—Anu kuanxun kamina 'apu faraón kai kuanti 'ain: Ësai ka Nukën 'Ibu kiaxa: 'Ën unikama kamina 'ë rabia kuantanun xuti 'ain. 2 Min xukëbëtama kana 'ën atu 'atima okin kamabi Egipto me tsitsiruia 'uakamë 'ëotanun 'ashá 'imiti 'ain kixun mi kanun ka 'ë kaxa. 3 Usa 'ain ka Nilo kakë baka kubini sëë 'i kukakikëbë anuax 'uáti 'ashá chikiti këñurui, anu mix 'ikë 'apun xubu anubi atsini, anumi 'uxkë anubi atsínti 'ikën, atsíanan ka min unikaman xubunuribi atsini kamabi unin xubunuribi atsíanan ka anuxuan pán 'akë anubi atsínti 'ikën. 4 Usai 'ika minubi këñuruanan, an mi ñu mëëxunkë min uni kamanubi 'iruanan a ëmanu 'ikë unikamanuribi 'ashá këñuruti 'ikën.

5 Ësokin ka Nukën 'Ibun Moisés kakëxa:

—Aarón kamina baka kamami sanankin tsatin xëxá 'imainun 'ian akamami okinribi sananun kati 'ain, usokëbë ka kamabi Egipto me tsitsirui 'ashá anuax chikiti 'ikën.

6 Usakin kakëxuan Aarónën Egiptonu 'ikë bakakamami okin aín tsatin sanankëbë ka bakakamanuax 'aisamaira 'ashá chikíkin kamabi Egipto me tsitsiruakëxa. 7 Usakian 'akëbëtan ka, an ñunshinan kushin 'amikëxun ñu 'akë unikamanribi usaribi okin, 'akëbë ka 'aisamaira 'ashá Egipto menu 'iakëxa. 8 Usai 'ikëbëtan ka faraónën Moisés 'imainun Aarón kamiakëxa, kamikëxa aia ka:

—Mitsun 'Ibu kamina nun menua unikë 'ashá ënëa nëtëminun ñukáti 'ain, usakin mi 'akëbëtan kana 'ën min unikama mitsun 'Ibu rabikin ñuina xaroxuni kuantanun xuti 'ain.

9 Ësokian kakëxun ka Moisésnën 'apu faraón kakëxa:

—'Ë kamina uínsaran karana 'ën Dios mi ñukáxuanan, kamabi an mi ñu mëëxunkë unikama 'imainun min 'aintsi kamanua 'anan min xubunua nëtë́mikin bakanushi 'ashá 'iminun kati 'ain. 10 —Imë́ishibi kamina nëtë́miti 'ain —kixun ka faraónën kakëxa.

Kakëxun ka Moisésnën kakëxa:

—Usakian 'akëbëtan kamina 'unánti 'ain, an nun Diosan 'akësaribi okían an ñu 'akë bëtsi Dios ka 'aíma 'ikë kixun ka Moisésnën kakëxa. 11 Usa 'ain ka 'aisamaira 'ashá ax min 'ikënuax nëtë́ti bakanushi kuanti 'ikën. Usai 'i ka mi ubioima 'ianan, an mi ñu 'axunkë unikama 'imainun min aintsikamaribi ubiotima 'ikën.

12 Usai banatankëx ka Moisés 'imainun Aarón anua 'apu faraón 'ikë xubunuax chikíkiani kuankëxa. Kuanxun ka Nukën 'Ibu abë banakin minmi 'apu faraónën ëmanu xukë 'ashá kamina nëtë́miti 'ai kixun kakëxa. 13 Usakin kakëxun ka Nukën 'Ibun Moisésnën ñukákësabi okin 'akëxa, 'akëx ka 'ashá xubukamanu 'ikë ax me mëníokënu këñumainun ka ninubi këñuakëxa. 14 Këñutia ka anu 'ikë unikaman 'ashá timëkin bukuankëxa bukunkëx ka 'aisamaira 'ashá bamakë ax kamabi a menuax xëisamai pisiakëxa. 15 Usakin 'aia isi aín sinan asábi tani kuëënkinbi ka faraónën, aín sinan atiainra iruarakin Moisés 'imainun Aarónën kakëxunbi kuaisamatankin Nukën 'Ibun Diosan kakësabiokin Israel unikama xuisamatankëxa.

16 Usa 'ain ka Nukën 'Ibun Moisés kakëxa:

—Aarón kamina kati 'ain, aín tsatian me kupúkë nirutanun rishkinun usakian 'akëbë ka anuax 'aisamaira sëbë Egipto menu uniti 'ikën.

