—Faraón kamina isi kuanti 'ain, 'ën kana a 'imainun an ñu 'axunkë aín unikama këñunbi aín sinan iruaranun 'imian, usakin kana 'ën kushin ñu 'ai kixuan isnun kana uínsaranbi atun iskëma ñu 'ati aín, 2 usakin 'ën 'aia isá 'ixun kamina min bakë bëchikëkama 'imainun min xutakama ñuixunti 'ain, uisakin karana 'ën egipcio unibumi kuaikin atun uínsaranbi isama ñu chaiirabu 'ën kushínbi 'akë kixun. Usakin 'ën 'akë, 'ain kamina 'ëx kana asérabi Nukën 'Ibu 'ai kixun mitsun 'unánti 'ain.

3 Usa 'ain ka Moisés 'imainun Aarónën anu kuanxun 'apu faraón kakëxa:

—Ësai ka hebreos unikaman Dios kiaxa: ¿Uínsaran kaina 'ëx kana Diosmi rakuë́timami kikë a ëni 'ëmi rakuë́ti 'ain? 'Ën unikama kamina, 'ë rabi kuantanun xuti 'ain; 4 minmi 'ën kakëxunbi 'ën unibu xukëbëtama kana, imë́ishibi kamabi min me tsitsiruia champu uninun 'imiti 'ain, 5 usakin unimikëx 'aisamaira 'ixun nuturukëx ka me istisama 'iti 'ikën. An ka anu pakëkin matsin këñukinbi tëxëokë mitsun ñu 'apákë pikin këñuti 'ikën, 'imainun ka kamabi ni pëi ninu 'ikë kamaribi piti 'ikën. 6 'Ianan ka min xubunu ubakiruanan, an mi ñu 'axunkë unikama atun xubunuribi 'ianan kamabi egipcio unikaman xubunuribi 'iti 'ikën. Uínsaran nëtënbi ka ësai ñu 'ia min papan min xutan nux unitisama 'aínbi isama 'ikën.

Ësai banatankëx ka Moisés 'imainun Aarón faraónën xubunuax kuainakëkiani kuantankëx chikíakëxa. 7 Usakin kabiani kuankëbëtan ka an ñu mëëxunkë unikaman faraón kakëxa:

—¿Urainra kara ënë unikaman nu ësokin 'atima oti 'ik? Usa 'ain kamina mix 'apu 'ixun atun Dios rabia kuantanun xuti 'ain. ¿Mix 'apu 'ixunbi karamina kamabi Egipto me ka 'atimatia kixun isiman? 8 Usakian aín unikaman kakëxun ka faraónën Moisés 'imainun Aarón amiribishi kamiakëxa, kamikëxa anu 'aia ka ësokin kakëxa:

—Asabi ka, mitsun Dios rabi kamina kuanti 'ain. 'Aínbi kamina kuanuxupan uikamax kara mibë kuania 'ë kati 'ain.

9 Ësokian kakëxunbi ka Moisésnën kakëxa:

—Nu kamáxbi kananuna nun Dios rabi kuanti 'ain. Kuankin kananuna uni apan 'imainun bënábu kamabi ënkinma nun bëchikë xanu nukëbënë 'imainun nun 'arakakë ñuina kamabi buani kuaxun kananuna achúshi fiesta chaiira 'akin Nun 'Ibu rabi kuanti 'ain.

10 Kixun kakëxunbi ka 'apu faraónën kakëxa:

—¡'Ën kana asérabi mitsun mi 'atimakin sinania 'unan, këmëkiani kamina kuainsatankanin! ¿Mitsun kaina sinanin min 'Ibu kara mitsubë kuanti 'ikë kixun, 'imainun karana mitsun bëchikëkama buanimi kuantanun xuti 'ain? 11 Mitsun sinánkë usa ka 'itima 'ikën. Usa 'ain kamina uni apan kamáxëshi mitsun 'Ibu rabi kuanti 'ain, usakin 'ati kamina kuëënkanin.

Usakin katankëxun ka faraónën 'ain unikama aín xubunua Moiséskëñun Aarón chikínun 'amiakëxa. 12 'Aínbi ka ësakin Nukën 'Ibun Moisés kakëxa:

—Min pëñan manámi okin kamina min tsatin Egipto me kamami okin sananti 'ain, champu 'aisamaira unia kamabi ënë menu 'ikë ñu 'apákë matsin titan 'akin tëokë abi këñui unitanun 'imiti 'ain.

