Diosan 'imikëx maparanuax 'umpax chikia bana
17
Anu uni 'ikëma me Sin kakë anu pain bëbax 'ibaëxanx, ka kamabi Israel unikamax achúshi nëtën uiti 'ura kuanun kara Nukën 'Ibun kaia 'ati 'urabi kuani 'ikiani kuankëxa. Kuani ka Refidim kakë me anu bëbakankëxa, bëbanbi ka atun xëati 'umpax anu 'aíma 'ain, 2 shiman këñutisatankin Moisés ñukákin ësokin kakëxa:—Kananuna shiman, këñutisa tanin nu kamina 'umpax xëanun 'inánti 'ain, kixun kakëxun ka Moisésnën kakëxa.
—¿Uisati karamina mitsun ësakin 'ë kain? ¿Mitsux karamina Diosmi sinanima ami manuan? —Kixun ka Moisésnën atu kakëxa. 3 Kakëxunbi ka ñunshinakëkin Israel unikaman shiman bamatisaira tankin ami nishkin Moisés kakankëxa:
—¿Ësokin 'anuxun karamina nu Egipto menua chikínbëtsinkin ënu bëan? ¿Uisoti karamina nun bëchikë 'imainun nun ñuina kamakëñunbi shiman bamaminuxunbi nu chikían?
4 Usakian kakëxun ka Moisésnën 'akinun kixun Nukën 'Ibu ñukákin kakëxa:
—¿Añu karana 'ën ënë unikamabëtan 'ati 'ain? Atun 'ë maxaxan 'akin rëkanti ka 'uramara 'ikën, kixun ka Moisésnën kakëxa.
5 Kakëxun ka Nukën 'Ibun Moisés kakëxa:
—Israel unikaman kushi 'itsamashi kabiani kamina abë mix pain rëkuë́nkiani kuati 'ain. Kuani kamina min tsati anúnmi 'umpax bëráma rishkikë a buani kuanti 'ain. 6 'Ën kana Horeb kakë bashi anuxun mi kaini kuanti 'ain, usa 'ain kamina anu bëbakin min tsatin mapara taxkai kuanti 'ain. Taxkakëbëshi ka anuax 'umpax chikiti shakibutia ka unikaman xëati 'ikën.
Usakian kakëx kuanxun ka Moisésnën abëa kuankë Israel ain kushikaman ismainunbi aín tsatin mapara taxkakëxa, 7 usakin 'atankëxun ka Moisésnën anua 'ikë me a Meribá kakin anëakëxa, anuaxa Israel unibu Diosmi 'atimai banakë 'ikë ka usakin anëakëxa, anëanan ka Masá kakinribi anëakëxa, ax ka nu kara Diosan 'akinti 'ikë kixun sinánkima Israel unibunën 'atima okin sinánkë kupín ka usakin anëakëxa, ¿Nubë kara Nukën 'Ibu 'ikën nubëma kara Dios 'ik?
Amalecita unibubë Israel unibu 'akanan
8 Usaxa Refidim kakë menu israel unibu buküanbi ka amalecita unikamax atubë 'akanani uakëxa. 9 Usai atubë 'akanani aia kuakin ka Moisésnën an 'akinkë uni Josué a kakëxa:
—Bërí kamina uni ax 'akanainsabi kaisti 'ain, kaisbiani kuanx kamina amalecita uni kamabë 'akanani kuanti 'ain. 'Ëx kana imëishi pëkarakëbë kuantakëx aín bashi mapërakëtankëx anuxun 'ën tatsi anun Diosan ñu 'anun kakëxun 'akë ënë manámi okin tuíanx nitsi kuanti 'ain.
10 Usakian Moisésnën kakëxun ka an kakësabiokin Josuénën 'akëxa, 'aika anuax Amalecita unikamabë 'akananux anuaxa 'iti anu rikiankëxa. Anu kuantamainun ka Moisés, Aarón 'imainun Hur ax aín bashi anu mapërakëakëxa. 11 Usa 'ain ka Moisés pënchati nikëbëtan Diosan 'akinkëxun israel unibunën amalecitakama abë 'akanankin ñusma okëxa; 'aínbi ka Moisésnën aín pëñan meu okëbëtan amalecita unibunën abë 'akanankin Israel unikama ñusma okëxa. 12 'Akananmainun ka Moisés pëntununia Aarón 'imainun Hur kakë an anua Moisés tsóti maxáx cha achúshi nanxuankëxa. Naxuntankëxun ka bëtsían amoxun aín pëñan tuimainun bëtsínribi amoxun aín pëñan tuinxuankëxa. Usokin 'akëxa Moisésnën pëñan manámi 'imainun ka bari kuabutamainun 'akanankëxa, 13 'akanankin ka Josuénën abë 'akanankin amalecita unibu aín manë xëtokën këñukin 'akëxa.
14 Usakian 'akë ka Nukën 'Ibun Moisés kakëxa:
—Ënuax mitsux 'akanankë ënë kamina achúshi kirikanu a sinántiokin kuënëoti 'ain; 'imainun kamina Josuéribi kati 'ain, 'ën kana amiribishia uínbi sinántëkëntimokin amalecita unikama manumiti 'ain.
15 Anu ka Moisésnën achúshi ñu anuxun Nukën 'Ibu rabikin ñuina xaroti 'akëxa, 'atankëxun Diosan aín kushin nu 'akinkëxun kananuna ax numi nishkë unikama këñukin 'a kixun kakin anëakëxa, 16 anëtankëx ka ësai kiakëxa:
Nukën 'Ibun aín kushi 'ë 'inánkëxun kana Amalecita unikama abë 'akanankin 'an.
Usa 'ain ka Israel unikaman Nukën 'Ibumi katamëti ënkinma numi nishkë unikaman rëbunki ami rakuë́kinma abë 'akanankin 'akëbë Nukën 'Ibu nubëbi 'iti 'ikën.