Moisés Dios rabi kanta bana
15
Usa 'ain ka Moisés 'imainun israel unibunën ain 'Ibu Dios a rabi ami kantakin kakëxa:'Ën 'Ibu Dios rabi kana ami kantati 'ain, an ka 'ën iskëma ñu 'akin parúmpapanu kamabi caballo 'imainun anu 'ikë unikama nanë́miaxa.
2 'Ëx ami kantaia ka kuatia, an ka 'ë kushionan ië́miaxa, ax ka Dios 'ën a rabiti 'ikën.
Ax ka 'ën papan Dios 'ikën, usa 'ikë kana asábi ka kakin rabiti 'ain.
3 Nukën 'Ibu ax ka 'akanankë unisamaira 'ikën, ¡usa 'aish ka Nukën 'Ibu ax ain anëira 'ikën!
4 Usa 'ixun ka Nukën 'Ibun parúmpapanu faraónën suntárukama, anun nikë caballonëan nirinkë akama këñunbi nanë́miaxa; ¡Nanë́mianan ka suntárunën kushi ain upíbu parúmpapa xónsa kakë anu nanë́miaxa!
5 Usai 'ia kamabi atux maxá 'ikësai parúmpapa nëbëtsi nanëtia ka baka panarabëkë an biranakin mapuaxa.
6 'Ën 'Ibu, min mëkën mëkeu kushiira 'ixun kamina, an nu 'akatsi 'ikë unikama këñuan.
7 Mix kushiira 'aish atumi nishkin kamina an mimi 'ati makin sinánkë; unikamax basi chushikë në́nkësarishi bakan këñukëx 'inun 'imian.
8 Suñumi kushiira bëkimikëbë ka parúmpapa panárabëti amo rabë́ chairuaxa; chairui ka baka ain nëbë́tsin bëchunkë shaíkima anubi 'iaxa.
9 Ax numi nishkë unikaman ka sinánkë 'iaxa: Uinua karanuna nukúti 'ain, anua nukui kuanuxun kananuna nuiti 'ain, nukuxun 'atankëxun ain ñukama bitankëx kananuna mëtikananti 'ain. Usakin 'ax kananuna asábi 'iti 'ain, nun manë xëtokë a bikin anun 'akin kananuna atu këñuti 'ain.
10 'Aínbi kamina atu suñu kushiira bëkimikin parúmpapanu nanënun 'imian, usai 'i ka baka kushiira nëbë́tsin manë 'ië́ nanë́kësa 'inun nanë́axa.
11 'Ën 'Ibu, ¡uinu 'ikë bëtsi diosaxbi ka mibë sënënima! ¡Uixi ka misaribi chaiira 'ianan upíira 'ixun ñu 'atima 'ai 'uchakëma 'aíma 'ikën! ¡Min kamina a iskëma ñu 'anan ami rakuë́ti ñuribi 'ain! ¡Usa 'ikë kananuna mishi rabiti 'ain!
12 Min kamina min kushínbi. Egiptonu 'ikë unikama bakan mapukin këñunun 'amian.
13 Min kamina min unikama 'itsaira nuibatin, usa 'ixun kamina min kushi chaiira 'ixun nukama ië́mikin 'akian; usa 'ain kamina anuxun mi rabiti xubu anuxun rabikë 'iti 'ain.
14 Usai nux kuania kuati ka bëtsi bëtsi menu 'ikë unikama rakuëtan bamai bërëti 'ikën, usai 'ikëbë ka filisteo unikamaxribi aín sinan bëtsi sinani rakuë́ti 'ikën,
15 usaía 'imainun ka Edomnën suntárunën kushikamaxribi ain ratúkënainshi uinkasmakësa tani 'iti 'ikën, 'imainun ka Moabnën 'apukamaxribi aín ratúkënëinshi bërëti 'ikën, usai 'imainun ka cananeo unikamaxribi bëráma 'iásai kushima aín sinan nëtë́ti rakuë́ti 'ikën.
