2 Ësokin kamina israel unikama kati 'ain, kuantëkëntankëxa Pi-hahirot bëtanain Migdol 'imainun parúmpapan nëbëtsionkë Baal-sefón kakë ëma a bëtanain. Anuxun aín chupa këxtú xubusa okin 'atankëxa parúmpapa kuëbí anu bukubunun kamina kati 'ain. 3 Usaími mitsux 'ikëbëtan ka 'apu faraónën sinánti 'ikën: israel unikamax ka uimiu kara kuanti 'ikë kixun 'unánima anu uni 'ikëma menuax kuaínbëkini nitsia kixun. 4 'Aínbi kana 'ënbi faraón aín sinán iruarakin, aín suntárukama mitsux kuania nuitanun xunun sinánmiti 'ain; usakin 'aiabi kana 'ën faraón këñunbi aín suntárukama 'ën kushi ismiti 'ain, 'imainun ka egipcio unikaman 'ëx kana kamabi unikaman 'Ibuira 'ain kixun 'unánti 'ikën.

Usakin ka israel unikama 'akëxa. 5 Usaia atux 'imainun ka Egiptonu 'ikë 'apun Israel unikama ka abatia kixun chaniokania kuakëxa. Usakin chanioia kuati ka 'apu faraón 'imainun an ñu 'axunkë aín unikama atumi sinani kánani kiakëxa: ¿Uisoti karanuna israel unibu kuantanun xuan, uin kara bërí nukama ñu mëëxunti 'ik?

6 Usai pain kanantankëxun ka faraónën aín suntárukama caballonën nikinkë akama mëníonun 'amiakëxa, 'amitankëx ka aín suntárukama buani kuankëxa. 7 Kuankin ka seiscientos caballonën nikinkë anuaxa 'akanankë aín upíirabu bianan kamabi caballonën nikinkë Egiptonu 'ikë buánkëxa, anun ka suntárunën kushikama achúshi achúshinëx kuankëxa. 8 Nukën 'Ibun aín sinan iruaranun 'imikëxun ka faraónën aín suntárukamabëtan, Israel unikama kuania nuiakëxa; Diosan aín kushínbi chikinkëx kuaniabi ka usakin 'akëxa.

9 Nuibiani kuani ka egipcio suntárukama, raírinëx caballonën nikinkë anun kuanmainun raírinëxribi ain caballo anuaxa 'akanankë anúnribi kuankin israel unikama nuibianxun nuküakëxa, parúmpapa kuëbí anua Pi-hahirot 'imainun Baal-sefón kakë ëma a 'ukëmanan atun chupa xubusa okin 'ax anu bukukëbi nuküakëxa. 10 Atu nukui kuania faraón 'imainun egipcio suntárukama 'aisamaira kiania 'urakëo isi ka Israel unibu ratuti 'itsaira rakuë́akëxa, rakuëkin ka munuma banakin Nukën 'Ibu atu 'akinun kixun ñukákankëxa. 11 Ñukákin ka Moisésribi ësokin kakëxa:

—¿Uisati karamina anuaxbi bamanuma Egipto menua nu chikínbëtsinkin anu uni 'ikëma me ënuax bamanun nu bëan? ¿Añu kupín kaina nu ësokin 'an? ¿Uisa kupín kaina nu Egipto menua chikían? 12 Ësai 'iti 'unánxun kananuna Egipto menuxun mi kan: Ënuxunbi egipcio unibu ñu mëëxunun kamina nu ënti 'ain. ¡Usa 'ain kananuna tëmërakinbi atu ñu mëëxuni anu uni 'ikëma menuax bamai utima 'ian!

13 Usai kikaniabi ka Moisésnën kakëxa:

—Kamina rakuë́kantima 'ain. Mitsun kamina 'atima okin sinánkima chuámashirua tankin bëría Nukën 'Ibun mitsu 'iëminuxun ñu 'aia isti 'ain, uínsaranbi kamina egipcio unikama amiribishi bërími iskankësa okin istëkënxuma 'ain. 14 Mitsux kamina 'atimakin sinani bënëtima 'ain, Nukën 'Ibun ka ënë ñukama mitsu mëníoxunti 'ikën.

15 Usa 'ain ka Nukën 'Ibun Moisés kakëxa:

—¿Uisoti kaina min 'ë 'akinun kixun kain? Israel unikama kamina rakuë́tima abi kuanun kati 'ain. 16 Min kamina min tsati bikin parúmpapa paná rabëtanun amiokin sananti 'ain, anúan israel unibu kuantanua me rakati ëskitanun. 17 'Ën kana egipcio unikama aín sinan iruarakin mitsu kuania nuinun 'amiti 'ain; usai 'ia kana 'ën kushi ismikin 'apu faraón aín suntárukama 'imainun kamabi aín caballonën nikinkë anuaxa 'akanankë a kamakëñunbi uisa kushiñu karana 'ëx 'ai kixun isnun ismiti 'ain. 18 Usakin 'ën kushi ismikin 'apu faraón kamabi aín suntáru 'imainun aín caballonën nikinkë anúan 'akanankë a kamakëñunbi 'akë 'ain ka egipcio unibunën 'ëx kana asérabi Israel unibunën 'Ibu 'ai kixun 'unánti 'ikën.

