—Aín bashinu mapërakëtëkëni kamina Aarón, Nadab, Abihú 'imainun Israel uni, aín kushibu setenta bëi anu 'ëx 'ikë ënu uti 'ain; 'aínbi kamina 'uramaira obëtsinima 'uriaxëshi atun bëmánanën me tikai tsóbukanun kati 'ain. 2 Mix xëshi kamina anu 'ëx 'ikë ënu uti 'ain; umainun ka raíri axa mibë ukë unikamax 'ë 'uramaira utima 'ikën, 'ianan ka raíri unikama mibë mapërakëtima 'ikën.

3 Ësakin Diosan kakëx kuanxun ka Moisésnën kamabi Israel unikama Nukën 'Ibu kakë banakama ñuixuankëxa:

—Ñuixunkëx ka asábi ka usa 'ain kananuna kamaxunbi Nukën 'Ibun kikësabiokin 'ati 'ain, kiax kikankëxa.

4 Usa 'ain ka Moisésnën Nukën 'Ibun kakësabiokin kamabi bana kuënëokëxa, kuënëoxun ka pëkarakëma 'aínshi nirutankëxun, anuxun a rabiti achúshi ñu aín bashi tanain 'amiakëxa, 'atankëxun ka a rapasu mapai rabë́ 'imainun rabë́ maxax nankëxa, a ka Jacobnën bakë bëchikëkama 'ia ami sinánkin nankëxa. 5 'Atankëxun ka Moisésnën Israel uni bënábu raíri an vaca rëtankëxun Nukën 'Ibu rabikin 'aímai këñutanun unikaman 'ucha kupí xaronan, ñuina xaronun 'amiakëxa. 6 'Amikëxuan rëtia ka xampami Moisésnën aín imi 'itsamashi bitankëxun chukúmashi xampa itsimi manitankëxun, anun anuxun ñuina xaroti 'akë a anskakëxa. 7 'Atankëxun ka Moisésnën anua usaía atux 'iti bana kuënëokë kirika bitankëxun kamabi unían kuamainun isakëxa isia kuati ka kikankëxa:

—Asabi ka añu 'axúnun kara Nukën 'Ibu kia a kananuna 'ati 'ain.

8 Usakin katankëxun xampa itsinu 'ikë imi a bitankëxun unikamami okin anskai ka Moisés kiakëxa:

—Ënë imi mitsumi anskakë ënëx ka Nukën 'Ibun achúshi ñu mitsubëtan mëníokë ax ka asérabi 'iti 'ikë kixun 'akë 'ikën, usa 'ain kamina ënë bana kikësabiokin 'ai aín uni 'iti 'ain.

9 Usokin 'atankëx ka Moisés, Aarón, Nadab, Abihú 'imainun setenta Israel uni aín kushibu bibiani amiribishi aín bashinu mapërakëtëkëankëxa. 10 Anuxun ka axa mapë́rakëkëkama atuinshi Israel unikaman Dios isakëxa: Iskin ka anua nikë ax upíira 'aish chabáchabákikë zafiro kakë a naí kuman bëtsi iskësa 'ikë isakëxa. 11 Usa 'ia iskëxunbi ka Diosan Israel uni aín kushikama a uisabi oma 'ikën, uisabi okëxma ka anuxun pianan xëatankëx atux ubútëankëxa.

12 Nukën 'Ibun ka Moisés amiribishi katëkëankëxa:

—'Ëx anu 'ikë ain bashi anu mapërakëtankëxun kamina anuxun 'ë kaínti 'ain, anuxun kana maxá pará okin 'akë rairi anu ax kikësoi 'iti bana 'imainun a tanti bana anu kuënëokë, anua Israel unibunën uisa ñu kara 'ati 'ikë uisa ñu kara 'atima 'ikë a 'unánti mi 'inánti 'ain. 13 Usakian kakëx ka Moisés nirukiani aín bashi Sinaí kakë anu an 'akinkë Josué a uani kuankëxa. 14 Kuanux pain mëníokakin ka Israelnën kushikama kakëxa:

—Ënuxun kamina nux utamainun kainkanti 'ain, ënu ka Aarón 'imainun Hur mitsubë bërútia a kamina uisai ñu kara 'ikëbëtanbi an mitsu mëníoxunun kati 'ain.

15 Usakin kabiani ka Moisés aín bashi manan kuankëxa, kuankë ka kuinan aín bashi këñunbi mapuakëxa. 16 Mapukëbë ka aín bashi Sinaí kakë anua Nukën 'Ibun kushi ubuti ichutia atun iskankëxa, iskëbëtan ka mapai achúshi 'imainun achúshi nëtën kuinan mapukë 'iakëxa. Mapukë 'ain ka anuxun achúshi nëtë 'itëkënkë anun mapai 'imainun rabë́ nëtë 'ikëbëtan Moisés kuin mëuxun Nukën 'Ibun kuëankëxa. 17 Usakin 'amainun ka Israel unikama ismainunbi ain bashi chairukë anu tsi rëkirukënëan ñu nënkësa 'inun 'ia iskankëxa. 18 Iskëbë ka Moisés aín bashinu 'ibúkë kuin anun atsínkiani mapërakëakëxa, mapërakëtankëx ka anu cuarenta nëtë 'imainun cuarenta imë́ 'iakëxa.