4 Anu ka Israel unikamabë mëskuax kuankë bëtsi menu 'ikë unikama an pitishi sinánkë unikama atux pain nami pikatsi kia kuati. Israel unikamaxribi tsuákirui nami pikatsi kiax ini sharati kánani kikankëxa: “¡Uinua karanuna a piti nami mërati 'ai kiax kánani kikankëxa! 5 ¡Bëríbi kananuna nun sinanin Egipto menuxunu kupímashi tsatsa pianan! pepinu, santira, cebolla, 'imainun 'ajos, akama kananuna piakën. 6 'Aínbi kananuna bërí ënuxun bëtsi ñu pikinma namiratsushi pikasmati akëñuma këñútisa tanin.”

7 (Maná ax ka 'atsa putu iskësa 'iakëxa; usa 'aish ka panshian bëpinñu ñu bëru iskësaribi 'iakëxa, 8 'imainun ka harina xënikëñun mëskukësa 'ikë 'unánkëxa. Usa 'ikë ka manánuax nipakëtia aín 'ikënuax chikítankëxun bixun unin rëanan chakaxun pëpëkaxun 'anan pánsa okin 'axun xuiakëxa. 9 Anúan, kuénkuru atux anu 'ikë anu 'ibúkë a imë́ ka maná axribi abë 'ibúakëxa.)

10 Usa 'ain ka Moisésnën Israel unikama atux anu 'ikë aín xëkuënu xëkuënu nitsax aín aintsikamabëbi sharati ini kikania kuakëxa. Usaia ami katamëtima 'ikania kuati ka Nukën 'Ibu atumi nishakëxa. 'Imainun ka Moisésnëxribi atux usai 'ikankë a kuëëanma 'ikën, 11 kuëënkima ka Nukën 'Ibu kakëxa:

—¿Uisoti kaina 'ëx min uni 'ikëbi 'ë 'atima oin? ¿Uisa kaina min ënë unikaman 'apu 'imixunbi 'ë oisatanin? 12 ¿'Ëx aín papa 'ianan aín tita 'ixun karana atu 'ikúxun tuáxura 'akësokin aín chaitiokëkama 'inankatsimi kia me anu buánti 'ain? 13 ¿Uinua karana ënë unikama piminuxun nami biti 'ain? Ënë unikaman ka 'ë nami 'inánun kikin kaia. 14 'Ën kana ënë unikama 'aisamaira 'ikë 'ëratsushi 'ixun buankasmati 'ain; ax ka 'ënan tëira 'iti 'ikën. 15 Ësokin 'aisatankin kamina, 'ë bamatanun ënti 'ain, asérabi min nuibakin kamina usakin 'ë 'ati 'ain. Usakinmi 'akëx kana 'itsaira nuibakatima 'ain.

16 Kiabi ka Nukën 'Ibun ësokin kakëxa:

—'Ë kamina setenta Israel unikama aín kushibu min 'unánkë timë́xun, xubusa okin chupa 'akë anuax 'ëbë banati anu bëxun kaínti 'ain. 17 Anu ubútankëx kana 'ëx mibë anuax banati 'ain, 'imainun kana mi 'inánkë 'ën kushi usaribi atu 'inánti 'ain, 'inánkëxun ka atúnribi ënë unikama buánti isti mi 'akinti 'ikën. Usa 'ain kamina atun 'akinkëx mixi nuibakatima 'ain. 18 'Atankëxun kamina a unikama imë́ishi, nami pinúxa mëníokanun kati 'ain. 'Ën kana inia ësai atux kia kuan ¡Uinua karanuna a piti nami biti 'ain! ¡Egipto menuax kananuna asábi 'iakën! Usai kia kuax ka Dios ësai kiakëxa, asábi ka 'ën kana a piti nami atu 'inánti 'ain, 19 'inánkin kana achúshi nëtë, rabë́ nëtë, mapai achúshi nëtë, mapai rabë́ nëtë 'imainun mapai rabë́ 'imainun mëkën rabë́ nëtëra atun piti nami 'inántima 'ain. 20 Usokin 'inánkëxun ka unikaman achúshi 'uxë 'imikin nami piti 'ikën, a nami pikëxuan aín rëkinanbi chikíkin namin tënankëx ami kuinsati anábukin istisamatankin ka timati 'ikën, atúnbi ka 'ën 'akinkëxunbi Nukën 'Ibu ka nubë 'ikë kixun sinanima 'ën kuamainunbi 'atimati banai ini kikanxa: ¿Uisakatsi karanuna Egipto menuax chikían?

