Ënuax mapai rabë́ nëtë ënë 'uxë 'irukëbëtan ka unin an 'arakakë carnero 'aíma 'ain, cabra achúshi achúshi uni kamaxunbi bëti 'ikën. 4 'Imainun ka uix kara 'itsamashi aín xubunu 'ia an këñukin ñuina nami pisama 'ain ka, xubu 'ibun a 'urama 'ikë uni kuëntankëxun abë timë́xun piti 'ikën, uiti uni kara tupuntankëxun ka atun piti sënë́nbi 'inánti 'ikën. 5 A ñuinakamax ka aín bënë achúshi baritiañu 'aish, uisaibi 'ikëma aín upíira 'iti 'ikën, a kamina carnero bëna 'akima cabra bëna 'ati 'ain. 6 Usa aín ka a ñuina ënë 'uxë catorce nëtë 'itamainun bërúankë 'iti 'ikën, 'imainun ka a nëtë 'ikëbëtan achúshi achúshi Israel unibunën xupibukëbëtan rëti 'ikën. 7 Rëkin ñuina aín imi bitankëxun kamina mitsun xubu anuxumi nami pikë aín xëkuënu 'ikë i, anun atsínkiantinu a unántiokin shiti aín. 8 'Anan kamina aín nami a imë́ ñunantankëxun anun chamiti ñu këñuma 'akë pán 'imainun pëi mukakëñun piti 'ain. 9 'Imainun kamina achúshi aín sanirabi paxa pianan 'aruxun pitima 'ikën. Kamabi ñuinanën maxká 'ain taë 'imainun aín puku akamaribi ka tsinu xuikë 'iti 'ikën, 10 'imainun kamina ëmëishi 'anuxun tëxëokinma ankëkinshi piti 'ain. Pianan kamina 'ain tëxëkëkama a këñukin xaroti 'ain. 11 Ënë nëtëx ka anun kamabi Dios kikë 'ati 'ën mitsu kakë 'ikën, usa aín kamina bërámashi mitsun chupa pañuanan mitsun taxaka tañuanan kuantishi 'ixun bënë́kinshi mitsun tsati mëtikixun piti 'ain, 'anan kamina Pascua kakë nëtë Nukën 'Ibu rabikin ñuina nami xaronan a piti 'akë a piti 'ain. 12 A imë́ kana 'ëx kamabi Egipto menu inúkin kamabi egipcio unikaman xubunua aín rëkuë́n bëchikë 'anan a unikaman ñuinanën rëkuë́n tuákama ñumiti 'ain, 'ëx kana Dios a 'ain. 'Imainun kana Egiptonu 'ikë unikaman rabikë dios 'atima oti 'ain. 'Ëx mitsun 'Ibu 'aish kana ësai kin.

13 Ñuinakan imi ax ka anúnmi mitsun xubu xëkuë anumi 'ikë a 'unántiokin shiti 'iti 'ikën. Usakin 'akin 'ën egipcio unikaman rëkuë́n bëchikëkama këñúmikëbëbi ka mitsun bëchikëkama achúshirabi bamatima 'ikën, imin xubu xëkuë shikë a isi 'ëx amotan inúkëbë ka këñutima 'ikën.

