María 'imainun Aarón Moisés ñui 'atimati bana
12
Usa 'ain ka María aín chirabakë 'imainun Aarón aín xukë́n apan Moisésnën etiopi xanua bikë 'ain, ami 'atimakin ñui banakëxa. 2 Banai ka ësairibi kikankëxa: “Nukën 'Ibu ka Moisés bëshi banakëma 'ikën; nubëribi ka banaxa.” Kikania ka Nukën 'Ibun kuakëxa.3 Moisés ax ka upí sinan ñu 'aish nishananti sinánkëma uni ënë menu 'iakëxa. 4 Usa uni 'ikë iskin ka Nukën 'Ibun Moisés, Aarón 'imainun María akama kakëxa: “Mi achúshi 'imainun rabëtax kamina mapánati okin chupa 'akë anu timë́ti 'akë anu kuanti 'ain.” Ësai Dios kia kuati ka a kamáxbi anu kuankëxa. 5 Kuankëbë ka Nukën 'Ibun xubusa okin chupa 'akë aín xëkuë manámi anu kuin xapu unënkësa 'inua këxtuira 'inun 'ibúkë anu ubúakëxa, ubuxuan anuxun kuënkëx ka Aarón 'imainun María anu kuankëxa, 6 kuania ka Nukën 'Ibun ësokin kakëxa: “Bërí kana mikama ësokin kain: An 'ëx kikë bana uni ñuixunkë mitsunu 'ikë kana 'ën namámikësokin kanan kana namámikinribi kain; 7 usa 'aínbi kana 'ën uni Moisés abëishi usai banaima 'ëxbi abë banakin kana asérabi kain. Ax ka 'ën uni raíri 'ikësai 'ima 'ën kakësabi oi 'ia, 8 'imainun kana abë banai an unánkë unibë bësúnax banakësai banain, 'imainun kana kuaisabi 'itánun abë banakin 'ënbi kain. ¿Usa 'aínbi karamina mitsux a ñui 'atimai banain?”