2 —¿Añu kara min mëkënumi tuinkë ax 'ik? —kixun ka Nukën 'Ibun ñukákëxa.

—Ënëx ka achúshi tsati 'ikë —kixun ka Moisésnën kakëxa.

3 —Menu kamina min tsati niti 'ain —kixun ka Nukën 'Ibun kakëxa.

Kakëxun ka Moisésnën aín tsati menu niakëxa, nikëxëshi ka aín tsati achúshi runu 'inun 'iakëxa. Usai 'ia isi ka. Moisés a ëbiani uri ki abákëxa, 4 'aínbi ka Nukën 'Ibun Moisés kakëxa:

—Aín inan kamina min mëkënan tuinkin biti 'ain.

Kixun kakëxuan Moisésnën aín inan bikë́xëshi ka runu amiribishi tsati 'iakëxa.

5 —Ënëx ka a iskian asérabi ka Nukën 'Ibu mimi chikirakëaxa kixun 'unánti 'ikën, mitsun chaitiokë Abraham, Isaac 'imainun Jacob aín Dios ax ka mimi mëraxa kixun ka atun sinánti 'ikën 6 —kixun ka Nukën 'Ibun kakëxa—. Bërí kamina min mëkën min shikanu nanti 'ain.

Kakëxun ka Moisésnën aín mëkën aín shikan 'ain kutun mëu Diosan kakësabiokin atsímiakëxa, atsímixun amiribishi bitëkënkin iskëxbi ka aín mëkën an nami chëkimikë 'insín shurun shuruanbu 'aish matsi uxuira iskësa 'iakëxa. 7 Usa 'ain ka Diosan kakëxa:

—Min mëkën kamina amiribishi min kutun mëu atsímitëkënti aín.

Kakëxun ka Moisésnën amiribishi aín mëkën aín kutun mëu atsímitëkëankëxa, atsínmixun bitëkënkin iskëxbi ka aín mëkën aín namikama iskësabi 'aish upí 'iakëxa. 8 Usokin 'imitankëxun ka Nukën 'Ibun kakëxa:

—A painmi 'akë ënë iskinbi asérabi ka kixun sinánkima ka bëtsi ñumi 'atëkënkëbëtaira a iskin asérabi ka kixun sinánti 'ikën; 9 'aínbia usa ka kixun sinanan min kakëxun kuaisama tánkin ënë ñu rabë́ iskinbi usa ka kixun sinánkankëbëtama kamina, 'umpax bakanua bixun menu chikuti 'ain. Usakin 'umpax bakanua bikë a menu anpënkakëxëshi ka imi 'iti 'ikën.

10 —¡Uisati kaina 'ë usakin kai 'ën 'Ibu! —Kixun ka Moisésnën Dios kakëxa—. 'Ëx banati ka tëira 'ikën, 'ëx usai banakë ax ka bëríra usai 'ëx banakëma 'ikën, usa 'ain ka, an mi ñu mëëxunti ënëx bëríra usai 'iama 'aish usaibi banaia. Usa 'ain kana 'ëx banaibi upiti banatima 'ain. 11 'Aínbi ka Nukën 'Ibun Moisés kakëxa:

—¿Uin kara uni anúan banati bana 'inánkëx? ¿Uinma 'ën kana an banañuma 'ianan pabë, bëxuñu 'imianan an unikama an upíokin isnun ismikë a 'ain? 12 Usa 'ain, kamina kuanti 'ain, 'ën kana Egipto menuax banakëbë mibë 'ixun, usakinmi kati bana mi 'unánmiti 'ain.

13 Ësokin katëkënkëxunbi ka Moisésnën munuma banakin kakëxa:

—¡Uisati kaina 'ën 'Ibu 'ixun bëtsi uni xutiman!

14 Ësakian kakëxbi ami nishkin ka Nukën 'Ibun Moisés kakëxa:

—¡Anu ka min xukën, Aarón sacerdote levita uni ax 'ikën! 'Ën kana 'unan ax ka upiti banaia, an ka upiti banakin uni kuëëmia, usa 'aish ka anumi 'ikë anuax mibë mëranankin mi isi 'itsaira kuëënti 'ikën. 15 Usa 'ain kamina abë banakin kamabi 'ën mi kakë banakama ñuixunti 'ain; usa 'ain kana 'ëx abë 'ianan mibëribi unikama kaimi banakëbë mi rabëbë 'iti 'ain, usa 'ixun ka mi ñuikin an unikama kati 'ikën, 'ën kana usakian ñukama 'anun 'unánmiti 'ain. 16 Min kamina abë banakin Aarón 'ëxbi abë banakësa 'inun kati 'ain, usa 'ixun ka Aarónënbi kamabi bana minmi ñuixunkë kamabi unikama kati 'ikën. 17 Usa 'ain kamina min tsati bibiani kuantankëxun anunbi 'ën mi 'anun kakë usakinbi, atun uínsaranbi isama ñukama a isia rakuë́ë kantanun 'ati 'ain.

