axa ami nishkë unikama ñuina raëkëman nami pikësa okinshi abë 'akanankin; kupitanuma aín pian 'akin këñuti 'ikën.
9 Ax tanti rakábukë ka paru inuán tanti rakábukë usaribi 'iti 'ikën: usa 'ikë ka uínbi atu an 'akaskëxuma ubíotima 'ikën. ¡Chúamarua ka uikaman kara atu nuibatia akamax 'iti 'ikën, 'imainun kara uin atu uxkë ubioti kuëënti 'it! ¡Uin kara mitsu nuibatia ax ka chuámarua 'ianan upíokin sinánxunkë 'iti 'ikën, 'imainun ka uin kara mitsu 'atima oia axribi 'atima okë 'iti 'ikën!
Balaam usaía 'iti ñukama ñui kia bana
10 Usai kikëbëtan aín sinan xuáma tani nishkin aín mëkën kushioi mëtashki 'ikin ka Balacnën ñúkakin Balaam kakëxa:
—'Ën kana mi kamian 'ë 'ai ukë unikama 'aisamaira iskin 'atimokin sinánxuni unun kixun, 'aínbi kamina achúshi 'imainun rabë́ okin 'akinbi atu upíokin sinánxuan. 11 ¡Usa 'ain kamina min xubunubi kuanti 'ain! 'Ën kana uisa ñu kaina kuëëni akamabi mi 'inánti sinánkë 'ian, 'aínbi ka Nukën 'Ibun usakinmi 'ati mi sinánxunkëma 'ikën. 12 Ësokian kakëxunbi ka Balaamnën kakëxa:
—'Ën kana 'ë binunmi xukë unikama ësokin mi kai unun kamian, 13 minmi anumi 'ikë 'apun xubu anu 'ikë kuri 'imainun kuríki kamabi 'ë 'inánkëxunbi kana Nukën 'Ibun kakësama okin ñu upí 'anan ñu 'atima 'akin uibi 'ëx kuëënkësokin 'atimotima 'ain, usa 'ain kana Nukën 'Ibun kakësabiokinshi 'ati 'ain kixun kana mi kamian. 14 Asabi ka usa 'ain kana 'ën menubi kuanti 'ain; 'aínbi kana kuanuxun pain ësokin mi kain, uisai kara a unikamabë min rëbúnkikama 'inuxun 'aia. 15 Usa 'ain ka Balaam banai usai 'iti ñukama ñui kiakëxa:
'Ëx kana Balaam Beornën bëchikë 'ain, usa 'aish kana ënë banakama ki kísatanin 'ën kana uisai kara ñu 'iti 'ikë isanan upíokin 'unánin,
16 usa 'ixun kana Diosan bëru ñunshinan 'unánmikëxun upíokin 'ën an 'akësaribi okin ñu 'unánin, usa 'ikë ka an namámikësa okin ismianan añu kara 'iti 'ikë a uni ñuixunun 'ë 'unánmia.
17 Diosan 'ë ismikë ñukama ax ka 'isama pain 'ikën, usa 'ikë kana 'urakëo ñu iskësokin 'ën isin: ax ka Jacobnën rëbúnkinuax achúshi 'ispa chikíkësa 'aish an Israel kama 'akinti 'apu 'iti 'ikën. An ka Moabnu 'ikë unikama kupitanunma 'anan Setnën rëbúnkikamaribi kupitanunmashi 'ati 'ikën.
18 'Anan ka Edom menu 'ikë unikamaribi 'ati 'ikën, 'akin ka anua axa ami nishkë unikama tsókë Seír kakë me aribi 'ibuakin biti 'ikë, usakin Israel unibunën 'aia ka bëtsi menu 'ikë unikaman kuati 'ikën.
19 Jacobnën rëbúnkinuax ka achúshi uni an kamabi uni abë 'akanankin kanantankëxun axa aín ëmanu bërukëkamaribi këñukin 'ati 'ikën.
20 Ësai kitankëx ami bësukin Amalecnën rëbúnkikama isi ka Balaam ësairibi kiakëxa: Amalec ax ka achúshi ëma chaiira 'aish kushiira 'ikën, usa 'ikëbi ka ami nishkë unikaman këñukin achúshirabi bërutanuma atu 'ati 'ikën.
21-22 Kitankëxun quenita unikamaribi isi ka ësairibi banai kiakëxa: Caínan rëbúnkikama ax ka: amia katamëti upíokin 'akin, maparanu 'isakan aín na unëkin 'akësa atun xubu 'ikën, 'aínbi ka ain na ax tsin rëkirukin këñúkë usa 'itánun Asiria unibunën 'akin atu biti 'ikën.
23 Usai kitankëx sënëni ka ësai kiakëxa: ¿Uix kara bamakëma 'ikë ax kara Diosan usakin ñu 'akëbë anubi tsóti 'ik?
24 Chipre kakë me aín nasí anuax aín manë nuntin ukin ka suntárukama Asiria 'imainun Éber aribi këñukin 'ati 'ikën.
25 Ësai ki sënë́ntankëxa Balaam aín xubunu kuantamainun ka. Balac axribi aín xubunu kuankëxa.