14 Ënëx ka anëtë sinankinmi mitsun 'ë rabikin achúshi fiesta chaiira 'ati 'ikën. Usa 'ain ka ënë bana kikësabiokin ënkinma aín papakaman 'ásabiokin mitsun bëchikëkaman a sinánkin 'ati 'ikën. 15 Ënë nëtë inúkin kamina anun chamiti ñu këñuma 'akë pán mapai achúshi 'imainun rabë́ nëtë sënë́nmikin piti 'ain; usa 'ain ka a nëtë 'ikëbëtan uix kara anun pán chamiti ñu aín xubunu nankë 'ikë an aín xubunua bixun niti 'ikën. Uin kara ënë bana tankima anun chamiti ñu këñun 'akë pán mapai achúshi 'imainun rabë́ nëtë ënën, pia ax ka Israel unikaman a rapasu 'imikima chikínkë 'iti 'ikën. 16 Usa 'ain kamina a nëtë 'irutabakëbëmi timë́kë, a nëtën timëkamë 'ëoxun mapai achúshi 'imainun rabë́ nëtë sënë́nmi timë́xun 'ë rabiti aín. A nëtëkaman ka Israel unikaman aín ñu mëi kuankima, aín piti achúshi achúshi unin a fiesta 'akin piti 'ati 'ikën. 17 Anun chamiti ñukëñunma pán 'ati nëtë 'ikëbëtan kamina mitsun a nëtë sinánkin kamaxunbi timë́xun achúshi fiesta 'akin 'ë rabiti 'ain, a nëtëx ka anun 'ën mitsu Egipto menua chikían nëtë 'iti 'ikën. Usa 'ain ka ënë bana kikësabiokin ënkinma mitsun 'ásabiokin min bëchikë 'imainun min babakaman a sinánti 'ikën. 18 Mitsun kamina anun pán chamiti këñuma 'akë a pikin catorce nëtë sënë́nkë a ñantabukëbëtan, pikin taëoëxanxun kamina a 'uxënbi veintiuno nëtë ñantabukëbëtan sënë́onti 'ain. 19 Usa 'ain ka akëñun pán chamiti ñu, mapai achúshi 'imainun rabë́ nëtë mitsun xubunu 'itima 'ikën, uin kara anun pán chamiti ñu këñun 'axun pán pia ax ka Israel unikama 'imainun bëtsi menu 'ikë 'aíshbi atubë tsókë atúxribi ka chikínkë 'iti 'ikën. 20 Usa 'ain kamina, anun pán chamiti ñukëñun 'akë a nëtën pitima 'ain. Uinu karamina mitsux tsotin anuxunbi kamina, anun chamiti këñuma 'akë pán piti 'ain.

21 Usa aín ka Diosan kakësabiokin Moisésnën Israel uni 'ain kushikama kamiakëxa, kamikëxa aia ka kakëxa: Anu rikianxun kamina Israel unikama mitsun kamaxunbia achúshi achúshi papan carnero bakë bërí kanikë achúshi achúshi unin aín aintsikamabëtan Pascua nëtë inúkin piti rëti bënun kamina kati aín. 22 Rëkin kamina xampa chami aín imi biti 'ain. Bitankëxun kamina sëbunkin hisopo kakë ro pëñan aribi biti 'ain. Bixun kamina ñuina imi ami chabóxun anun kamabi mitsun xubu xëkuë 'imainun itáribi anun 'unánti okin shiti 'ain. Usakin 'atankëx kamina pëkaratisama 'ain mitsun xubunuax chikítima anu pain 'iti 'ain. 23 Usokin 'akë ka Nukën 'Ibun egipcio unikaman rëkuë́n bëchikë bamatanun këñumi inúkinbi xubu xëkuë imin shikë isi ka a 'urama oíma amotan kuainti 'ikën. Usa 'ain ka Nukën 'Ibun an uni bamamitia xukë aín ángel mitsun xubunu atsínun 'imitima 'ikën. 24 Ënëx ka mitsun a tanti bana 'ikën, 'imainun mitsun rëbúnki kamanribi xënibua 'aínbi tanti bana 'ën 'inánkë 'ikën. 25 Usa 'ain kamina Nukën 'Ibun ax kikësabiokin mitsu 'inánti me anu kuanx anu tsókinbi ax kikësabiokin ënë fiesta, kamabi baritia 'irukëbëtan 'ai ami sinánti 'ain. 26 Usakin 'aia ka mitsun bakë bëchikëkaman ënë ñu iskin mitsu ñukati 'ikën: ¿Añu 'anux karanuna ësai timë́ti 'ain? 27 kixuan mitsu ñukákëxun kamina kati 'ain: Ënë ñuinanëx ka Pascua inúkin xaronan, Nukën 'Ibu rabikin 'akë 'ikën. Ënë nëtën ka Egipto mekama oi kuankin egipcio unikaman rëkuë́n bëchikëkama bamamikinbi, Israel unikaman xubu isi a 'urama oíma a uri inúkin Egiptonu 'ikë nun aintsikama uisabi okima ië́miakëxa.

Usakin atun kaia Moisés sënë́nkëbëishi ka Israel unikama rantinpuruni tsóbukin Dios rabiakëxa, 28 usai pain 'ikiani kuantankëxun ka kamabi ñu usakin 'anúan Nukën 'Ibun Moisés 'imainun Aarón kakësabiokin 'akankëxa.