13 Kakëxuan Moisésnën aín tsati Egipto me kamami okin sanan bëkinkëbëtan, ka Nukën 'Ibun abu bari urukë amixun Egipto menu suñu bëkinun 'imiakëxa, usai ka achúshi nëtë 'imainun achúshi imë́ bëquinëakëxa. A pëkarakëbë ka amiaxa bari urukë amiax bëkikin suñun 'aisamaira champu bënë́kë isi egipcio unikama ratuakëxa, 14 usai 'ikin ka champun kamabi Egipto me tsitsiarakë 'iakëxa. Uinsaranbi ka usai 'iama 'ikën, ësai ka amiribishi champu a nëtë́an 'ikësai 'itëkënuxuma 'aia, 15 'ain ka me istisama 'itánun ankëkin tsitsiruakëxa, usa 'ixun ka champun kamabi me tsitsirukin ñu 'apákë 'ain pëchi 'imainun aín bimiñu 'imainun ni matsin titan 'akin tëokë akamabi këñuakëxa. Usakian 'akëx ka pëi paxa achúshirabi iskëma Egipto menu: 'imainun ninubi pëi paxa 'aíma 'iakëxa.

16 Usakian akëbëtan ka 'apu faraónën Moisés 'imainun Aarón bënëtia unun kamiakëxa, kamikëxa aia ka ësakin kakëxa:

—'Ëx kana min 'Ibu Dios ami 'uchanan mitsumiribi 'uchan, 17 'aínbi kamina ashikin 'ëx mimi 'uchakë ënë 'ëbë mëníonankin min Dios 'ëribi ñukáxunti 'ain, ñukákin kamina champu 'aisamaira ënë kara nëtë́mitima 'ikë ñukáti 'ain, nun ñu 'apákëkama ka 'aisamaira okin këñuia usa aín.

18 Ësakian kakëx 'apu faraónën xubunuax chikítankëxun ka Moisésnën champu nëtëminun Nukën 'Ibu ñukákëxa. 19 Usakian ñukákëxun ka Nukën 'Ibun abu bari kuabúkë amiaxa bëkikë a buinakin amo bëkinun 'imikëxun ka suñun champu kamabi Egipto menua achúshirabi bërutanuma parúmpapa xónsa kakë anu punun sinanxuankëxa. 20 Usakin 'akinbi ka Nukën 'Ibun 'apu faraónën aín nuitu iruarakin Israel unibu xuxuma 'anun sinánmiakëxa.

21 Usa 'ain ka faraónëan Israel unibu xuisamaira tankëbëtan Nukën 'Ibun Moisés kakëxa:

—Kamabi Egipto mea bëánkitanun kamina min mëkën manámi mëshpakin naí mëtunti aín, usakinmi 'akëbë ka bëánkibukë ax mëkënan mëëtisa këxtuira 'iti 'ikën. 22 Kakëxuan Moisésnën aín mëkën manámi sanani mëshpakëbëishi ka kamabi Egipto menu bëánkibukë chaiira 'iakëxa, 23 usaía rabë́ 'imainun achúshi nëtë me bëánkikë 'ain ka uinu 'ikë uníxbi a rapasu 'ikë uni isi kuainima 'ianan uíxbi niama 'ikën. Usai anu 'ikëbëbi ka anua israel unibu 'ikë, aín xubukama xabá 'iakëxa.

24 Usai 'ikëbëtan ka faraónën Moisés kamikëx aia kakëxa:

—Mitsun 'Ibu rabi kamina kuanti 'ain, kuani kamina mitsun bëchikë mitsun xanu buani kuanti aín, 'aínbi kamina mitsun 'arakakë vaca, 'imainun ovejakama buántima 'ain.

25 'Aínbi ka Moisésnën kakëxa:

—Min kamina usai kikínma min ñuina 'arakakë, Nukën 'Ibu Dios rabikinu rëtankëxun xaraoi kuanun nu 'inánti aín, mixmi nun ñuina buánti kuëënkëbëma ka Dios rabikin a 'ati ñuina 'aíma 'iti 'ikën. 26 Usa aín kananuna nun ñuina kamabëbi kuanti aín, nun kananuna 'unánima uiti ñuinaira karanuna Nukën 'Ibu rabikin rënuxun kaisti 'ai kixun. Anuxun nun rabiti anu bëbakëmapain 'ixun kananuna 'unánima añu ñu xarokin karanuna nun Nukën 'Ibu rabiti 'ai kixun.

27 Usai kikëbëtanbi ka Nukën 'Ibun 'apu faraón ashikin aín nuitu iruaranun sinánmiakëxa, sinánmikëxun ka Israel unikama kuantanun xuama 'ikën. 28 Usai 'ibi sinanakin ka faraónën Moisés kakëxa:

—Ënuax kamina kuanti 'ain, kuantankëx kamina 'ë isi utëkënti sinántima 'ain, uínsaran kaina 'utëkëni anun kana 'ën suntárukaman mi 'anun 'amiti 'ain.

29 Kia ka Moisésnën kakëxa:

—Asabi ka min kamina ësakin nu kain. Amiribishi kana 'ën min bëmánan istëkënuxuma 'ain.