23
Istánkëxun ka Balaamnën kakëxa:—Ënu kamina mapai achúshi 'imainun rabë́ okin maxá, maburukin anuxun ñuina xaroti 'ë 'axunti 'ain. 'Atankëxun kamina mapai achúshi 'imainun rabë́ vaca bëna 'imainun mapai achúshi 'imainun rabë́ carneroribi 'ë mëníoxunti 'ain. 2 Usakian Balaamnën anun kakëxun ka Balacnën anuxun ñuina xaroti 'atankëxun a rabë́xunbi vaca achúshi këñun carnero achúshiribi rëtankëxun xarokëxa. 3 Usakin 'aia ka Balaamnën Balac kakëxa:
—Anu ñuina xaroti 'akë ënuxunbi kamina Nukën 'Ibun kara 'ë uisokin kaia kuatamainun kaínti 'ain. Kuabëtsini uxun kana uisakin kara 'ë kaxa a mi kati 'ain.
Balaamnën Israel unikama upíokin sinánxuan bana
Kaxun anu ëbiani ka Balaam anu uni 'ikëma matán menu kuankëxa, 4 kuankëbëa ami mëratia ka Balaamnën Dios kakëxa:
—'Ën kana mapai achúshi 'imainun rabë́ okin maxá bukúnrutankëxun anu achúshi achúshi vaca bakë 'imainun achúshi achúshi carnero xaronun 'amian. 5 Ësokian kakëxun ka Nukën 'Ibun usakian katánun kixun. Balaam kakëxa:
—Amiribishi anua 'ikë anu kuanxun kamima 'ën mi kakë banakama a Balac kai kuanti 'ain.
6 Kakëx kuankinbi ka Balaamnën anuxun aín ñuina xarakë a rapasubia Balac abëa ukë moabitas uni aín kushi kamabë nikë mërakëxa. 7 Mërai ka ësai Balaam kiakëxa:
“Amiaxa bari urukë matá me Aram kakë anuabi ka Balac Moabnu 'ikë 'apu an unun kixun 'ë kamiaxa Kamikëx kana uan, israel unikama kamina 'ë uisai kara 'isa tania usaía 'itánun 'ë 'atimakin sinánxunti 'ain, usa min okëx ka Jacobnën rëbúnkikama 'atimokë 'iti 'ikën, —kixun ka 'ë kaxa.
8 Uisa ¿ixun karana Diosan 'atimakin sinánxunkë 'ikëmabi 'ën 'atimakin sinánxunti aín? ¿Uisaxun karana Nukën 'Ibun 'atima oiamabi 'ën atu 'atima oti 'ain?
9 Anua mapara chaiirabu bukukë ënuxunbi kana isti 'ain, 'imainun kana matá me ënuxunbi isin: Atux ka bëtsi menu 'ikë unikamabë mëskuax tsótima atúxbi upitax bukuia.
10 Usa 'aish ka masi bëru iskësaira 'ikën; ¿Uin kara atu tupúnti 'ik? ¿Uin kara uiti 'itsaira kara atux 'ikë kixun 'unánti 'ik? ¡'Ëx ñukë ax ka ñu 'atima amaxbia a unikama ñukësaribi 'iti 'ikën, usa 'aish kana atux 'ikësaribiti 'ëx ñuti 'ain!”
11 Usai kia kuankin ka Balacnën ami nishkin Balaam kakëxa:
—¿Añu karamina 'ain? 'Ën kana minmi axa 'ëmi nishkë unikama 'atima okin sinánxunun mi bëan, 'aínbi kamina min upíokin sinánxuan. 12 Ësakian kakëxun ka Balaamnën kakëxa:
—'Ën kana mi kan uisakin kara Nukën 'Ibun 'ë kaia kuatankëxun mi kaxun.
13 Usai kiabi ka Balacnën amiribishi katëkëankëxa:
—Amanuribi 'ëbë kuanxun, kamina anuxun anua 'ikankë a kamaira iskimabi aín kuainakëkë ashi isti 'ain. Anuxun iskin kamina 'atima okin atu sinánxunti 'ain. 14 Ësakin kabiankin ka Balacnën Balaam anua Sofin, kakë me 'ikë aín bashi Pisgá a manámi anu buánxun mapai achúshi 'imainun rabë́ maburukin maxá, 'atankëxun anuxun vaca bakë achúshi 'imainun carnero achúshiribi anuxun xaroti 'akë achúshi achúshi rëtankëxuan xaronun 'amitëkëankëxa. 15 Anuxun ka Balaamnën Balac kakëxa:
—Anuxun ñuina xarokë ënuxunbi kamina Diosan kara uisokin 'ë kaia kuatamainun kaínti 'ain.