16 Mix kamina Nun 'Ibu 'ain, atux ka ratuti 'ikën, 'imainun ka rakuëkanti 'ikën, atúxa kuainima maxá 'ikësai bukunun min kushínbi 'iminun kana mi kain, usa 'ain kamina min unikama inútamainun bërúanti 'ain, nukamax kananuna min unibu 'ain.
17 Mix kamina Nun 'Ibu 'ain, minbi kamina upíira me anu nux 'itimi kaískë anu nu buánti 'ain, anu xënibua 'aínbi nux tsónun kamina kaisakën, minbi kamina anuxun mi rabiti xubu 'ati sinánxuankën.
18 ¡Nun 'Ibu mix kamina 'apuira 'aish uínsaranbi këñutima oi tsoti oi uniakën!
María Diosmi kanta bana
19 Faraónën suntárukama anúan 'akanankë caballonën nikinkë akama 'imainun anuaxa 'akanankë atun caballo akamabëbi kuani parúmpapa nëbëtsin 'ikianiabi ka israel unikaman 'Ibun baka atu mapumiakëxa, usai 'imainun ka Israel unibunëx parúmpapa tëarabëti me ëskikë anun kuankësa kiani shitákëxa. 20 Usai 'ikëbëtan ka an bana ñuikë María, Aarónën chirabakën, aín manë sharíkati bitsi sharíkai ransakëxa, ransakëbë a kamabi xanukamaxribi atun manë sharíkati bitsi a nuibiani abë ransakëxa,
21 usai 'ikin ka Maríanën kamabi xanu Dios rabi kantanun ka ukan kixun kai: Nun 'Ibu rabi ësai kantai kiakëxa, an ka nu ië́mikin nun iskëma ñu 'akin faraónën suntárukama aín caballonu 'ikëkama parúmpapanu nanë́miaxa.
'Umpax muka 'ia ñuikë bana
22 Usakin Dios pain an ië́mikëxun rabitankëx sënë́nkë ka Moisésnën israel unikama xónsa kakë parúmpapa kuëbí anuxun kabiankin tsuákarubiankin buánkëxa. Buánkëx ka anu uni 'ikë me aín rëbumi kikiani kuankëxa, usai kuanika rabë́ 'imainun achúshi nëtë 'ikiani kuankinbi ka a xëati 'umpax mërama 'ikën. 23 Usai kuani ka Mará kakë me anu bëbakëxa, bëbakin anua 'ikë 'umpax xëanuxun tankinbi ka muka 'ikë a 'umpax xëama 'ikën. Usa 'ikë ka israel unibunën a me Mará kakin anëakëxa, (ax ka muka ki kikë bana 'ikën).
24 Usa 'ain ka Israel unibunëx ñukákanani Moisésmi 'atimati banai tsuákirui kanankëxa: ¿Añu 'umpax karanuna xëati 'ain? 25 Usai ami 'atimai banakania kuakin ka Moisésnën Nukën 'Ibu isa 'akinun kixun ñukákëxa, ñukákëxun ka Diosan Moisés i pëñanakëkë men menkikë a ismiakëxa. Ismikëxun aín pëñan tsasikin bixun ka Moisésnën 'umpax nu niakëxa, nikëbëshi ka muka 'umpax ax xëatisabi 'inun aín muka nëtë́akëxa.
Anuxun ka Nukën 'Ibun israelita unibu tankëxa, tankin ka uisai kara 'ia isnuxun achúshi bana usaía atux 'iti 'inánkëxa. 26 'Inánkin ka kakëxa: 'Ëx mitsun Dios 'ixun kana ësokin mitsun kain, 'ën kuëënkësa okin 'anan, 'ën mi kakë ënë bana tankin ax kikësabiokin 'akëbëtan kana, uisa ñubi an mikama 'atima onun egipcio unikamanu xukësokin xutima 'ain, 'ëx kana Nukën 'Ibu an mitsu uisaibi 'itima okin bërúankë a 'imainun, uinu kaina kuani anuabi mitsu 'ën uni 'ikë bërúanti a 'ain.
27 Ësakian Diosan kakëx kuanx ka Elim kakë, anua mapai rabë́ 'imainun rabë́ xëxá upíira shióbumainun setenta xëbin, 'ikë a baka 'urama anu 'i bërúakëxa.