4 Ësai kia kuankin ka Nukën 'Ibun Moisés kakëxa:

—'Ën kana atúan pinun naínu 'ikë piti 'aisamaira 'inánti 'ain. Usa 'ain ka unin kamabi nëtën ain piti biti 'ikën, aín xubunuax chikixun ka achúshi nëtën pitibëtan sënënbi biti 'ikën. Uin kara 'ëx kikësabiokin 'aia isanan kana uin kara 'aima isti 'ain. 5 Mapai achúshi 'imainun achúshi nëtë 'ikëbëtan ka unin, ain xubunuxuan rabë́ nëtën pitibëtan sënë́nbi biti 'ikën, bikin ka achúshi nëtë́an bikë a inumikin biti 'ikën.

6 Usakian Diosan kakëxun ka Moisés 'imainun Aarónën Israel unibu kakëxa:

9 Usakin atu katankëxun ka Moisésnën Aarón kakëxa:

—Kamabi Israel unibu kamina Nukën 'Ibu kakëxun kuati timë́nun kati 'ain, an ka atúxa a ñui 'atimai banaia kuaxa.

10 Kixuan Aarónën atu kakëxun kuakian Israel unikaman bukuxun anu uni 'ikëma me au bësukin iskankëxbi ka bënëtishi nëtë kuinsa mëuxuan, Nukën 'Ibun ain kushin barin 'akësamaira okin pë́kakëx ichutia iskankëxa. 11 Iskëbëtan ka Nukën 'Ibun Moisés kakëxa:

12 —'Ën kana Israel unibu 'ë ñui 'atimai banaia kuan. Usa 'ain kamina ësokin a unikama kati 'ain: Xupibukëbëtan kana a piti nami mitsu 'inánti 'ain. 'Imainun kana ënë pëkarakëbëtan anun puchakimi pikanun pán mitsu 'inánti 'ain. Usakin 'akin kamina 'ëx kana min Dios 'ai kixun 'unánti 'ain.

13 Usa 'ain ka a nëtë ñantabukëbë, 'umpanxonëmë 'ëo anua atux 'ikë, aín xubunubi rikuatsiankëxa, a pëkarakëbëtan iskëxbi ka anua atux 'ikë kuainakëkë sënë́nbi nibitan chabónëkë 'iakëxa. 14 Usa 'ain ka nibí ëski ain kuin nirukëbëtan iskinbi ka ñu upíira 'atsa putu menu rëukukë iskësa anu uni 'ikëma menu 'iakëxa. 15 Usai ñu 'ia iskëma 'aish ka Israel unibu ratuti kanankëxa: “¿Añu kara ënëx 'ik?” Kananiabi ka Moisésnën kakëxa: Ënëx ka Nukën 'Ibun mitsu piti 'inánkë pán a 'ikën. 16 Ësokin 'ën mitsu kanun ka Nukën 'Ibu kiaxa: Usa 'ain kamina mitsu achúshi achúshinën uiti karamina kuëëni 'ati bikanti 'ain, 'imainun ka uiti uni kara aín xubunu 'ia abëtan pitibëtan sënë́inshi bikanti 'ikën, bikin ka achúshi achúshi unin xampa achúshi bikaskin bianan rabë́ xampa bikinbi a inumikin cha bitima 'ikën.

17 Usakin ka Israel unikaman Diosan kakësabiokin 'akëxa. 'Akin ka bëtsin bëtsín chabimainunbi, raírinënribi chukúmashi biakëxa, 18 bikin ka uiti cha biti kara sinánkë 'ikë 'ati chabi biakëxa; usakin bikëx ka an chabikë ainan tëxëima 'ianan an chukúma bikë ainanribi aín piti sënë́nbi 'iakëxa. Usakin bikin ka kamaxunbi atun pitibëtan sënë́nbi bikankëxa.

19 Usakin 'akania ka Moisésnën kakëxa:

—Uínbi ka imë́ishi pinuxun tëxëoxun nantima 'ikën. 20 Ësakian kakëxunbi ka Israel unikama raírinën Moisésnën kakë bana tankima aín piti pëkarakëbëtan pikatsi kixun sinánkin tëxëokëxa; usokëxbi ka xënai chë́ki pisiakëxa. Usakian 'an ka Moisés 'itsaira atumi nishakëxa.

21 Usai 'ia unánxun ka achúshi achúshi unin pëkarakëma 'aínshi, urukian barin xarokëxa chë́kikëmashi aín piti sënë́nbi biakëxa.

