25 Usakin xukëx kuantankëxun ka achúshi 'uxë 'imainun mapai rabë́ nëtë 'imi nikin ñachabëtsini amiribishi anua aín patsan bukukë, 26 Cadés kakë anu uni 'ikëma me Parán anubi rikuatsiankëxa. Anu ka Moisés, Aarón 'imainun kamabi israel unibu 'iakëxa. Anu bëbatankëxun ka uisa kara a mekama 'iaxa a 'imainun an buánkë bimi akama ismianan a menu 'ikë unibu isbiankë akamabi Moiséskëñun israel unibu ñuixuankëxa. 27 Ñuixunkin ka ësokin Moisés kakëxa:

—A ñachatanunmi nu xukë me anu kananuna bëban. Bëbaxun kananuna kamabi isan a mex ka upíira 'ikën, anuax ka vaca, oveja 'imainun carnero kamabi ñuina ax upiti kania, 'imainun ka ënë bimikamax a menuxun 'apákë 'ikën. 28 Usa 'aínbi ka a menu 'ikë unikama ax kushiirabu 'ikën. Aín ëmakamax ka chaiirabu okin upíokin kënëkëbuishi 'ikën. Usa isanan kananuna Anacnën rëbúnkikamaribi chaiira unibu 'aish nu tupumabu nun titikaisamabuira 'ikë isan. 29 Négueb kakë me sënënakëkë anu ka amalecita unibu tsótia, 'imainun ka ain bashi niñu me anu hitita, jebuseo 'imainun amorreo, unibu tsómainun ka parúmpapa kuëbí Jordán kakë anu cananeo uniburibi tsótia. 30 Ësakin atun ñuixunia kuati sharákin Moisés ñukai kikania okin ka Caleb kakë uni an kamabi Israel unibu nëtëmikin, ësokin kakëxa:

—¡Nun kananuna a mekama atubë 'akanantankëxun bitsi kuanti 'ain! ¡Nux kananuna a unikama tupuma 'ain, usa 'ixun kananuna atu 'atankëxun aín me biti 'ain! 31 ¡Usai kikankëbëbi ka abëa kuankë uni raíri kiakëxa:

—Nux kananuna a unikama 'ai kuantima 'ain! Atux ka nu tupumabu kushiirabu 'ikën. 32 Kianan ka Israel unibu raírinëx a me 'atimakin ñui ësairibi kiakëxa:

—Nun anu kuanxun isbëtsinkë me ax ka 'aisama 'ikën. Kanan ka anu kuanxunu isbëtsinkë me anuax ka atúxbi 'akanani uni bamaia, 'imainun ka anu tsókë unikama nu tupumabu nun titikaisamabu 'ikë kananuna isbëtsian. 33 Isanan kananuna Anacnën rëbúnkikamaribi chaiira 'aish, nun mapë́skaisamabu 'ikë isan. Usa 'ain kananuna nux atu rapasunuax champusara 'ikë atúnribi nu isaxa.