19 Usai israel unibu kuani parúmpapa abu kikiani kuankëbë ka Diosan ángel rëkuë́nkiankë ax atu kaxú tsianakëxa, tsianakëbë ka usaribiti nëtë kuin rëkuë́nkiankë axribi suntárukama a bëarati Israelkama kaxú tsianakëxa. 20 Usakian nëbëtsi rabë́ okin kuinan pë́kakëx ka israel unikamax xabánu 'iakëxa, 'imainun ka egipcio suntárukama ax imë́nu 'ixun iskasmakin a imë́ israel unikama nukunun nukumiama 'ikën. 21 Usa 'ain ka Moisésnën aín tatsi bikin Nukën 'Ibun kakësabiokin parúmpapami okin sanankëxa, usokëbëtainshia Diosan 'imikëx ka amiaxa bari urukë amiax a imë́ suñu kushi bëquinëakëxa. Usai 'ikëbë ka parúmpapa nëbëtsi baka ënanani amo rabë́ chaiira 'inun panárabë́akëxa. Usakin Nukën 'Ibun 'imikëbë ka me ëski rakakëxa, 22 usai baka panárabëti amo rabë́ chairui mëmiu 'ianan mëkeu 'i me ëskikëbë ka anun israel unikama sikarakëkankëxa. 23 Usai 'ikëbë ka kamabi caballonuax 'akanani kuankë 'imainun faraónën suntárukama 'imainun atun caballonën nikinkëkama an atu kaxú 'atsinkiani kuankin parúmpapa nëbëtsin obiankin nuibiankëxa; 24 'aínbi ka pëkarakuatsínkëbëtan Nukën 'Ibun egipcio suntárukama nëtë kuin tsi rëkirukësa anuxun iskin aín caballonën nikinkë akamaxa chakanani masónanun 'imiakëxa; 25 usaia 'inun 'imikian Diosan atun caballonën nikinkëkaman taë menu takáshki ëchikibunun 'imikëbë ka egipcio suntárukama kuankasmakëxa. Usai 'ikëbë ka egipcio suntárukama munuma sharati kikankëxa:

—Israel unikama ëbiani kuanun ka kuan, atun 'Ibun ka anun rabanan në́kin nu 'atimoia.

26 'Aínbi ka Nukën 'Ibun Moisés kakëxa:

—Parúmpapami oi ka mëshpat, amiribishi timë́ti biranankian 'umpaxan egipcio suntárukama atun caballonën nikinkë 'imainun axa caballonuax 'akanankë akama këñunbi mapui baka rakarakëtëkëntanun.

27 Ësakin Diosan kakëxun ka Moisésnën aín tsati bikin parúmpapa mi mësukin sanankëxa, sanankëbë ka pëkarakuatsínkëbë 'umpax anua rakákë anubi rakarakëtëkëankëxa. Usai 'ikëbë abánux kuainiabi ka egipcio suntárukama parúmpapa rakarakëtëkënkin mapuakëxa, usakin ka Nukën 'Ibun atu bakan këñunun 'amiakëxa. 28 Usai amiribishi anuaxa panárabëti ëskikë anubi rakarakëtëkënkin ka 'umpaxan, aín caballonën nikinkë a 'imainun aín caballokama këñunbi israel unibu nuibiani parúmpapa nëbëtsin kikianiabi, achúshira faraónën suntárubi ië́tanuma nanë́mikin këñumiakëxa. 29 Usai 'ikëbëbi ka israel unikama anun kuanun parúmpapa tëarabëti me 'inun ëskikë anun sikarakëakëxa usai 'i ka 'umpax kuëtú 'ikësai amorabë́ chairui bëtsi mëmiu 'imainun bëtsi mëkëu 'iakëxa. 30 Usakin ka a nëtëkaman Nukën 'Ibun israel unibu, egipcio unibunën 'anuxun nuibianiabi ië́miakëxa, ië́mikëxun ka israelkaman kamaxunbi egipcio suntárukama bakan këñúkë parúmpapa kuëbí bëspúbëspuabu isakëxa. 31 Usakian Nukën 'Ibun ain kushin Egiptonu 'ikë unikama 'aia isi ka israel unibu Nukën 'Ibu rabi, ami katamëti rantinpuruni tsóbuti 'ianan Moisésnën kakësabiokin aín bana kuakankëxa.