16 Kabiania kuankëbë ami chikirakëtëkënkin ka Nukën 'Ibun Balaam usakian Balac kati bana kakëxa. 'Imainun ka ësokinribi kakëxa:
—Anua 'ikë anu kuantankëxun kamina Balac 'ën mi kakësabiokin kai kuanti 'ai kixun ka kakëxa.
17 Kakëx anuaxa kuankë anu kuantëkënkin ka Balaamnën anuxun ñuina xarokë rapasu Moabnu 'ikë aín kushi kamabë nikë Balac mërakëxa. Mërakëxun ka Balacnën ñukákëxa:
Balac Sipornën bëchikë 'ën mi kamainun kamina upíokin kuati 'ain.
19 Dios ax ka nusama 'ikën: ax ka këmëi bananan bëtsi okin sinántëkëkini kima. Uisa ñu 'akatsi kara ax kia a ka asérabi 'aia. Uisa ñu 'anux kara kiáxa a ka asérabi ax kikësabiokin 'aia.
20 Diosan ka Israel unikama upíokin sinánxunun 'ë kaxa: Usa 'ain kana Diosan upíokin sinánxunia 'ën usama ka kixun katima 'ain.
21 Uínbi ka paránani 'atimonania Israel unibu Jacobnën rëbúnkikama iskëma 'ikën. Usa 'ain ka Dios atubë 'ikën, usa 'ikë ka atun 'apusa 'ikë rabia.
22 Dios an Egipto menua atu chikínbëtsinkin bëa ax ka, vaca aín bënë raëkëma aín kushisamaira atunan 'ikën.
23 Jacobnën rëbúnki Israel unibukama ka ñunshinan aín kushin 'anun 'amikëxunbi uisabi otima 'ikën; Israel unibu ka ñubë́ unikaman uisabi oima. ¡Usa 'aish ka bërí Israel unikama ësakin kaisa 'ikën Uiti ñu upí ishi kara Diosan mitsu 'axuanxa kixun!
24 A unikamax ka paru 'inuánëxa aín piti ñuina binuxun bari rakábutima nikë usaribi 'ikën. Usa 'ixun ka usaribikin Israel unikaman abë 'akanankin bëtsi unikama 'aia.
25 Ësakian kakëxun kuakin ka Balacnën Balaam kakëxa:
—¡Kamina a unikama 'atimakin sinánxuinsama tanin, usa 'ain kamina upíokinribi sinánxuntima 'ain! 26 Ësakian kakëxun kuakin ka Balamnën kakëxa:
—¿Karana 'ën mi kakëma 'ain, 'ën kana Nukën 'Ibun kara uisokin 'ë kaia 'ashi ñuixunkin kanuxun mi kakëma 'ain? 27 Usokin kakëxun ka Balacnën kakëxa:
—Amoribi kananuna kuanti 'ain. Anu kuankëbë sapi ka Dios Israel unikama 'atimakin sinánxunti kuëëntima 'ikën.
28 Usakin kabiankin ka Balac an Balaam ain bashi Peor kakë anu mapërakë kiankëxa. Anuxua kamabi me anu uni 'ikëma iskë anu buánkëxa. 29 Anuxun ka Balaamnën Balac kakëxa:
—Ënu kamina mapai achúshi 'imainun rabë́ okin maburukin anuxun ñuina xaroti 'ë 'axunti 'ain, 'atankëxun kamina mapai achúshi 'imainun rabë́ vaca bëna 'imainun carnero mapai achúshi 'imainun rabë́ 'ë mëníoxunti 'ain. 30 Usakian Balaamnën kakëxun ka Balacnën an kakësabiokin anuxun ñuina xaroti 'akë achúshi achúshinu vaca bëna achúshi këñun carnero achúshiribi rëtankëxun xarokëxa.