Israel unikaman Hormá kakë me bia
21
Usa 'ain ka anu achúshi 'apu cananeo ax Négueb kakë me anu tsókë uni ax, Arad kakë ëma anu 'apu 'iakëxa, anuxun ka israel unikama ka Atarim kakë bai anun aia kixun ñuikania kuakëxa, kuati aín suntárukamabë kuanx abë 'akanankin ka Israel uni raíri ñatankëxa. 2 Usokëxun ka israel unikaman Nukën 'Ibu, a mekama biti 'akinkëxuinsa atun anu 'ikë ëmakama 'imainun anua 'ikë ñukama këñuti 'ikë kixun kakëxa. 3 Kakëxun ka Nukën 'Ibun israel unikama atun ñukákësabi okin 'anun 'amiakëxa, 'amikëxun ka Cananeos unikama abë 'akanankin israel unikaman achirabi bërutanuma këñuakëxa, këñukin ka atun ëmakamaribi usaribi okin ñuñuma 'itánun këñuakëxa. Usakin 'atankëxun ka a me Hormá kakin anëakëxa.Moisésnën runusa okin manë panshían 'á bana
4 Matá me Hor kakë anuax tsuákirukiani ka Israel unikama parúmpapa xónsa kakë ami kikiani kuankëxa, kuani ka Edom kakë me au kuanima a ratanarati amotan kuankëxa. Kuani ka anúan kuankë bainuax, unikama aín sinan bëtsi bënë́kankëxa, 5 bënëti ka Israel unikama Diosmi 'atimai bananan Moisésmiribi 'atimati banai kiakëxa:
—¿Uisati karamina mitsun nu Egipto menua chikínbëtsían? ¿Anu uni 'ikëma me ënuax këñun karamina nu bëan? ¡Ënë menu ka 'umpaxbi 'aíma 'imainun a pitibi 'aíma 'ikën! ¡Nux kananuna ënë piti ratsushi pi atsani bënëtin!
6 Usai kikania kuakin ka Nukën 'Ibun kamabi uni pitanun axa pianankë runu unimiakëxa, unimikëxuan runun pikëx ka 'itsaira Israel unibu këñuakëxa. 7 Usokëbë anua 'ikë anu kuanxun ka Israel unibunën Moisés kakëxa:
—¡Nukamax kananuna Nukën 'Ibu ñui 'atimati bananan mi ñuiribi 'atimati banai 'uchan! ¡Usa 'ain kamina Nukën 'Ibu ënua runu nëtëminun kati 'ain! Kakëxun ka Moisésnën atun 'uchakama tërënxunun Nukën 'Ibu ñukáxuankëxa, 8 ñukáxunkëxun ka Nukën 'Ibun Moisés kakëxa:
—Manë panshían kamina an atu pikë runu abi tankin 'ati 'ain, 'atankëxun kamina imaxu chaxkë́ achúshi nitsíntankëxun anu bëntanti 'ain. Bëntankë a runu ami bësukin isi ka ui kara runun pia ax pëxkúti 'ikën. 9 Usokin 'anun kakëxun achúshi runusabi 'itánun manë panshian 'atankëxun ka Moisésnën i achúshi nitsínkë anu bëntankëxa; bëntankë 'ikë runu tankin manë 'akë ami bësukin isi ka ui uni kara runun pia ax pëxkúakëxa.