—'Aínbi kana amiribishi bëtsi ñu 'atëkënin faraón 'imainun egipcio unikaman isnun. Usa okëxun iskin ka mitsu kuantanun xuti 'ikën, mitsúxbi kuantanun xukinma ka anbi mitsu ënuax kuantanun chikínti 'ikën. 2 'Aínbi kamina Israel unibu bëbu 'imainun, xanukama ësokin kati 'ain, a 'urama 'ikë unikama 'imainun xanukama ain ñu ñukanun kamina kati 'ain, kuri 'akë ñu 'imainun manë uxua 'akë ñukama 'inanuan ñukánun kamina kati 'ain.

3 Nukën 'Ibun ka egipcio unikama Israel unibu nuibairanun sinánmiakëxa. Usa omainun ka faraón an ñu 'axunkë unikamaribi Moisés ain bana tankin cha 'imiakëxa, usomainun ka Egiptonu 'ikë unikamaribi ami rakuë́akëxa.

4 Ashikin ka Moisésnën aín xubunuxun 'apu faraón kakëxa:

—Ësai ka Nukën 'Ibu kiaxa: Ënë ñantan imë́ naëx, kana kamabi Egipto menu kuainakëti 'ain, 5 usai 'ikëbë ka faraónën rëkuë́n bëchikë axa aín papasaribi 'apu 'iti a 'imainun egipcio unikaman rëkuë́n bëchikëkama axribi këñuti 'ikën, 'imainun ka an ñu 'axunkë xanu 'ain rëkuë́n tuá an ñu rëni tëkë aín tuakamaxribi këñuti 'ikën. 'Imainun ka kamabi ñuinakan rëkuë́n tuákamaribi këñuti 'ikën. 6 Usaia 'ikëbë ka kamabi Egipto menuax, uni rarumati sharati inti 'ikën, uinsaranbia anun usai 'iama anun ka usai 'itëkëntima oi 'iti 'ikën. 7 'Imainun ka mitsunmi uisakin kara Nukën 'Ibun egipcio unikama bëtan sënë́ma inun Israel unikama 'imia kixun 'unánun achúshi kamunanbi uni 'anan ñuina israel unikaman 'arakakë ñuina abi banotima 'ikën. 8 Usai 'ikëbë ka an mi ñu 'axunkë min unikama ënu uti 'ikën, usa aín ka rantinpuruni tsóbukin aín 'apu 'akësokin 'ë ñukákanti 'ikën: Ënuax kuankin, kamina min unikama buánti 'ain. 'Usakin 'ë 'akëma 'aish kana kuantima pan 'ain.

Usakin katankëx ka Moisés faraónën xubunuax nishkë 'aish chikíakëxa. 9 Chikíkiani kuankë 'ikë ka Nukën 'Ibun Moisés kakëxa:

—'Apu faraónën ka mitsun kakëxunbi kuaisama tanti 'ikën, usai 'ikëbëtan kana 'ën 'aisamaira atun iskëma ñu Egipto menu 'ati 'ain.

10 Usakian kakëxun ka Moisés 'imainun Aarónën 'apu faraónën ismainunbi an iskëma ñu 'akëxa, 'aínbi ka Nukën 'Ibun usaía 'inun 'imikë 'ixun 'ain nuitu iruarakin faraónën Egipto menu 'ikë Israel unikama kuantanun xuama 'ikën.