—¡Nun nu ñachabëtsinkë me ax ka upíira 'ianan anuxun ñuina 'arakai anu tsótisa 'iaxa! 8 Nukën 'Ibun nu kuëënkin buánxun ka, a menu nu atsínun 'imikin nu 'inánti 'ikën. A menuax ka a kuti ñu 'aisamaira 'inun bimimainun a 'arakati ñuinakamax upíbuira 'inun kaiti uakamë 'ëoia. 9 Usa 'ain kananuna nun Nukën 'Ibumi 'atimakin ñui, a menu 'ikë unikamami uakamë iëoia rakuë́tima 'ain, akamax ka nux ami rakuë́tisama 'ikën; 'ianan ka an atu 'akinti 'aíma 'ikën, nux kananuna an nu 'akinti Nukën 'Ibubë 'ain. ¡Usa 'ain kamina rakuë́tima 'ikanin!

10 Ësakin kakëxun kuankin ka Israel unikaman a rabë́ maxaxan rëisatankëxa. Usakin 'aisa tankëbëbia xubusa okin chupa 'akë anuax, Nukën 'Ibu kushi ichuti atumi chikirakëtia ka Israel unikaman isakëxa. 11 Usai 'ikëbëtan ka Nukën 'Ibun Moisés kakëxa:

—¿Uínsaran ira kara ënë unikaman 'ën 'akinkëxunbia 'ën kana 'akinima kixun sinánkë a ënti 'ik? ¿Uínsaran ira kara ënë unikamax 'ën kushínbi atun ismainun bëtsi ñukama 'a a sinani 'ëmi katamëti 'ik? 12 Usa 'ain kana ënë unikama a menu atsini kuankëmashi anun maëtanun achúshi 'insin xuti 'ain; 'aínbi kana min rëbúnkikama achúshi ëma atu mapë́scakëbu 'ianan kushiirabu 'aish atusamaira 'inun 'imiti 'ain.

13 Ësai kiabi ka Moisésnën Nukën 'Ibu kakëxa:

—Min kamina min kushínbi, ënë unikama Egipto menua chikían. Usa 'ain ka egipcio unikaman usakin min ënë unikama 'aia kuati 'ikën. 14 Kuakin ka Canaán menu tsókë unikama ñuixunti 'ikën. Atúnribi ka min kamina ënë unikama atubë 'ixun, 'akini kixun ñuikania kuaxa, 'imainun kamina an unánkë unibë uni bësúnax banakësari banain, 'imainunribi kamina min nëtë kuinsa axa atubë 'inun 'imin, 'imainun kamina nëtën kuinsa mëu rëkuë́n kiankin atu buánan imë́ribi tsi rëkirukësa a isia anunbi kuanun atu 'imian. 15 Ënë unikama mi achúshi okin 'akëinshi këñukin maëmikë kuati kara bëtsi menu 'ikë unikama uisai kiti 'ikën: 16 Nukën 'Ibun ka a unikama a 'inánnuxua ka me anu kuantanun ënkinma, anu uni 'ikëma menuxun maëmiaxa kiax kikanti 'ikën. 17 Usa 'ain kamina Nukën 'Ibu Dios 'ixun min kushi nu ismikin asérabi mix kiásabiokin 'ati 'ain. Mixbi kamina usai kian, 18 usa 'aish kamina sinan mënínñushi 'ianan, min unikama 'itsaira nuibatin 'imainun kamina atun 'atima ñu 'akë tërëanan min bana kuaisama tankë akama ënkinma uisakin kaina 'aisatani usakin tëmëramin, 'anan kamina aín papanan 'anan aín bakë bëchikënën bëchikë 'imainun aín baba aín xutan bakë bëchikënën bëchikë akama 'atima ñu 'aia tëmëramiti 'ain. 19 Minmi min unikama nuibakë ax ka upíira 'ikën, usa 'ain kamina ënë unikama 'uchaiabi nuibakin upíokin sinanamiti 'ain, bëráma kamina Egipto menuxunbi munu ënë menu bëakën.

20 Usai kiabi ka Nukën 'Ibun Moisés kakëxa:

—Asabi ka 'ën kana min ñukákësabi okin atun 'ucha mëníoti 'ain.

21 'Aínbi kana ax ka asérabi kamabi menu kushiñuira 'ikë kixuan unin unánun unikama nuibatin, 22 ui unikaman kara Egipto menuxun 'ën kushin bëtsi unin akëma ñu 'aia isanan anu uni 'ikëma menuxunribi 'aia iskinbi, anu uni 'ikëma menuxun kakëxunbi 'ën bana kuakëma 'ikën, 23 a unikama achúshinëxi ka 'ën a 'inánuxun aín chaitiokëkama ka me anu kuantima 'ikën. 'Imainun ka ui unikamax kara 'ën ñu 'aia isíbi 'ëmi 'atimati banaxa ax ka anu tsóti kuantima 'ikën. 24 'Aínbi ka 'ën uni Caleb ax raírinëxa usai 'ikëbëbi usai 'ikinma aín sinan upí 'ixun 'ën bana kuaxa. Usa 'ain kana kuanxuan isbëtsinkë me anu atsínun ashi 'imianan, ain rëbúnkikamaribi a menubi tsónun 'imiti 'ain. 25 (Usa 'ain ka me sapan anu amalecita 'imainun cananeo kakë unikama tsotia) anu kuanux kamina imë́ishi anu uni 'ikëma me auküaxmi ukankë au kuatankëx parúmpapa xónsa kakë aubi kikiani kuanti 'ain.

