—Kuanxun kamina faraón abë banakin ësokin kai kuanti 'ain: Ësai ka hebreo banan banakë unikama aín Dios kiaxa: 'Ën unibu kamina 'ë rabi kuantanun xuti 'ain. 2 Min kuantanun ënkinma, amiribishi bëruntëkënkëbëtan, ka 3 Nukën 'Ibun aín kushínbi mitsun 'arakakë ñuina aín pastonu 'ikëkama maëmikin, aín 'insín kushiira 'imiti 'ikën. 'Imikëbë ka caballo, asno, camello, vaca 'imainun ovejakamax, maërakati këñuti 'ikën. 4 'Aínbi ka Nukën 'Ibun Israelkaman 'arakakë ñuina uisaibi 'inun 'imitima 'ikën, 'imikinmabi ka Egiptonu ikë unikaman 'arakakë ñuinakamaishi maë rakátanun këñumiti 'ikën.

5 Usa 'ain ka Nukën 'Ibu anúan 'ati nëtë ñui, kiakëxa:

—'Ën kana imë́ishibi 'ati 'ain.

6 Usai kionxun ka a pëkarakëbëtan Nukën 'Ibun usakinbi 'akëxa. 'Akëbë ka kamabi egipcio unibunën 'arakakë ñuinakama aín 'insínan 'i këñuakëxa; usai 'ikëbëbi ka israel unikaman 'arakakë ñuinanëxëshi achúshirabi bamama 'ikën. 7 Usaia atun 'arakakë ñuinakama këñúkëbëtan ka faraónën Israel unibunën 'arakakë ñuinakama karaisa uisa 'ikë istánun kixun aín uni xuakëxa, xukëx kuanxun iskëxbi ka achúshi ñuinabi bamakëma 'iakëxa. Usa 'ikë isbiani kuanxuan kakëxunbi ka faraón aín nuitu iruarakin israel unikama kuantanun xuama 'ikën.

8 Usa 'ain ka Nukën 'Ibun Moisés 'imainun Aarón kakëxa:

—Tsi tikakë kininua aín chimapu mësukin bitankëxun kamina, faraónën ismainunbi, manámi mësukin sakati 'ain. 9 Usa okinmi 'akëx ka chimapu ax kuputi, abisi kamabi Egipto me tsitsibiani uninu 'iruanan ñuinakamanuribi 'irui aín nami kamanu chanku chikiti 'ikën.

10 Kakëxun ka Moisés 'imainun Aarónën anua tsi tikakë kininua chimapu bibiani faraón isi kuankëxa. Kuanxun ka anuxun Moisésnën manámi mësukin chimapu sakakëxa, sakakëx ka chimapu ax uninu 'iruanan ñuina kamanuribi 'irui chanku 'inun 'iruakëxa. 11 Usakian Moisésnën 'akëbatan ka an ñunshinan 'amikëxun aín kushin ñu 'akë unikama atunribi usakin 'akatsi kixun sinanibi atúxribi 'ain aintsi egipcio unibu 'ikësaribiti aín namikamanu ankëti chanku 'irukë 'ixun 'ama 'ikën. 12 Usa 'aínbi ka Nukën 'Ibun 'imikëxun aín nuitu iruarakin faraónën Moisés 'imainun Aarónën kakëxun kuaisama tankëxa, Nukën 'Ibun Moisés kakësabiokin.

13 Usa 'ain ka Nukën 'Ibun Moisés kakëxa:

—Imë́ishi pëkarakëma 'aínshi nirukiani kuanxun kamina faraón ësokin kati 'ain: Ësai ka hebreo unikaman Dios kiaxa: 'Ën unikama kamina, 'ë rabi kuantanun xuti 'ain; 14 mi xukëbëtama kana ënu 'atëkënkin ñu 'aisama, mi 'atima onun xukin bëtsin 'akësamaira okin 'ën an mi ñu 'axunkë unikama 'imainun min unikamanu xuti 'ain, ësokin 'aia kamina bëtsi Dios 'ësaribi ka ënë menu 'aíma 'ikë kixun 'unánti 'ain. 15 'Ëx kuëënxun kana 'ën kushi ismikin 'atima okin egipcio unikama achúshi 'insínan këñumikë 'itsían, 'ën usokin 'akëx ka atux ënë menuax ñankáishi 'itánun këñúkë 'itsíanxa; 16 usa 'aínbi kana 'ën kushi ismiti kupín mi uisabi okëma 'ain, kamabi menu 'ikë unían 'ëx kana usa kushiñu 'ai kixun 'unánun. 17 Usakin 'ën 'aia iskinbi kamina, 'ën unikama min kuantanun xuisama tanin. 18 ¡Asabi ka usa 'ain kana! imë́ishi 'ën ësañuishi achúshi matsin tita chaiira bëruñu Egipto me ënuxun unin uínsaranbi isun ñuiama pakënun 'imiti 'ain. 19 Usa 'ain kamina mitsun 'arakakë vaca pastonu 'ikëkama, anua ñun uisabi oisamanu bukunun 'amiti 'ain, matsintita bëruñu ax 'ibúkin ka uni 'imainun ñuina 'ain xubunu atsínmikëma ëman 'ikëkama këñuti 'ikën.

