—Ka kuat, 'ën kana mi 'ësaribi 'ixunmi Egiptonu 'ikë 'apu faraónën ismainun ñu 'anun mi kain, 'imainun ka min xukë́n Aarón mix kikësa 'itanun banati 'ikën. 2 Min kamina min xukë́n Aarón 'ën mi kakësokinbi kati 'ain; usakinmi kakëxuan an kakëxun ka faraónën Israel unikama 'ain menuaxa chikitanun kati 'ikën. 3 'Aínbi kana 'ën faraón kakëxunbi kuaisama tankin aín nuitu iruaranun 'imiti 'ain, 'imainun kana uínsaranbi atun iskëma 'itsaira ñu a isia atux rakuë́ti Egipto menu 'imiti 'ain. 4 Usakinmi kakëxunbi ka faraónën kuaisama tankin mitsu xutima 'ikën. 'Ënbi kana usaía 'inun 'imiti 'ain, usa 'ain kana 'aisamaira atun iskëma ñu 'ën kushínbi Egipto me ënu 'akin atu 'atima 'oti 'ain, usa atu okin kana ënë menua Israel unikama aín kushikaman suntáru chikínbiankin uankësa usaribi okin buánti 'ain. 5 Usakin kana 'ën kushi Egiptonu 'ikë unikama ismiti 'ain, usa 'ixun kana Israel unikama chikínti 'ain, usakin 'ën 'akëbëtan ka 'ëx kana asérabi Mitsun 'Ibu 'ai kixun atun 'unánti 'ikën.

6 Usakin ka Moisés 'imainun Aarónën Nukën 'Ibun kakësabiokin 'akëxa. 7 Usa 'ain ka a nëtë́an 'apu faraónbë banai kuankë anu, Moisés ochenta baritiañu 'iakëxa, 'imainun ka Aarón axribi ochenta 'imainun tres baritiañu 'iakëxa.

8 Usa 'ain ka Nukën 'Ibun Moisés 'imainun Aarón kakëxa:

9 —Faraónëan, unin 'akëma ñu achúshi 'anun kakëxun kamina Aarón aín tsati bikian faraónën ismainun menu ninun kati 'ain, kakëxuan menu nikëx ka achúshi runu 'iti 'ikën.

10 Usakian Nukën 'Ibun kakëx ka Moisés 'imainun Aarón 'apu faraón isi kuankëxa, kuanxun ka ësakin kakëxa, 'ën kana Diosan a 'anun 'ë kakësabiokin ñu 'ain: Ësakin faraón kakin ka Aarónën aín unibunën ismainunbi menu aín tsati niakëxa, nikëxëshi ka achúshi runu 'inun 'iakëxa. 11 Usakian 'akëbëtan ka 'apu faraónën ribi an ñu tankë 'imainun an ñu 'unánkë aín unikama kuënxun usaribikinsa 'anun kixun 'amiakëxa: 12 'amikëxun ka atúnribi achúshi achúshi unin aín tsati menu niakëxa, nikëx ka achúshi achúshi tsatix runu 'iakëxa. Usokin 'aiabi ka Aarónën tsati runukë an ñu 'unánkë 'imainun an ñu tankë unikaman tsati runukë a éakëxa. 13 Usa 'oia iskinbi ka faraónën aín sinan iruarakin, Nukën 'Ibun Moisés 'imainun Aarón kakësabiokin aín bana kuaisamatankëxa.

14 Usakin 'akë inúkë 'ain ka Nukën 'Ibun abë banakin Moisés kakëxa:

—Egiptonu 'ikë 'apu faraónën ka aín sinan iruarakin 'ën uni Israelkama kuantanun xuisamatania. 15 'Aínbi kamina imë́ishi pëkarakëma 'aínshi kuantankëxun, Nilo kakë baka kuëbíxun kaini kuanti 'ain, kuankin kamina min tsati axa runuëxankë abi buani kuanti aín. 16 Anuxun kamina faraón mërakin ësakin kati 'ain: hebreo unibunën 'Ibu 'ianan aín Dios an ka ësakin min kanun 'ë kaxa: 'Ën unikama kamina anu uni 'ikëma menu kuantankëxuan 'ë rabitanun xuti 'ain. 'Aínbi kamina bëríbi min an kikësokin 'aisama tanin. 17 Usa 'ain ka, Nun 'Ibu kiaxa: Bërí kamina min 'unánti 'ain, 'ëx kana Nukën 'Ibuira 'ai kixun. 'Ën tsati 'ën tuinkë ënën Nilo kakë baka rishkikëbëishi ka 'umpax imi 'iti 'ikën. 18 Usaia imi 'ikëbë ka bakanu 'ikë ñuinakama këñuti 'ikën, usai 'ikëbëa baka pisikëbë ami kuínsakin ka egipcio unikaman 'umpax xëatima 'ikën.

19 Usakin kanan ka ësokinribi Nukën 'Ibun Moisés kakëxa:

—Aarón kamina aín tuinkë tsati bikian manámi okin anun sananbëkinkin kamabi Egipto menua 'ikë baka, xëxá 'imainun 'ian uinu kara 'umpax 'ikë axbia xëatisama imi 'itánun 'anun kati 'ain. ¡Usakian 'akëbëshi ka anu 'umpax nanti i 'anan maxá 'akë akamanu nankë 'umpax kamáxbi imi 'iti 'ikën!

20 Usakian Nukën 'Ibun kakëxun ka Moisés 'imainun Aarónën an kakësabiokin 'akëxa. 'Akian Aarónën aín tsati birukin anun baka rishkikëbëishi ka 'umpax faraón 'imainun aín unikaman ismainunbi imi 'iakëxa. 21 Usai 'ikëbëa bakanu 'ikë ñuinakama këñúkëbë ka 'umpax pisiakëxa, usai 'ia ka egipcio unibunën xëatisama 'ikë 'umpax xëama 'ikën. Usaia 'ikëbë ka kamabi Egipto menu 'ikë 'umpax imi 'iakëxa.

22 Usakian 'akëbëtan ka egipcio unibu an ñu tankë 'imainun an ñunshinan kushin ñu 'akë a unikamanribi usaribi okin 'akëxa, 'akëbëtan ka faraónën aín sinan iruarakin Moisés 'imainun Aarónën kakëxunbi Nukën 'Ibun kakësokin aín bana kuaisama tankëxa. 23 Usakian 'aia isíbi ka faraón aín xubunu atun 'akë ñu asérabi ka ënë ñukama 'ikë kixun sinanima kuankëxa, 24 usai 'ikëbëtan ka kamabi egipcio unibunën Nilo kakë baka kuëbí anua 'umpax biti upí kini 'akëxa, bakanu 'ikë 'umpaxkama xëatisamaira 'ain.

25 Usai 'ian ka mapai achúshi 'imainun rabë́ nëtë 'inukëbëtan Nukën 'Ibun amiribishi 'umpax imi 'ikë a nëtë́miakëxa.