22 Usa 'ain ka mapai achúshi 'imainun achúshi nëtë 'ikëbëtan atun xampa buákakin rabë́ nëtë sënën piti kamabi unin rabë́ 'imainun rabë́ xampa biakëxa, usakian Israel unibunën akëbëtan ka aín kushi achúshi achúshinëx ratúkiani anu kuanxun Moisés ñuixuankëxa, 23 ñuixunkëxun ka Moisésnën kakëxa:

—Asérabi ka ësai Nukën 'Ibu kiaxa: Imë́ishi ka sábado nëtë 'ia, ax ka achúshi nëtë anun ñu mëëima 'ianan, anun Nukën 'Ibu rabiti nëtë 'ikën. Usa 'ain kamina imë́ishi piti 'ati sinánxun bëríbi 'aruti a 'aruanan xuiti a xuiti 'ain, 'axun kamina tëxëokë a imë́ishi 'ati mëníokin nankanti 'ain. 24 Ësakin Moisésnën kakëxuan an kakësabiokin imë́ishi pinuxun noonkë ax ka xënai pisianan uisaibi 'iama 'ikën.

25 Usa 'ain ka Moisésnën kakëxa: —Bërí ka anun ñu mëëkinma Nukën 'Ibu rabiti nëtë 'ikën. Usa 'ain kamina ëmanua mitsun piti bitsi kuankinma tëxëonan mi noonkë ashi pikanti 'ain, ënë nëtën kamima a ñu ñubi barikinbi mërakantima 'ain. 26 Bërí kamina mikaman mapai achúshi 'imainun achúshi nëtë sënë́nmikin mitsun piti biti 'ain, 'aínbi kamina uínsaranbi anun ñu mëëtima nëtën mitsun piti bitima 'ain. 27 Usakian Moisésnën kakëxbi ka raíri unikamax anun tantiti sábado nëtë 'aínbi aín piti bari kuanxunbi añu ñubi mërama 'ikën. 28 Atux usai 'ia iskin ka Nukën 'Ibun Moisés kakëxa:

—¿Uínsaran kaina mitsux 'ën bana kuaisama tanan 'ën 'unánmikësabi oi 'iti 'ain? 29 Min kamina kati 'ain, 'ëx Nukën 'Ibu 'ixun kana achúshi nëtë anúan tantiti nëtë 'inan, usa 'ain kana mapai achúshi 'imainun achúshi nëtë anunbi rabë́ nëtë 'imikin piti 'inánti 'ain. Usa 'ain ka uíxbi a nëtën aín xubunuax kuaintima 'ikën. 30 Usakian kakëx ka mapai achúshi 'imainun rabë́ nëtë 'ikëbë kamabi unix kuainima tantiakëxa.

31 Usa 'ain ka Israel unibunën bikin a piti maná kakin anëakëxa. Ax ka uxua 'aíshbi cilantro kakë ñu bëru uxua usa 'aish, buna rëpakëñun mëskuxun pán pikësa 'iakëxa.

32 Nëtë itsin ka Moisésnën ësakin Israel unikama kakëxa: —Nukën 'Ibu ka ësokin 'anun kiaxa, xampa rabë́ buákakin bitankëxun kamina mitsun rëbúnkinëan ësa ñu ka nun chaitiokëkaman anu uni 'ikëma menuxun Nukën 'Ibun Egipto menua chikínbiankin buánkëxun piakëxa kixuan isnun nanti 'ain. 33 Usakin atu pain katankëxun ka Moisésnën Aarónribi ësokin kakëxa:

—Achúshi ñutë bitankëxun kamina anu rabë́ litro maná nanti 'ain. Usakin 'axun kamina anuxun Dios rabiti 'akë anu nanti 'ain, anu nan 'ikë ka nun rëbúnki kamanribi anua isti 'ikën.

34 Aarónën ka Diosan Moisés kakësabiokin, tasánu 'aruxun bunántisa kurin ratakakakë anu 'aruti mëníokin nankëxa, ax ka Diosan atubëtan këñutimokin 'akë achúshi ñu anu nankë 'iti 'ikën.

35 Usakian 'an ka Israel unibunën cuarenta baritia 'imikin manáishi pií anua me sënënakëkë anu uni tsóti pëukukë anu bëbakin maná piakëxa, ax ka Canaán kakë me sënëni kuainakëkë anu 'iakëxa.

36 (Maná tupunkin ka Israel unikaman ñutë chanua 'ikë veinte litrosa maná a achúshi xampami rabë́ litrosa 'itánun tupuankëxa.)