20 Ësokian Nukën 'Ibun kakëx kuanxuan Moisésnën, faraón kakëbë ka an ñu 'axunkë raíri aín unikamax rakuë́akëxa, rakuë́kin ka aín uni raírinën an ñu mëëxunkë uni 'imainun an 'arakakë ñuinakama aín xubunu atsímixun anu nitsíankëxa, 21 'aínbi ka raírinën an asérabi ka usai 'iti 'ikë kixun sinánkëma unikama an aín ñuina 'arakakëkama aín xubunu atsímikima ëman nitsíankëxa. 22 Usa 'ain ka Nukën 'Ibun Moisés kakëxa:

—Naími mësui kamina mëshpati aín, kamabi Egipto menu 'ibúkian matsin unikëñunbi atun 'arakakë ñuina 'imainun kamabi egipcio unibunën atun menu ñu 'apákë 'atima onun.

23 Kakëxun ka Moisésnën, manámi mëshpakin aín tsatin naími sanankëxa usakin 'akëbëshi ka Nukën 'Ibun 'imikëx kanákamë 'ëo mëríru mërirui sharakirukëbëishi ka matsin tita bëruñu menu pakëakëxa. Pakënun 'imikëbë ka kamabi Egipto menu matsintita 'ibúakëxa, 24 usakin 'imikëx ka matsin tita rëukumainun kanákamë 'ëo mërirukë ax në́tëtimaira 'iakëxa. Usai ka uinsaranbia Egipto menu anun matsin tita kushiira pakëama anun usai 'iakëxa. 25 Anu pakëkin ka matsin titan kamabi egipcio unibunën aín menu 'apákë ñukama 'atima okin këñuakëxa: usakin 'akin ka uni 'imainun ñuina kamakëñunbi ñu 'apákë 'imainun a nëtënu 'ikë ikamaribi aín pëñan tsasipakëxa. 26 Usai anu pakëtibi ka Gosen kakë me, anua Israel unibu tsókë anu, matsin tita bëruñu achúshirabi pakëama 'ikën.

27 Usaia 'ikëbë ratúkin ka faraónën Moisés 'imainun Aarón kamiakëxa, kamikëxa aia ka ësokin kakëxa:

—'Ëx kana 'ucha kixun kana 'unanin. 'Ën 'ucha 'imainun 'ën unibu 'uchakë kupín ka ësai ñu 'ia, Nukën 'Ibux ka 'uchakëma 'ikën. 28 'Aisamaira kanákamë 'ëo banai sharakirumainun ka matsi bëruñu nunu pakëtia, usa 'ain kana mitsu kuainsa tania bëruntëkëntima 'ain. Usa 'ain kamina mitsun Nukën 'Ibu nu ñukáxunti 'ain, 'ën mitsu kuantanun xumainun.

29 Ësai kia ka Moisésnën kakëxa:

—'Ëx ënë ëmanuax chikíkian kinshi kana, 'ën mëkën manámi okin Nukën 'Ibu mi ñukáxunti 'ain. Usakin mi ñukáxunkëxun ka matsi bëruñu pakëkë a 'imainun kanákamë 'ëo sharakiru sharakirukë a nëtë́miti 'ikën, usakian 'aia kamina min 'unánti 'ain ënë mex ka Nukën 'Ibun unio 'ikë kixun. 30 'Aínbi kana usaími mix kikëbëtanbi 'ën upíokin 'unanin, mi 'imainun min unikamax ka Diosmi kana rakuë́ti 'ai kixun sinánkëma pain 'ikën.

31 Usai anu pakëkin ka matsi chaiira an xapu upíira lino a uabutiabi 'anan cebada egipcio unibunëan 'apákë a bimiñu 'ikëbi masókin 'atima okëxa, cebada 'apákë ax bërí bimibu kuaimainun ka lino 'apákë ax bërí uábu kuaini 'iakëxa. 32 Usokin 'akë 'aínbi ka trigo 'imainun centeno kakë bimi 'apákë trigo iskësaribi ax uisaibi 'ima amiribishi kotëkëankëxa.

33 Usa 'ain ka Moisésnën faraónbë banatankëx anuax chikíkiani a ëmanuax kuanxun, aín mëkën manámi okin Nukën 'Ibu atu ñukáxuankëxa. Ñukákëbëishi ka matsin tita pakëti 'uí 'ibúkë a 'imainun, kanákamë 'ëo sharakirukë ax bukubuti nëtë́akëxa. 34 Usokin 'akëbëa 'uí 'ibutíma 'ianan matsin tita pakëtima 'imainun kaná banai nëtë́tia isi ka amiribishi 'apu faraón 'uchakëxa. Usai 'uchamainun ka 'ain unikamaribi 'uchakin, aín sinan atiaira iruarakëxa. 35 Usakin aín sinan iruarakin ka faraónën Israel unikama kuantanun xuisama tankëxa, Nukën 'Ibun kakëxuan Moisésnën bëráma kakësabi oi ka usai 'iakëxa.