A isiania Israel unikama kuanti nëtën kuin 'imianan xupibukëbëtan tsi rëkirukësa 'inun Diosan 'imia
13
17 Kuantanun 'apu faraónën xutia ka Israelkama, Diosan anun filisteokaman menu kuanti bai puntë 'anun uánma 'ikën, a baixa puntë 'aish 'urama 'aínbi ka Israel unikama kuaníbi filisteo unikaman 'akëx rakuë́ti 'akananima Egipto menu kuantënkënti sinánkin. 18 Usa 'ain ka Diosan Israel unikama anu uni 'ikëma me anun kuankian parúmpapa xónsa kakë a ratanarati kuanun 'imiakëxa.'Imikëx ka Egipto menuax kuani Israelkaman suntáru kuankësa usarabi kiani kuankëxa. 19 Kuankin ka Moisésnën José ñua aín xo buanuxuan binun bimiakëxa, ñukëma pain 'ixuan aín xukë́nkama Josénën kásabiokin ka Israelkaman usakin 'akëxa. Usakin katankëxun ka ësokinribi kakëxa: Asérabi ka Diosan usakiani kuania mitsu 'akinti 'ikën; 'akinkëx kuankin kamina 'ëx ñua 'aínbi 'ën xo ënë menua bibiankin buánti 'ain.
20 Usakiani Sucot kakë me anuax kuanx ka Israelkama Etam kakë ëma chukúma anu pain 'iakëxa, ax ka anu uni 'ikëma me pëukukë a 'iakëxa. 21 Anuax kuankëbëtan ka Nukën 'Ibun a isiania kuanun kuin nëtën anúan kuanti bai anu rëkuë́nmiakëxa, rëkuë́nmianan ka imë́ribi tsin rëkirukin pë́kakësa 'itánun an imë́ atu kuania pë́kati 'imiakëxa. Usakian 'akëbë ka, nëtën kuananbi imë́ribi kuankëxa. 22 Kuani ka nëtë kuin axa rëkuë́nkiankëbë a ënima atux a isbiani anunbi nëtën kuankëxa, 'imainun ka imë́ribi tsin rëkirukin pë́kakësa 'itanun pë́kanëakëxa.