—Kuanxun ka ësai ka Israel unikaman Dios kiaxa kixun kakëxa: 'Ën unikama kamina anu uni 'ikëma menu kuanxuan achúshi fiesta 'akin 'ë rabitanun xuti 'ai kixun mi kanun ka 'ë kaxa kixun kakëxa.

2 'Aínbi ka faraónën kakëxa:

—¿Ui kara min 'Ibu ax 'ik? ¿'Ën karana an kakëxun aín bana tankin israel unikama kuantanun xuti 'ain? ¡'Ën kana min 'Ibu 'unaniman, usa 'ain kana israel unikama kuantanun xutima 'ain!

3 Usakian kakëxun ka a rabëtan kakëxa:

—Usama ka ax ka hebreo unikaman Dios 'ikën, usa 'aish ka numi chikirakëaxa; usa 'ain kananuna anu uni 'ikëma menu kuanti 'ain, ax ka rabë́ 'imainun achúshi nëtë 'ikiani kuanti 'ikën, anuxun kananuna nun 'Ibu Dios ñuina rëtankëxun xaroxunti 'ain, usakin 'axunkëxuma ka nukama 'insínan këñumianan bëtsi unikaman nubë 'akanankin këñunun nu 'amiti 'ikën.

4 'Aínbi ka Egipto menu 'ikë 'apun Moisés 'imainun Aarón kakëxa:

—¿Uisa kupín kaina min unikama aín tëëti ëmitisa tanin? ¡Abi kamina mitsun ñu mëëti ënkinma 'ati 'ain, kixun ka faraónën kakëxa!

5 Ësakinribi ka faraónën amiribishi katëkëankëxa:

—Bërí ka ënë menu 'aisamaira Israel unibu 'ikën, ¿Min kaina atun tëëti ëmitisa tanin?

6 A nëtënbi ka faraónën an bërúanxun unikama ñu mëëmikë 'imainun, an ñu mëia bërúankë aín 'apukama ësokin kakëxa:

7 —Bërí kamina Israel unikama ladrillo 'ati me tëikëñun mëskuti basi 'inántima 'ain, atun 'akësabi okían 'anun. Kamina kuantankëxuan atúnbi basi binun kati aín. 8 'Aínbi kamina atun 'akësabi okían uiti 'itsa kara 'aia, ati 'itsabi bërí 'anun atu 'amiti 'ain. Achúshi ladrillorabi ka sënëmamitima 'ikën, a unikamax ka chikish 'ikën, usa 'aish ka atux munuma banai kuënishi kia: Nukën 'Ibu Dios rabikin ñuina rëxun xaroxuni kuantanun kamina nu xuti 'ain kiax ka kikania. 9 Usa 'ain kamina a unikama mitsun 'akësamaira okin bërí tëmëramikin ñu mëëmiti 'ain; usokin 'akëxun ka ñu mëëkin uisa bana kara kuatia abi asérabi ka a bana 'ikë kixun sinántima 'ikën.

10 Ësokian 'apu faraónën kakëx ka an ñu mëia bërúankë unikama 'imainun aín kushikama, ax unikama kai kuankëxa:

—Kuanxun ka kakëxa, 'apu faraónën ka bërí ladrillo 'ati basi mitsu 'inanxuma 'anun nu kaxa. 11 Usa 'ain kamina bërí kuantankëxun mitsúnbi uinua kaina mërai anua basi biti 'ain. 'Aínbi kamina mitsun 'akësabi okin uiti 'itsa karamina atu 'axun 'inanin ati 'itsa ladrillobi 'axun achúshirabi sënëmamikinma 'inánti 'ain.

12 Ësakian kakëx ka Israel unibu Egipto mekamanu kuani basi bari abísakëxa, abístankëxun ka basi paxa basi chushikë, 'akësaribi okin 'ati biakëxa. 13-14 Usakian 'aia ka kamabi nëtën an ñu mëia bërúanti faraónën nankë unikaman bënë́kin, uiti 'itsa kara basi 'inánkëxun ladrillo 'aia ati 'itsabia 'anun 'amiakëxa, 'imainun ka Israel unibunën kushikama mëëkin kakëxa:

—¿Uisa 'ixun kaina imë́ishibi 'aíma 'iónxunbi bërámami basi 'inánkëxun 'akankë ati 'itsabi ladrillo mitsun 'akaniman?

15 Usakin atun 'akëxun ka Israel unin kushikaman anu rikianxun 'apu faraón kakankëxa:

—¿Uisa kupín kaina mix 'apu 'ixunbi an mi ñu mëëxunkë unikama 'ikëbi nu usokin 'ain? 16 Bërí ka basi nu 'inankimabi, ladrillo 'anun kixun bënëanan nu mëia. ¡Usakin ka min unikaman nu 'aia!

17 'Aínbi ka faraónën kakëxa:

—Mitsux kamina asérabi chikishan tapunbuira 'ain. Usa 'aish kamina mitsun nikënuaxbi kin: Nukën 'Ibu kananuna ñuina rëtankëxun xarokin rabi kuanti 'ain kiax kikanin. 18 ¡Kamina mitsun tëtinubi rikianti 'ain! Bërí kananuna mitsu basi 'inániman, usa 'aínbi kamina bërámami 'inankësa ati 'itsabi ladrillo 'axun 'inánti 'ain kixun ka kakëxa.

19 Usakian kakëxun ka Israel an ñu mëëmikë aín kushikaman tëiira iskin sinánkëxa: Uisaxun karanuna ladrillo 'itsamashi 'anun kakima bërámanu 'akë 'ati 'itsabi achúshi nëtën 'anun kakëxun 'ati 'ai kixun. 20 Usakin 'apu faraónën kakëx chikikinbi ka Israel unibunën kushikaman Moisés 'imainun Aarón ëmanxuan kainkëxun mërakëxa, 21 mërakin ka atun kakëxa:

—Nukën 'Ibun ka nukamami 'akësaribi okin mi 'atima oti 'ikën. Mi rabëtan 'ucha kupín ka faraón 'imainun 'ain unikama xuamati numi nishkin nukama 'aisatania. Mitsúnbi kamina usakian nu 'anunbi anu kuanxun faraón kan, usa 'ain ka atun usakin nu 'aia.

22 Usa 'ain ka Moisésnën Nukën 'Ibu abë banakin kakëxa:

—'Ën 'Ibu, ¿Uisa kupín kaina min unikama 'atima oin? ¿Uisoti kaina min atunu 'ë xuan? 23 'Ën kana anu uxun mi ñuikin 'ë mi kakë banakama faraón ñuixuan, usa 'aínbi ka an bëríbi min unikama 'atima oti ënkëma 'ikën, usa 'aínbi kamina min atu 'iëminuxun uisa ñubi 'axunkëma 'ain.