26 Ësai kitankëxun ka Nukën 'Ibun Moisés 'imainun Aarón kakëxa:

27 —¿Uitishi okin karana Israel unikama an 'atima ñuishi 'ati sinánkë ënëkamax 'atimati 'ëmi banakëxun tënëti 'ain? 'Ënbi kana 'ëmia 'atimati banaia kuan. 28 Usa 'ain kamina min kuantankëxun 'ëx kikë bana ënë atu kati 'ain: 'Ëx min 'Ibu 'aish kana asérabi ësai kin, usa 'ixun kana atux kia 'ën kuakë usaibia 'inun atu 'imiti 'ain. 29 Kamabi uni veinte baritiañu aín anë kirikanu 'akë axa 'ë ñui aín sinan xuamatani nishkë akamax ka anu uni 'ikëma me ënuaxbi maëi këñuti 'ikën. 30 'Aínbi ka Caleb 'imainun Josué axëshi raírinëxa 'ën kakësoi 'ikëma kupín maëmainun 'ën 'inánuxun ka me anu bëbai kuanti 'ikën. 31 Usai atux 'imainun kana uin kara atun bakë bëchikëkama a ñuia abë akanankin 'axuinsa bëtsi unikaman biti 'ikë kiax kikankë akamax ishi, a 'inánuxun 'ën mitsu kakëxunbimi kuëënkankëma me, anuaxa upitax kuëëni bukukanun 'imiti 'ain. 32 Imimainun kamina mitsux anu uni 'ikëma me ënu maëi këñuti mitsun nami ënubi chë́kiti 'ikën, 33 usa 'ain ka mitsun bakë bëchikëkamax anu uni 'ikëma me ënuxun aín ñuina 'arakakë bërúai cuarenta baritia 'imi niti 'ikën. Usai ka 'ën bana kuakëma kupí; mitsux pain anu uni 'ikëma me ënuax maëi këñutamainun 'iti 'ikën. 34 Mitsun kamina cuarenta nëtë 'imikin Canaán kakë me ñachai nian; usaribiti ka cuarenta baritia 'imi mitsun bakë bëchikëkama mikaman 'ucha kupinshi tëmërai niti 'ikën, achúshi baritia nikë ax ka: achúshi nëtë nikësa 'iti 'ikën. Usai tëmërakin kamina uix kara 'ë ñui 'atimati banaxa ax kara uisai 'ia kixun 'unánti 'ain. 35 'Ëx kana min 'Ibu 'aish kin: Usakin kana an ñu 'atima 'akin timë́xun 'ë ñuikë unikama 'ati 'ain. Usa 'aish ka anu uni 'ikëma me ënuax anúan maëti nëtë 'ikëbë ka këñuti 'ikën.

36-37 Usai 'imainun ka Moisésnën me ñachatanun xukëx kuanx uxuan 'atimakinra atun bana ñuikëbëa, a kuati sharati tsuákirukë a unikama, Nukën 'Ibun maënun 'imiakëxa. 38 Usaia a unikama 'imainun ka Josué 'imainun Caleb ax kuni ñuama 'ikën.

39 Usakian Moisésnën Nukën 'Ibun kakë banakama ñuixunkin kakëx ka Israel unikama masá nuituti nitë́xëakëxa. 40 Usai 'iónkë pëkarakëma 'aínshi nirukianx aín bashi manámi anu kuaruax ka kikankëxa:

—¡Ënu kananuna bërí 'ain! Usa 'ain kananuna ënuax a me 'inánuxuan Nukën 'Ibun ka a me anu kuanti 'ain, asérabi kananuna 'atima ñu 'aí 'uchan. 41 Kikaniabi ka anuax kuanxumashi Moisésnën atu kakëxa:

—¿Uisati kaina mitsun Nukën 'Ibu kakënxunbi kuaisama tanin? ¡Mikaman mi usakin 'akatsi kixun sinánkësa okin kamina ñu 'atima 'ain! 42 Usa 'ain kamina abi bana kuakësama obiani kuankantima 'ain, Nukën 'Ibu ka mitsubëma 'ikën. Axa mimi nishkë unikaman ka abámikin mitsu 'ati 'ikën. 43 Anun mi kuankanti anuxun ka amalecita 'imainun cananeo unikaman, kuania 'akanankinuxun mitsu kainia. Usa 'aínbi kamina Nukën 'Ibun kakësokin mitsun 'aisamatan, usa 'ain ka an bërí mitsu 'akintima 'ikën.

44 Ësokian Moisésnën kakëxbi ka aín bashi niñu 'ikë abu kikiani karaisa kuania atu 'aia tankatsi kiax bana purábiani ñunshinkiani kuankankëxa; kuankëbëtanbi ka bunántisa okin 'akë anua Diosan ñukama purukë a 'imainun Moisésnëxribi anua 'ikankë anuax kuanima bërúakëxa. 45 Usai bana purábiani kuaniabi ka amalecita 'imainun cananeo unikaman a menu tsókë atun, Israel unibu 'akëxa, 'akëxa abatia nuibiankin ka Hormá kakë ëmanubi bëbarukin 'aisamaira këñutisa okin 'akëxa.