—Bërí kamina uisakin karana 'apu faraónën kuëënkimabi 'ën kushinbi 'amikëxun mitsu xunun 'ami isti 'ain, usa 'aínbi kana anbia mitsu aín menua xunun sinánmiti 'ain; usa 'ain ka, anbi mitsu ënuax kamina kuanti 'ain kixun kati 'ikën.

2 Amiribishi ka Diosan abë banakin Moisés katëkëankëxa:

—'Ëx kana min 'Ibu 'ain. 3 Usa 'ikë ka min chaitiokë Abraham, Isaac 'imainun Jacob akaman 'ëx kana kamabi kushiñu Dios a 'ai kixun 'unánkëxa, 'aínbi kana asérabi 'ën anëira a atu 'unánmiama 'ain: 'Ëx kana min 'Ibu a 'ain. 4 Usa 'ixun kana këñutima okin achúshi ñu atu 'axuan, 'akin kana Canaán kakë me a 'inánuxun atu kakën, ax ka anu paian bëtsi menu 'ikë unikama 'ikësai 'itsama baritia anu tsóa a 'iakëxa. 5 Usa 'ain kana Israel unikamax bërí 'itsaira tëmëraia 'unan, 'imainun ka egipcio unibunën ñu mënun ubíokin 'amia, usa 'ain kana 'ën unikamabë mënionani kia a sinan. 6 Usa 'ain kamina Israel unibu anu kuanxun kai kuanti 'ain, 'ëx min 'Ibu 'ixun kana tëmëramikian ñu mëëkë anua chikínti 'ain. Usa 'ain kana 'aisamaira egipcio unibunën ñu mëëmikin tëmëramikë anua chikínti 'ain; 'imainun kana 'ën kushi atu ismikin 'ëx upí 'ixun mitsu 'akësamaira okin atu tëmëramiti 'ain; 7 tëmëramianan kana mi kamaxmi 'ën uni 'ikë mitsu ië́miti 'ain, 'ëx kana mikaman Dios 'ain. Usakin 'akëbëtan ka 'ëx kana mitsun 'Ibu Dios 'ain kixun 'unánti 'ikën, usa 'ain kana 'ën egipcio unibunëan amiribishi tëmëramikin ñu mëëmitëkëntima okin mitsu 'imiti 'ain. 8 Usa 'ain kana a me 'inánuxun 'ën Abraham, Isaac 'imainun Jacob akama ká me mitsunanbi 'inun 'inánti 'ain. 'Ëx kana mitsun 'Ibu 'ain.

9 Ësokian kakëxun ka Moisésnën usakian Diosan kakë banakama israel unikama ñuixuankëxa, ñuixunkëxunbi ka 'aisamaira ñu mëi atsanxun aín bana kuaisama tankankëxa. 10 Usai 'ikankëbëtan ka Nukën 'Ibun Moisés kakëxa:

11 —Anu kuanxun kamina Egiptonu 'ikë 'apu faraón Israel unikama kuantanun xunun kai kuanti 'ain.

12 'Aínbi ka Moisésnën Nukën 'Ibu katëkëankëxa:

—Uisaxunbi ka israel unibunën 'ën kakëxun 'ën bana kuaisamatania; ¿uisaxun kara 'ën kakëxun faraónën kuati 'ikën, 'ëx upitira banakë unima 'ain 'ën bana kuati 'ik?

13 Ësokin katankëxun ka Nukën 'Ibun Moisés 'imainun Aarón israel unibu kanan, faraón katabakin katánun kixun xuakëxa, Diosan ka asérabi un kaxa nun kananuna israel unibu egipcio me ënua chikínti 'ai kixun.

28 Anúan abë Egipto menuax banakë a nëtën ka Nukën 'Ibun Moisés, 29 kakëxa:

—'Ëx kana min 'Ibu 'ain. Usa 'ain kamina Egiptonu 'ikë 'apu faraón, 'ën mi kakë kamabi banakama ñuikin kati 'ain.

30 'Aínbi ka Moisésnën katëkëankëxa: