3 Anuax ka achúshi nëtën Moisés aín bashi anu uni 'ikëma Sinaí kakë anu Diosbë bananux mapë́rakëakëxa, mapërakëtia ka aín bashi chairui sënë́nkë anuxun Nukën 'Ibun kuëankëxa:

—Kuënkin ka Moisés ësokian Jacobnën rëbúnki Israel unikama kanun kakëxa. 4 Mitsúnbi kamina isan 'ën karana uisokin egipcio unibu tëmëramikin 'a kixun, 'imainun kamina uisobëtsinkin karana 'ëx anu 'ikë ënu mitsubëa kixun, 'ën kana tëtëkamë 'ëon aín tuá nuanmikin aín pëchin bëaraxun buankësa usaribi obëtsinkin bëruinra oxun mitsu bëan. 5 Usa 'ain kana 'ën kakësabiokin kamabi ñu 'atëkënkëbë achúshi ñu 'ati sinanin, bëtsi unikamaxribi ka 'ënan 'ikën, 'aínbi kamina mitsuxira 'ën unibu 'ain, kamabi mex ka 'ënan 'ikën. 6 Usa 'ixun kamina mitsun 'ën kuëënkësabi okin 'ai kuni 'ënan 'iti 'ain, usa 'ixun kamina achúshi ëma bëtsi ëmakamasama 'ixun 'ëshi rabinun, sacerdotekama 'ikësaribiti 'iti 'ain, ësakin kamina Israel unikama kati 'ain.

7 Ësakian Diosan kakëx kuanxun ka Moisésnën, Israel unibu aín kushikama timëtankëxun Nukën 'Ibu usakin kanun kakë bana kamabi ñuixuankëxa. 8 Ñuixunkëxun kuati ka Israel unikama kamáxbi sharati kikankëxa:

—Uisai 'inun kara Nukën 'Ibu kiaxa usaibi kananuna 'iti 'ain. Ësaia unikama kikëbëtan ka Moisésnën usaía unikama kikë a ñuikin Nukën 'Ibu kai kuankëxa, 9 kuankë ka Nukën 'Ibun Moisés kakëxa:

—Ka kuat, 'ëx kana kuin këxtuira nëbëtsinuax mimi mërati 'ain, anuax 'ëx mibë banaia 'ën bana kuati ka unikama mibëbi 'ianan mix kamina asérabi 'ën uni 'ai kikanti 'ikën.

Usakian kakëxun ka Moisésnënribi unikama kikë ñuikin Nukën 'Ibu katëkëankëxa, 10 kakëxun ka Nukën 'Ibun Moisés kakëxa:

—Anu kuanxun kamina Israel unikama 'ë rabinuxa bërí 'ianan imë́ishi mëníokanun kai kuanti 'ain. Kanan kamina atun chupa upíokin chukanun kati 'ain, 11 usakin 'ai mëníokakë 'ain kana 'ëx rabë́ 'imainun achúshi nëtë 'ikëbë kana 'ëx aín bashi Sinaí kakë anu ubuti 'ain, kamabi Israel unibunëan 'ë istánun. 12 Usa 'ain kamina bashi tanain buinarakin 'unánti 'oti 'ain, anúan unikama inútisama okin. 'Imainun kamina unikama ësokin kati 'ain, uinu 'ikë uníxbi ka aín bashi mapërakëtima 'ikën, 'imainun ka anu unántiokin sënë́onkë a 'urama kuantima 'ikën, uix kara a 'uruma kuania ax ka bamakë 'iti 'ikën. 13 Usa 'ain ka uínbi axa ñunshikiani bashi tanain kuankë a mëëtima 'ikën, ax ka maxaxan 'anan masibunën 'akë 'iti 'ikën. 'Ën kana 'unanima uix kara 'unántiokë a inui kuania ax ka uni 'imainun ñuinanëxbi bamakë 'iti 'ikën. Usa 'ain ka ui unikamax kara aín bashi mapërakëtisa tania ax carnero mancha banoia kuati aín bashinu mapërakëti 'ikën.

14 Ësakin Diosan kakëx aín bashinuax taramëbutankëxun ka Moisésnën usakian Diosan a rabinux usai 'iti banakama ñuixunkin kamabi Israel unibu kakëxa. Kakëxun ka kamabi unin aín chupa chukakëxa, 15 'imainun ka Moisésnën ësakin kakëxa:

—Upiti mëníokanan kamina rabë́ 'imainun achúshi nëtë 'itamainun mitsun xanu aín nami 'atima 'ain.

16 Usokian kakë rabë́ 'imainun achúshi nëtë sënë́nkëbëa a pë́karakë 'ain ka kanákamë 'ëo sharakirumainun nëtë kuin këxtuira an aín bashi mapuakëxa. Mapukë a mëuküaxa kushiira 'inun aín manë banañu banaia kuati ka kamabi Israel unikamax aín 'ikënuaxbi rakuë́ti bërëkankëxa. 17 Usaia 'ikëbëtan ka Moisésnën kamabi Israel unikama aín 'ikënua chikínbiankin uankëx ka aín bashi Sinaí kakë a tanain sëtëakëxa anuaxa Diosbë mërananti anu. 18 Usakëbë ka kamabi aín bashi Sinaí anua Nukën 'Ibu ubúkë ain meuküax tsi rëkirukë kuinsa 'inun tëxëkiruakëxa. Usaia 'ikëbë ka aín bashikamaxribi munuma shaíkiakëxa. 19 Usaia 'imainun ka aín manë bana okë a munu paian bania kuakëxbi amiribi amiribi 'i kushiira 'inun banakëxa; banamainun ka Diosan abë banakin Moisés kaná banakësai banakin kakëxa.

20 Usai abë banakin ka Nukën 'Ibu Sinaí kakë bashi chairukë anu ubuxun Moisés mapërakënun kixun kakëxa. Kakëx ka Moisés mapërakëakëxa, 21 mapërakëkë ka Nukën 'Ibun Moisés ësakin kakëxa:

—Kuabutankëxun kamina unikama kati 'ain, anu sënë́onkin 'unántiokë a chichaxuma 'anan ka 'ë iskatsikixun sinánbëtsini ukantima 'ikën, 'ë iskatsikiax aí ka atúxbi bamati 'ikën. 22 'Imainun ka axa sacerdote 'iti unikama axribi 'ë 'urama uisatani aín 'ucha mëníokakë 'iti 'ikën, usai 'ikëma 'aish ka 'ë 'urama ai atúxribi bamakë 'iti 'ikën.

23 Kixuan kakëxun ka Moisésnën Nukën 'Ibu kakëxa:

—Mix kamina kian unikamax ka aín bashi Sinaí kakë a mapërakëtima 'ikën, usa 'ain kamina anu ishia bërúnun 'unántionun kian ax ka minanshi 'ikë kixun unikama kanun kamina kian. 24 'Aínbi ka Nukën 'Ibun Moisés kakëxa:

—Aín bashinuax kuabútëkënxun kamina Aarón biti 'ain, bitsini kamina abë mapë́rakëtëkënti 'ain. Mitsux mapërakëtëkën maínun ka sacerdote 'imainun unikamaxribi 'unántiokë a inui anu 'ëx 'ikë ënu mapërakëkatsi kixun sinani 'utima 'ikën, usai 'iabi kana 'ën bamamiti 'ain.

25 Usakian kakëx ka Moisés anuax taramëbutëkëankëxa, taramëbutëkënxun ka Israel unikama Diosan kakë banakama ñuixunkin kakëxa.