18 Usa 'ain ka Moisés aín kuku Jetró 'ikëbi Reuel kakinribi anëkë aín xubunu kuantëkëankëxa, kuanxun ka aín kuku kakëxa:

—'Ë karamina Egipto menu kuantëkëntanun xutima 'ain. 'Ën aintsi 'ibukama kara anu tsótaxa kana isi kuainsatanin.

—Usakian kakëxun ka aín kuku Jetrónën asábi ka usa 'ain kamina bërúanx kuantankëxun isi kuanti 'ai —kixun kakëxa.

19 Usa 'ain ka amiribishi Nukën 'Ibun Moisés Madián menuxun kakëxa:

—Kamina Egipto menu kuantëkënti 'ain, ax mi 'akatsi 'ia unikamax ka kamáxbi këñúaxa.

20 Usakian kakëxun ka Moisés aín xanu 'imainun aín bëchikëkama burronu 'arubiani Egipto menu kuankëxa. Kuani ka aín tsati anúan Diosan 'amikëxun bëtsi ñu 'akë a buani kuankëxa. 21 Usa 'ain ka Nukën 'Ibun Moisés bërámabi kakë 'iakëxa:

—Egipto menu bëbaxun kamina 'ën mi, 'anun kakë ñukama 'apu faraónën ismainun an iskëma ñu min tsati anun 'ën mi kakësabiokin 'ati aín. 'Ën kana 'apu faraónëan min kakëxunbi kuaisamatankin aín sinan iruarakin Israel unibu kuantanun xuxunma 'anun 'imiti 'ain. 22 Usa 'ain kamina 'ë ñuikin, faraón kati 'ain: Ësai ka Nukën 'Ibu kiaxa: Israel unibunëx ka 'ën rëkuë́n bëchikësa 'ikën, usa 'ikë kana atu nuibatin. 23 'Ën kana 'ën unikamami 'ë rabia kuantanun xunun mi kan; 'aínbi kamina min kuantanun atu xukëma 'ain, usa 'ain kana 'ën min rëkuë́n bëchikë bamamiti 'ain.

24 Usakian Diosan kakëx ka Moisés aín xanu 'imainun aín bëchikë kamabë anun Egipto menu kuankë bain kuankëxa, kuanbaiti ka anua 'uxti anu bërúakëxa, bërúkë ka ami mërakin a ñantan anua 'ikë anuxun Nukën 'Ibun Moisés 'akatsi 'iakëxa ain bëchikë Guersón kakë abá an kakësabiokin aín nëtokë ñu maxaka tëakin 'unánti okëma kupín. 25 Usa 'ain ka Séforanën achúshi maxá xëtokë bikin anun aín tuákën nëtokë ñu maxaka tëakëxa; tëakinshi ka aín tuákën nëtokë ñu maxaka tëakë anun aín taënu tatikakin Moisés kakëxa: Mix kamina asérabi 'ën bënë 'ain, usa 'ikë kana bamati 'ikëbi mi ië́mia.

26 Usa 'ain ka Nukën 'Ibun Moisés kuantanun kixun ëankëxa. Ën këbë ka Séfora kiakëxa, Moisés ënëx ka 'ën aintsi 'ibu 'ikëbi 'ën bikë 'ikën, usa 'ikë kana bamati 'ikëbi ië́mian.

27 Usakian 'amainun ka Nukën 'Ibun Aarón ësokin kakë 'iakëxa: Anu uni 'ikëma menu kuantankëxun kamina Moisés aia mëranankini kuanti 'ain kixun kakë 'iakëxa. Usakian kakëx ka Aarón Diosan bashi kakë anua Moisésbë mëranani kuankëxa. Kuanxun ka anua mërakin bëtsukukakin biakëxa. 28 Abë mëranantankëxun ka Moisésnën Aarón usakin kanuan Nukën 'Ibun kakë banakama ñuixunkin kakëxa, kanan ka usakian unin iskëma chaiira ñu 'atia Diosan kakë akamaribi ñuixunkin kakëxa. 29 Usakin ñuixunbiani ka a rabëtaxbi anuax kuantankëx Israelkama aín kushibu kamabë timë́akëxa, 30 timë́xun ka Aarónën usakian Nukën 'Ibun Moisés kakë banakama ñuixuankëxa, ñuixunkin ka usakin 'anúan Diosan kakësabiokin atun iskëma ñukama kamabi unían istánun 'akëxa.

31 'Aia iskin ka Israel unikaman asérabi ka kixun sinánkëxa. Sinánkin ka Nukën 'Ibun ka nux 'aisamairai tëmëraia isaxa kixun sinánkankëxa, sinani ka aín bëmánanën memi bëtiki tsóbukin Dios rabikankëxa.