29 A imë́ naëx ka Nukën 'Ibun egipcio unikaman rëkuë́n bëchikëkama këñumiakëxa faraónën rëkuë́n bëchikë aín papa 'ikësaribitia 'apu 'iti aribi amiakëxa, 'imainun ka sipunu 'ikë unin rëkuë́n bëchikë kamakëñunbi 'ain ñuinanën rëkuë́n tuákamaribi këñumiakëxa. 30 Usai 'ikëbë ka ñantan 'apu faraónbë an ñu 'axunkë unikama 'imainun kamabi unikamax niruakëxa, nirui ka 'aisamaira unikamax nitë́xëti ini kamabi Egipto menuax anun paëi rarumakëxa. Usai 'ikëbë ka uinu 'ikë xubunubi unin rëkuë́n bakë bëchikë bamakëmama 'aíma 'iakëxa. 31 Usaia 'ikëbëtan ka a 'imë́bi 'apu faraónën Moiséskëñun Aarón kamiakëxa, kamikëxa aia ka kakëxa:

—Ënuax kamina mitsux 'ën unikama ëbiani, Israel unikama ubani kuanti 'ain. Kuanxun kamina a rabikatsimi kikankë mitsun 'Ibu rabi kuanti 'ain. 32 Kuankin kamina mitsun oveja, vacakama kamabi buani, uisakiani kaina kuainsatani usakiani kuanxun kamina mitsun, Dios ñukákin 'ëribi ñukáxuni kuanti 'ain.

33 Usakin katankëxun ka egipcio unikaman aín menuaxisa kuantanun kixun Israel unikama bënëakëxa, kamabi uníxa këñutisa sinánkin. 34 Usa 'ain ka Israel unibunën anun pán chamiti ñukëñunma tunküakin 'akë harina, ami chë́katia 'akë i pará akëñunbi, ain chupan maranbunkin nëaxun papiakëxa. 35 'Anan ka Moisésnën kakësabiokin, egipcio unikama ain kuri 'akë ñu 'imainun manë uxua 'akë 'imainun chuparibi ñukákankëxa. 36 Ñukatia ka Nukën 'Ibun egipcio unikaman upíokin nuibakin Israelkaman ñukákëxun, ñu 'inaíshinun kixun sinánmiakëxa, usakin aín ñukama 'inántankëxun ka egipcio unibunën Israel unikama kuantanun xuakëxa.

37 Usa 'ain ka Israelkama Ramsés kakë ëma anuax taën kuani Sucot kakë ëma anu kuankëxa. Usa 'aish ka xanu 'imainun uniakë xukama 'akëñuma tupúnkëx, seiscientos mil uni axa suntáruisa uni kamaishi 'iakëxa. 38 Kuankëbë ka atubë bëtsi bëtsi menu 'ikë unikamaxribi kuankëbë 'aisamaira uni kuankin atun 'arakakë ñuina ovejakama vacakama buánkëxa. 39 Usai kuanuxun atun ñu mënioi ka anúan aín piti 'atibi 'aíma 'iakëxa, egipcio unibunëan aín menuax kuantanun chikínkëx, usokëx kuankin ka anun chamiti ñu këñuma 'akë harina Egipto menuxuan mëníokin maranbunkë kachakëma a xuiakëxa.

40 Usa 'ain ka Israel unibu cuatrocientos treinta baritia Egipto menu pain tsóti në́a 'iakëxa, 41 'imainun ka anúan cuatrocientos treinta baritia, aín chaitiokëkama Egipto menu tsónux bëba a nëtë sënë́nkë a nëtënbi ka Israel unibu atún 'Ibun a menua chikíankëxa. 42 A imë́ ka Nukën 'Ibun Egipto menua atu chikinuxun bëruanëakëxa. Usa 'ain ka Nukën 'Ibun a sinánkin a 'imë́ 'ikëbëtan Israel unikaman aín chaitiokëkaman 'asábi okin aín rëbúnkikamanribi Nukën 'Ibu rabikin kamabi baritian usaribi okin 'uxkinma a imë́ bërúankëxa.