Ax kikësabi oi 'iti mapai rabë́ banakama Diosan 'inan
20
Ësai ka Dios kamabi ënë banakama ñui kiakëxa: 2 'Ëx kana min 'Ibu Dios an, Egipto menuxun tëmërakin ñu mëëiabi mitsu chikían a 'ain. 3 Usa 'ain kamina bëtsi dios 'ë isa kixun rabikinma 'ëshi mitsun Dios 'ikë rabikanti 'ain. 4 Usa 'ain ka uisa ñubi 'anan, a rabinuxun unisa okin ñu unionan, naí manámia 'ikë ñubi tankin 'atima 'ikën, 'ianan ka me 'ukëmëu 'ikë ñubi tankin 'anan parúmpapa 'ukëmëu 'ikë menu 'ikë akama tankin 'atima 'ikën. 5 Usakin 'atankënxun ka a ñukamaribi ami ñanákin rabitima 'ikën, 'ëx kana atun Dios 'ain, 'ianan kana 'ëx nishi kian an ñu 'atima 'atishi kuëënkë aín, bëchikëkama 'imainun aín baba aín bëchikënën bëchikë akama 'atimokin tëmëranun 'imiti 'ain, 6 'aínbi kana an 'ëx kikësabiokin 'akë unikama a xënibua 'aínbia aín rëbúnki kamax ax kikësabira oi 'iti bana a 'aia nuibati 'ain.7 Min Dios 'ikë min rabiti 'ikë 'ë sinanimabi kamina 'ën anë ñui kitima 'ain. Ax 'ën anë ñui 'atimati banakë ax ka 'atima okë 'iti 'ikën.
8 Anun ñu mëëtima nëtë axa bëtsi nëtë kamasama 'ain kamina a nëtë 'ikëbëtan 'ëshi rabiti 'ain. 9 Mapai achúshi 'imainun achúshi nëtë 'imikin kamina anun uisa ñu mëëti karamina 'aisatani anun kamabi ñu 'ati 'ain, 10 'aínbi ka mapai achúshi 'imainun achúshi nëtë 'iónx pë́karakë anun ñu mëëtima nëtë 'ikë anun kamina 'ë rabiti 'ain. A nëtën kamina añu ñu mëëtibi 'atima 'ain, mitsun bëchikëkama, min bëchikë xanu, min ñumëmikë uni, an mi ñu 'axunkë xanu, min ñuina, 'imainun min xubunu 'ikë bëtsi menu 'ikë uni akamanbi ka añu ñubi 'atima 'ikën. 11 'Ën kana mapai achúshi 'imainun achúshi nëtë 'imikin 'ëx min 'Ibu 'ixun naí 'imainun me parúmpapa kamabi anu 'ikë ñukama uniokën, usakin uniotankëx kia 'ain ka siete nëtë 'ikëbë anun uni tantiti 'ikën, usai 'ikin kana a upíokin sinánxuni a nëtëx ka bëtsi nëtësama upíira nëtë 'iti 'ikë kiax kana kiakën. 12 Min papan bana kuanan kamina min titan banaribi kuanti 'ain. Usai 'i kamina 'ëx mitsun Dios 'ixun 'inánkë me anu xënibua. 'Aínbi tsóti 'ain.
13 Bëtsi uni kamina 'aisa tantima 'ain.
14 Uni itsin xanu kamina aín nami 'atima 'ain.
15 Unin ñu kamina mëkamatima 'ain.
16 Mibë 'ikë unimi kamina ami këmëi banatima 'ain.
17 Bëtsi unin xubu 'imainun anu 'ikë aín ñukama kamina minan 'inun bisatantima 'ain: usa 'ixun kamina aín xanu an ñu mëëxunkë uni 'imainun an ñu 'axunkë xanu aribi kuëëntima 'ain, 'imainun kamina an 'arakakë ñuinakama, vaca ain asno akamaribi bisatantima 'ain.
Dios mi Israel unikama rakuëa bana
18 Kamabi israel unikaman ka kaná banakë a kuanan manë banañu bana okë aribi bana oia kuakëxa, kuanan ka mëríru mëriruia 'ikë a isanan aín bashinua kuin këxtuira 'ibúkin mapuruia isakëxa; isi rakuë́ti ka aín bashi 'ura atux 'iakëxa. 19 Usai 'ikëbë rakuë́kin ka Moisés kakankëxa:
—Min ishi kamina nu kati 'ain; 'aínbi ka Diosax nukamabë banatima 'ikën, nux këñutima kupín.
20 Ësai kiabi ka Moisésnën kakëxa:
—Rakuë́axma ka 'ik. Dios ax ka asérabi karanuna ami rakuë́ti ax kikësabi oi ami 'uchaima isnuxun nu tani uaxa. 21 Usakin kakëxa Israel unikama bashi 'ura 'imainun ka Moisés amiribishi anua kuin këxtuira tunan 'ikë anu Diosbë banai mapërakëakëxa.
Uisakin kara anuxun ñuina xaroti 'ati 'ikë kixun Diosan ka bana
22 Aín bashinu kuankë ka Nukën 'Ibu Diosan Moisés ësakin kakëxa:
Israel unibu kamina ësakin kati 'ain: Mitsúnbi kamina uisai karana 'ëx naíkamë 'ëonuax banaia kuan. 23 Uisaxunbi kamina rabinuxun kuri 'anan manë uxua 'atankëxun 'ë 'akësa okin uniotankëxun a rabitima 'ain.
24 Anuxun ñuina xaroti achúshi 'akin kamina mebi chaiorukin 'ati 'ain, 'atankëxun kamina 'ë rabikin achúshi fiesta 'akin mitsun 'arakakë ñuina rëtankëxun 'aímai këñutanun mitsun 'ucha kupín 'anan anuxun ñuina xaroti 'ain. Usakin 'aia kana 'ën upíokin sinánxunkin uinu 'ikë menuxunbi kara aín ñuina 'ëmi sinánkin xara oia a menuxun 'akinti 'ain. 25 'Imainun ka anuxun 'ë rabiti maxá 'aisatankin aín 'ipitiu manë xëtokën ramënioxun 'atima 'ikën, usokin 'axun 'akëxbi ka anuxun ñuina xaroti 'akë ax 'aisama 'iti 'ikën. 26 'Ianan ka anuxun 'ë rabiti 'akë ax tapitiñu okin 'akëma 'iti 'ikën, anun kuaruia mitsun nami bëtsi unin istima kupí.