—¡Uisati kara ax pain ñukë unikamabë ñunun Nukën 'Ibun nu 'imikëma 'it! 4 ¿Uisati kaina mitsun Nukën 'Ibun unibu anu uni 'ikëma menu bëan? ¿Mitsun kaina nukamax nun 'arakakë ñuina kamabëbi bamati kuëënin? 5 ¿Uisati kaina Egiptonua chikínbëtsinkin 'aisama me ënu nu bëan? Ënë mex ka anu añu ñubi 'apátisama 'ikën; 'imainun ka higuera kakë ibi 'aíma 'ianan uvas 'apákëbi 'aíma 'imainun i bimiñubi 'aíma 'ianan ¡'Umpax a xëatibi 'aíma 'ikën!

6 Usai kia kuakin atu ëbiani 'uri kuanx ka Moisés 'imainun Aarón xubusa okin chupa 'akë aín xëkuënu, nukutishi rantinpuruni aín bëmánanën me tikai tsóbuakëxa. Usaia 'ikëbë ka Nukën 'Ibu kushi ichuti mërakëxa, 7 usai mërakëbëtan ka Nukën 'Ibun Moisés kakëxa:

8 —Min tsati bikin kamina min xukën Aarónën mi 'akimainun unikama timë́ti 'ain. Timë́këbëtan kamina atun ismainunbi min tsati bikin 'umpax anuax chikínun mapara kati 'ain, kakëxa anuax 'umpax chikitia kamina isti 'ain, isia ka unikaman xëamainun atun ñuinakamanribi xëati 'ikën.

9 Kakëxun ka Moisésnën Nukën 'Ibun kakësabiokin aín tsati biakëxa; 10 bitankëxun ka Moisés 'imainun Aarónën kamabi uni mapara rapasu timë́xun kakëxa:

—Bana kuakëma unibu mitsun kamina kuati 'ain: ¿Nun karanuna ënë maparanua mitsun xëati 'umpax biti 'ain? 11 Ësokin kakinshia Moisésnën aín tsati manámi okin rabë́okin mapara taxkakëxa, taxkakëbëshi ka mapara mëuküax chaiira 'inun tanpëkuatsini 'umpax chikíakëxa. Usai 'ia ka unikaman atun ñuina kamabëtan 'umpax xëakëxa. 12 'Aínbi ka Nukën 'Ibun Moisés këñun Aarón kakëxa:

—Mi rabëtan kamina 'ën kakësabiokin Israel unikaman ismainun 'akëma 'ain usa 'ain kamina ënë unikamabëbi a me 'ën mitsu 'inánti anu bëbantima 'ain. 13 A 'umpax upíira ax ka Meribá kakë me anuaxa Israel unikama ami 'atimati banakëxunbi Nukën 'Ibun aín kushi ismikin maparanua 'umpax chikimia a 'ikën.

14 Usa 'ain ka Moisésnën Cadés, kakë me anuxun Edom kakë menu 'ikë 'apu ësokin katánun uni xuakëxa: “Min aintsi israel unikaman ka ësokin mi kanunkixun nu xuaxa: Minbi kamina upíokin 'unan nukamax kananuna 'aisamaira tëmërai kixun. 15 Nun chaitiokëkamax ka Egipto menu kuanx anu 'itsa baritia tsóakëxa, 'aínbi ka egipcio unibunën atu 'asaribiokin nuribi 'atima okëxa, nun chaitiokëkama 'asaribiokin; 16 usakin 'akëxun kananuna Nukën 'Ibu nu 'akinun kixun sharákin ñukákën, ñukákëxun kuankin ka aín ángel achúshi Diosan xuakëxa, xukëxun ka Egipto menua nu chikíankëxa. Usa 'ain kananuna bërí, Cadés kakë ëma anua min me sënënakëkë anu 'ain. 17 Usa 'ain kananuna mi ñukatin min men inuti karamina kuëënti 'ai kixun mi ñukati uan. 'Aínbi kananuna anumi ñu 'apámianan uvas 'apámikë me anun kuantima 'ain, 'ianan kananuna min me naëmikë kamanua 'ikë 'umpax xëatima 'ain. Kuani kananuna uinu 'ikë baix kara anúinra nikë 'ikë anuinshi min me inubiani kuanti 'ain.” 18 Kixun kakëxunbi ka Edomnu 'ikë 'apúnribi kakëxa:

—¡'Ën memi kamina bëba kuantsintima 'ain, 'ën men bëbakuatsini aia mërakin kana 'ën suntárukamabëtan mitsu 'ati 'ain! 19 Kixun kakëxunbi ka Israel unikaman amiribishi katëkëankëxa:

—Anun kuanunmi nu kakë bai cha anuinshi kuankin min me naëkë kamanua 'umpax mëraxun xëanan nun ñuinakama xëamixun kananuna mi kupíoti 'ain. Usa aín kananuna min me ënuaxëshi bënëkiani kuanti 'ain. 20 Kakëxunbi ka Edom menu 'ikë 'apun katëkëankëxa:

—¡Kana mitsu kan 'ën men kamina inúkantima 'ain! Usokin katankëxun ain suntárukama an 'akánanti 'unánkë upíbu a bibiani kuanxun ka 21 anun israel unibu kuainsama okin bai bëarakëxa. Bëarakëbë ka anun kuanima Israel unibu bai itsi bibiani amotan kuankëxa.

22 Usokian 'akëx ka kamabi Israel kama Cadés kakë me anu paían 'ikë anuax chikíkiani Hor kakë aín bashi ami kikiani kuankëxa. 23 Anua Edom kakë me sënënakëkë anuxun ka Nukën 'Ibun Moisés 'imainun Aarón kakëxa: 24 Aarón ka ñuti 'urama 'ikën, usa 'aish ka 'ën israel unikama 'inánti me anu bëbatima 'ikën, anua 'umpax Meribá kakë anuxun kamina 'ën kakësokin mitsun 'akëma 'ain. 25 Moisés min kamina Aarón 'imainun aín bakë bëchikë Eleazar Hor kakë bashi ain rëbunu buánti 'ain; 26 anuxun kamina aín papa Aarón ñukëbëtan ain bakë bëchikë Eleazar Sacerdotenën pañukë chupa a pëmitankëxun pañumiti 'ain. Anuax ka Aarón ñuti 'ikën.”

27 Usakin ka Moisésnën Nukën 'Ibun kakësabiokin 'akëxa. 'Ai kuani ka kamabi Israel unibunën ismainunbi, aín bashi Hor kakë a mapërakëruakëxa, 28 anuxun ka Moisésnën Aarón Sacerdotenën pañukë chupa a pëmitankëxun aín bakë bëchikë Eleazar a pañumiakëxa. Usokëbë ka aín bashi anuaxbi Aarón ñuakëxa; ñukë ka Moisés 'imainun Eleazar anua 'ikankë anu aín bashinuax ubúakëxa. 29 Ubukëbëtan Aarón abë aiama iskin ka ñuaxa kixun sinani ka israel unibu, nitë́xëti masá nuituti achúshi 'uxë 'imi inkankëxa.