17 Usakin ka 'akëxa. 'Akin ka Aarónën aín tsatin me kupúkë rishkiakëxa, usokin 'akëx ka kamabi me kupúkë Egipto menu 'ikë ax sëbë 'ikin uni 'anan ñuinakamaribi piakëxa. 18 Usa 'oia iskin ka an ñunshinan 'amikëxun ñu 'unánkë unikama atúnribi usaribi okin 'akatsi kixun 'akinbi 'akamakëxa. 'Akasmamainun ka sëbën unikama aín ñuina 'arakakëkama këñunbi piakëxa. 19 Usa 'ain 'akamakin an ñu 'unánkë unikaman 'apu faraón kakëxa:

—¡Ënëx ka Diosan aín kushin 'akë ñu 'ikën! 'Aínbi ka faraónnën aín sinan iruarakin, Nukën 'Ibun kakësabiokin kuaisama tankëxa.

20 Ësokin ka Nukën 'Ibun Moisés kakëxa:

—Imë́ishi ka pëkarakëma 'aínshi faraón bakanu kuania, usa 'ain kamina mixribi pëkarakëma 'aínshi nirukiani kuanxun kai kuanti: Ësai ka Nukën 'Ibu kiaxa: 'Ën unibu kamina 'ë rabia kuantanun xuti aín. 21 Min kuantanun xukëbëtama kana 'ën chipë mi ubionan, min unikama 'imainun min xubukamanu xuti 'ain. Usokin 'imikëx ka egipcio unibunën xubukama 'aisamaira chipën nutúruti 'ikën, usakin 'ai ka menubi chipë 'aisamaira 'iti 'ikën. 22 'Aínbi ka anua 'ën uni Israelkama 'ikë Gosen kakë me anu añu ñubi 'aíma 'iti 'ikën. Usa 'ain ka anu achúshi chipërabi 'aíma 'iti 'ikën. Usaia 'ikëbëtan kamina 'unánti 'ain 'ëx kana asérabi min 'Ibu kushiira ënë menu 'ai kixun. 23 Ësokin kana imë́ishibi 'ati 'ain. Usakin 'ën unikama 'akimabi kana min unikama usakin 'ati 'ain.

24 Usakin ka Nukën 'Ibun ax kiásabiokin 'akëxa, 'akin ka chipë nëtë kuin tunan iskësa kuatsinia utanun 'imiakëxa, 'imikëx ka 'apu faraónën xubunu irapain tsitsirui atsíankëxa, atsíanan ka an ñu 'axunkë unikama aín xubunuribi atsíankëxa, atsíanan ka kamabi egipcio unikaman mebi tsitsirui ukin ka. Chipën kamabi Egipto me ñuñuma 'itánun tsitsirukë 'iakëxa.

25 Usai 'ia iskin ka faraónën Moisés 'imainun Aarón kamiakëxa kamikëxa aia ka kakëxa:

—Mitsun Dios ñuina rëxun xaroxunkin rabi kamina kuanti 'ain, 'aínbi kamina nun me ëbiani chikítima 'ain.

26 Ësai kia kuakin ka Moisésnën kakëxa:

—Usakin nun 'akëxbi ka upí 'itima 'ikën, nun Dios rabikinu nun 'akë ñuinakama ax egipcio unikaman iskëx upíira 'iti 'ikën. Usakinnu nun atun rabikë ñuina xaroia iskin ka egipcio unikaman, nukama 'ën sinánkëxun maxaxan rëti 'ikën. 27 Usa aín kananuna anu uni 'ikëma menu rabë́ 'imainun achúshi nëtë 'ikiani kuanti aín, usai anu kuantankëxun kananuna ñuina 'atankëxun xarokin nun 'Ibu Dios, an nu usakin 'anun kakësabiokin 'ai kuanti 'ain.

28 Ësakin ka faraónën Moisés kakëxa:

—Anu uni 'ikëma menu kuantankëxun kamina ñuina rëtankëxun min Dios rabi kuanti 'ain, 'aínbi kamina 'uraira kuantima 'ain. 'Imainun kamina 'ëribi ñukáxunti 'ain.

29 Usakian kakëxun ka Moisésnën kakëxa:

—'Ëx ënuax chikikiankinshi kana 'ën Nukën 'Ibu imë́ishibi chipë minua nëtë́mianan, an mi ñu 'axunkë unikama 'imainun min ëmanu 'ikë unikamanuaribi chipë nëtëminun kati 'ain, 'aínbi kamina amiribishi paránxun Israel unikama aín Dios rabi kuainsama okin bëruntëkëntima 'ain, usa 'ain kamina Israel unikama Nukën 'Ibu rabikin ñuina xarotanun xuti 'ain. 30 Usai banatankëx faraónën xubunuax chikixun ka Moisésnën Nukën 'Ibu ñukákëxa, 31 ñukákëxun ka Nukën 'Ibu Moisésnën ñukákësabi okin chipë faraón 'imainun an ñu mëëxunkë unikamanuaribi nëtë́nun chipë 'imiakëxa. 32 'Aínbi ka usa oia iskinbi faraónën aín sinan iruarakin Israel unikama kuantanun ëinsama tankëxa.