5 Anuxun ka Beor kakë uni aín bëchikë Balaam Petor kakë ëma Éufrates baka 'ura 'ikë a bitánun kixun aín unikama xuakëxa, ax ka Amav kakë me anu 'iakëxa. Usakin xukin ka ësokin Balaam katánun Balacnën aín uni kakëxa: 'Aisamaira uni ka Egipto menuax kamabi nun me tsitsiru bëtsini uaxa kixun ka kamiakëxa. Atux ka nubë sënë́maira 'ianan nu 'uramaira 'ikë kixun katánun kamiakëxa. 6 Usa 'ain kamina bënëti uxun ënë unibu 'atima okin sinánxuni uti 'ain, atux ka nubë sënë́nma kushiirabu 'ikën. Usakinmi 'aia sapi kana abë 'akanankin ënë menua 'ën chikínti 'ain. 'Ën kana 'unan minmi upíokin sinánxunkëx ka uni upitax bukuia, 'imainun min këñutanun sinánxunkëx ka uni mix kikësabi 'í këñutia.

7 Ësokin kamia ka Moabnu 'ikë aín kushibu 'imainun Madiánu 'ikë aín kushibu anribi anun Israel kama 'atima okin sinánxunia kupíoti kuríki buani kuanxun uinu kara Balaam 'ia anu bëbaxun Balacnën kakë banakama ñuixunkin kakëxa. 8 Ñuixunkëxun ka Balaamnën kakëxa:

—Ënu kamina ënë imë́ 'uxti 'ain, ënë imë́ kara Nukën 'Ibu uisakin 'ë kati 'ikë kixun ñukátamainun. Ësokin kakëx ka Moabitanën xukë aín kushikama anu bërúakëxa.

9 'Aínbi ka Diosan ami mërakin ësokin Balaam ñukákëxa:

—¿Uinu 'ikë unikama kara min 'itinu bëbakë ax 'ik? 10 Kakëxun ka Balaamnën kakëxa:

—Ax ka Moab kakë menu 'ikë aín 'apu Balac Sipornën bakë bëchikë an 'ë kanun xukë 'ikën. 11 Egipto menuax kaisa 'aisamaira uni atun me tsitsibëtsi uaxa kiax ami rakuë́kin ka 'ë binun kixun xuaxa. Usa 'ain ka bënëti kuanxun a unibu 'ën 'atima okin sinánxunti kuëënia, usokëbëtan karaisa ain suntárukamabëtan 'akin ain menua chikínti 'ikë atun tanun kixun ka 'ë kamiaxa.

12 Ësokin kakëxun ka Diosan Balaam kakëxa:

—Atubë kamina a unibu 'atima okin sinánxuni kuantima 'ain, 'ën kana atu upíokin sinánxunkin upitax bukunun 'imin.

13 Usokian Diosan kakëx pë́karakëbë niruxun ka Balacnën xukëxa a kai kuankë unikama a Balaamnën kakëxa:

—Mitsun menu kamina rikianti 'ain. Nukën 'Ibu ka mitsubë 'ëx kuanti kuëënima.

14 Usokian kakëx anu kuantëkëxun ka Moabnu 'ikë ain kushikaman Balac kakëxa:

—Balaam ka nubë uisama tanxa kixun ka unikama an kakëxa. 15 Kakëxunbi ka amiribishi xutëkënkin a paían xukë ain kushikama 'asamaira xukin sinánñuira a kaístankëxun xuakëxa.

16 Xukëx rikianxun ka amiribishi Balaam kakëxa:

—Balac Sipornën bakë bëchikë an ka ësokin mi kanun nu xuaxa: Kamina 'ën mi kamikëx uisama tanima 'uti 'ain. 17 'Ën kana uiti kuríki kaina kuëënin atibi 'inánan nuibakin añu kaina kuëënin abi mi 'inánti 'ain; usa 'ain kamina a unikama 'ë 'atima okin këñutanun sinánxuni uti 'ain. 18 'Aínbi ka Balaamnën a unikama kakëxa:

—Balac an kamaishi ain xubunu 'ikë ain kuri 'imainun aín kuríki 'inánkëxunbi kana 'ën ñu chaiira 'axuanan ñu chukumarabi 'axuntima 'ain, ax ka Dios kuëënkësama okin 'ën 'akë 'iti 'ikën. 19 Katankëxun ka mitsúxribi kamina ënë imë́ ënu bërúti 'ain, uisakin kara Nukën 'Ibun 'ë kaia kuatëkëmainun kixun ka a unikama kakëxa.

20 Kakë a imë́ ka Diosan ami mërakin Balaam kakëxa:

—A unibu mi bitsi uan kamina nirukiani abë kuanti 'ain. Aínbi kamina 'ën mi kakësabiokinshi 'ati 'ain.