21 Usa 'ain ka Moisésnën Dios kakëxa:

—Axa 'ëbë ukë unikama ax ka seiscientos mil uni 'aish 'aisamaira 'ikën. ¿Usa 'aínbi karamina mix 'ën kana achúshi 'uxë 'imikin piti nami 'inánti 'ain kiax kin? 22 ¿Uinu kara 'aisamaira oveja 'imainun vacakama nun kamabi unibëtan sënë́ntanun rëti a 'ik? Nun tsatsa parúmpapanu 'ikë, kamabi bixun 'inánkëxi ka atubëtan sënë́nma 'iti 'ikën.

23 Ësai kiabi ka Nukën 'Ibun kakëxa:

—¿Min sinánkëx kara 'ën kushi chamaratsu 'ik? Bërí kamina asérabi kara 'ëx kikësabi oi 'ia kara 'ima kixun isti 'ain.

24 Usakian kakëx anuax chikixun ka Moisésnën kamabi uni usakin Nukën 'Ibun kakë banakama ñuikin kakëxa, kanan ka setenta Israel uni aín kushibu aribi xubusa okin 'akë rapasu sëtëankëxa. 25 Usai kuin nëbë́tsin ubuax ka Nukën 'Ibu Moisésbë banakëxa; banatankëxun ka Moisés 'inánkë aín kushi chukúmashi bitankëxun setenta unikama aturibi aín kushi chukumashiñu 'inun 'imiakëxa. Usakian ain kushi 'inánkëxun an Dios kikë bana uni ñuixunkë kamasa 'ixun bana ñuixuankëxa; 'aínbi ka amiribishi usai 'itëkëanma 'ikën.

26 Anu ka setenta unikama anua kaískë Eldad 'imainun Medad kakin anëkë uni rabë́ 'iakëxa, 'aínbi ka xubusa okin chupa 'akë anu kuanima ain 'ikënubi tikiakëxa. Anu 'aínbia, atunuribi aín kushi chukúmashi 'iruan ka an 'amikëxun raírinën 'akësaribi okin anu 'ikë unikama an Dios kikë bana unikaman 'akësaribi okin bana ñuixuankëxa. 27 Usokian 'akëbë abákiani kuanxun ka achúshi tuákën Moisés kakëxa:

—¡Eldad 'imainun Medadnën ka an Dios kikë bana uni ñuixunkëkaman 'akësa okin anua 'ikankë anuxun bana ñuixunia kixun kakëxa! 28 Usokian kaia kuakin ka Josué, Nunnën bëchikë bënáxuinshi 'akinia ax kanikë an Moisés kakëxa:

—¡Diosan uni Moisés min, kamina usakian 'akanun 'amitima 'ain!

29 Kiabi ka Moisésnën kakëxa:

—¿'Ën usakin ñu 'ati kuëënima kaina usai kin? ¡'Ën kana kuëënin Nukën 'Ibun ain bëru ñunshin 'inánkëx ka kamabi unix an aín bana ñuikë unikamasaribi 'iti 'ikën! 30 Usai 'itankëx ka Moisés 'imainun Israel unibunën kushibu atux anu 'ikënu kuankëxa.

31 Ësokin kakin Nukën 'Ibun Moisés sënë́on ka aín sinanën parúmpapanuax bëkikin suñun 'umpánxonënmë 'ëo anua Israel unibu 'ikë atun xubu rapasu rërëkibunun 'imiakëxa, 'imikëx ka 'aisamaira 'aish achúshi metro manansa 'iakëxa, usa 'aish ka achúshi nëtën bain kuankëbëtan sënën 'iakëxa. 32 Usa 'ikë ka nëtën bibaikin imë́ribi binë́kinbi a pëkarakëbëtanribi 'umpanxónnëmë 'ëo unikaman biakëxa. Bikin ka mapai rabë́ sënë́onkin kamaxunbi bukunkin biakëxa, usokin bitankëxun ka mëníoxun atún 'ikë rapasubi ëskitanun bariónkankëxa. 33 Aínbi ka 'umpanxónnëmë 'ëo nami pikin Israel unibunën sënë́onkë 'aímabi amia 'atimai banakankë kupín atu Nukën 'Ibun këñumikin 'itsaira masókëxa. 34 Usaia anuax 'ikë ka a me Quibrot-hataavá kakin anëakëxa, anua an pitishi sinánkë unikama maínkë kupín. 35 Maínbiani Quibrot-hataavá kakë anuax kuantankëx ka Haserot kakë me anu pain i bërukankëxa.