21 Usai 'iónx pëkarakëma 'aínshi niruxun burro ain xanu mëníobiani ka Balaam a bitsia ukë moabitas uni aín kushikamabë kuankëxa. 22 Kuanía aín burronu 'irukiani kuankëbë ka an ñu mëëxunkë uni rabë́ axribi abë kuankëxa. 'Aínbi ka Nukën 'Ibu kuania oi 'itsaira ami nishakëxa. Usaia nishkëbë ka aín ángel anúan kuankë bai anun inútisama okin bëarati nirakëakëxa. 23 Bain kuankinbi ka burron Nukën 'Ibun ángel aín manë xëtokë tuíanx bai nëbëtsi nikë isakëxa, isi ka anúan kuankë bai a 'imainun amo ki abákëxa; abatia okin ka bainubi kuantëkënun kixun Balaamnën aín burro mëëakëxa. 24 Usokëbë ka Nukën 'Ibun ángel anúan kuankë bai kuëbí ñu 'apákë amo rabë́ maxá chaiorukin kënëkë nëbëtsi nirakëakëxa. 25 Usai Nukën 'Ibun ángel nikë isi abati kënëkë amo nipakëkin ka burron Balaamnën xo amibi tsënkakin bitaxakëxa. Usokin 'akëxun ka Balaamnën ain burro amiribishi mëëtëkëankëxa. 26 Usomainun ka Nukën 'Ibun ángel anpan atu rëkuë́nbiani kuanx bai, tsítsi anun amo ki kuainsama okin bëarati nirakëakëxa. 27 Usa 'ain ka burro an Nukën 'Ibun ángel isi rakuë́ti Balaam menu nipáti rakábuakëxa. Usakëbë nishkin ka Balaamnën aín burro i tëakënën rishkiakëxa.

28 Rishkikëxëshi Nukën 'Ibun 'imikëx banakin ka aín burron Balaam kakëxa:

—¿Uisa 'ën okëxun karamina amiribishi 'ë rishkitëkënin? Bërí kamina rabë́ 'imainun achúshi okin 'ë rishkin.

29 —'Ëmi karamina kuaitisatanin —kixun ka Balaam kakëxa—. 'Ën mëkënu manë xëtokë 'ain kana bëríbi mi 'axun rakantsian. 30 Kakëxunbi ka burrun Balaam kakëxa:

—'Ëx kana min burro 'ain uínsaranbi kana ësokin mi 'akëma 'ain uinu kaina kuainsatani anubi kana mi nikian, minbi kamina 'unan. —Asérabi ka usa 'ikë —kixun ka Balaamnën kakëxa.

31 Usakin aín burro 'aia ka Nukën 'Ibun Balaam aín ángel, manë xëtokë tuianxa bai nëbëtsi nikë isnun ismiakëxa. Ismikëxun nikë isi ka Balaam rantinpuruni aín bëmánanën me tikai tsóbuakëxa, 32 usai 'iabi ka Nukën 'Ibun ángelnën kakëxa:

—¿Uisa oti karamina min burro rabë́ 'imainun achúshi okin rishkian? 'Ën kana anun mi kuankë bai bëaran 'ëx kuëënkëbëmabi mi ukë a kana kuëënima. 33 Usa 'ain ka min burro 'ë, isi rabë́ 'imainun achúshi oi amo pátsianxa. Min burro kuainakëtima kuanshikëbëtan kana axa kuantamainun mi 'akë 'itsían. 34 Ësakin kakëxun ka Balaamnën Nukën 'Ibun ángel kakëxa:

—'Ëx kana 'uchan, 'ën kana 'unánkëma 'ain mix kamina anun 'ëx kuanti bai bëarati anu nitsa kixun. Mix kuëënkëbëma kana ënuaxëshi kuantëkënti 'ain. 35 Usakian kakëxunbi ka Nukën 'Ibun ángelnën kakëxa:

—A unikamabë kamina kuanti 'ain, 'aínbi kamina 'ën mi kakë banaishi kati 'ain.

Kakëx ka aín kushikama a bitia, Balacnën xukë akamabë Balaam kuankëxa. 36 Kuania bëbaia kuabiani kuanxun ka Balac kakë 'apun an Balaam Moab 'urama 'ikë achúshi ëma anua Arnón kakë baka 'ikë a rapasu anubia atun ëma sënënakëkë anua bikin, 37 ësokin kakëxa:

—'Ën kana uisama taniabi mi kamian; ¿Uisa kupín kaina uisama tan? ¿Min kaina 'ën mi kupíoisama sinan? 38 Kakëxun ka Balaamnën kakëxa:

—Ënu kana 'ain min kamikëx kana uan. 'Aínbi kana 'ën kushínbi mi katima 'ain; usa 'ixun kana uisa okin kara Diosan 'ë kaia a banaishi mi kati 'ain. 39 Ësokin kabiani ka Balaam buani Balac Quiriat-husot anu kuankëxa, 40 kuanx aín 'ikënu bëbaxun ka Balaam 'imainun abëa kuankë aín kushibu pimitia vaca 'imainun ovejakama an ñu mëëxunkë unikaman rëxun piti 'abiankin buánxunun kamiakëxa.

41 Usakin ónkë pëkarakëbëtan ka Balacnën bibiankin Balaam matán me Bamot-baal kakë anu mapërakëxun kamaira iskinmabi anua Israel unikama bukukë aín xubu ismiakëxa.