Nukën 'Ibu Diosan Moisés ain anën kuëan bana
3
Moisésnën ka aín kuku Jetró 'ikëbi Reuel kakinribi anëkë uni an 'arakakë ovejakama bërúanxuankëxa, a unix ka sacerdote Madián kakë me anu 'ikë 'iakëxa, achúshi nëtën ka anu uni 'ikëma menu aín kukun ñuina 'arakakëkama buani kuankëxa, kuanx ka Diosan bashi kakë chairukë anu bëbakëxa ax ka Horeb kakë 'iakëxa. 2 Anuax ka Nukën 'Ibun ángel tsi rëkirukësa 'inun mërakëxa, mëratika i muxañu pëñanakëkë a nëbëtsinuax 'iakëxa, 'ia Moisésnën upíokin iskëxbi ka i pëñanakëkë rëkirukë ax këñutima usabi 'ikë isakëxa. 3 Usai 'ia iskin ka sinánkëxa: “¡Uisa ñu kara usaía 'ikë ux 'ikën! Usai 'ia kana ñu iskëma 'ain, kana isi kuanti 'ain, uisa kupín kara i pëñanakëkë ux nëmëtibi këñutima kixun.”4 Sinánbiani kuankian 'urama obianiabi ka Nukën 'Ibun Moisés i pëñanakëkë rëkirukë a mëuxun kuëëankëxa:
—¡Moisés! ¡Moisés!
—Kakian aín anën kuënkëxun ka ënu kana 'ai 'Ën 'Ibu —kixun Moisésnën kakëxa. 5 Usakian kakëxun ka Diosanribi kakëxa:
—'Uramaira ukin kamina 'ë chichabëtsintima 'ain, 'ianan kamina min taxaka a ëchiti 'ain anu 'ëx 'ikë me ënëx ka upíira 'ikën. 6 Kakin ka ësokinribi kakëxa:
—'Ëx kana min chaitiokë aín Dios 'ain 'imainun kana Abraham, Isaac Jacob akaman rabia Dios a 'ain.
Usakian kakëxun kuati ka Moisés aín chupan Dios istisamatani rakuë́ti bëmápuakëxa, 7 'aínbi ka Nukën 'Ibun:
—Asérabi kana 'ën unikama Egipto menuax tëmëraia isan. 'Ën kana an bërúanxun ñu mëëmikë unikama 'ucha kupían tëmëraia kuan, 'imainun kana asérabi 'ën upíokin uisai kara atux tëmëraia kixun 'unan. 8 Usa 'ain kana 'ënbi a isi ubuan, egipcio unikaman 'aisamaira okin tëmëramia kana chikinuxun 'ain. Ënë menua chikínbiankin kana atu me chaiira 'imainun upíira anua 'aisamaira ñuina xuma 'ianan a piti 'itsaira 'imainun buna rëpa 'umpax iskësaira 'ikë anu buánti aín. A mex ka anua cananeobë, hititas, amorreos, ferezeos, heveos 'imainun jebuseos unikama 'ikë anu kana buánti 'ain. 9 Ka kuat, 'ënbi kana egipcio unibunëan 'aisamaira okin tëmëramikin Israel unikama 'atima oia isan. 10 Usa 'ain kamina, mi kuanun mëníokati 'ain, 'ën kana faraónnu kuantanun mi xuti 'ain, usa 'ain kamina 'ën uni Israelkama Egipto menua chikini kuanti 'ain.
11 Ësokian kakëxunbi ka Moisésnën Dios kakëxa:
—¿'Ëx karana añu 'ain? ¿Añu 'ixun karana anu kuanxun faraón Egiptonu 'ikë Israel unibu chikinuxun kai kuanti 'ain?
12 Ësai kia ka Diosan kakëxa:
—'Ëx kana mibë 'iti 'ain, ënëx ka ami unántiokin 'ënbi mi xukë 'iti 'ikën: Egipto menua 'ën unikama chikínkë 'ain kamina kamaxunbi mikaman ënë menuxun 'ë rabiti 'ain.
13 'Aínbi ka Moisésnën kakëxa:
—Asabi ka 'aínbi ka anu kuantankëxun 'ën Israel unibu: Mitsun chaitiokë kaman Diosan ka mitsunu 'ë xuaxa kixun, kakëxunbi ka atun 'ë ñukáti 'ikën: ¿Uisa kara aín anë 'ik? Ësakin ñukákëxun, ¿karana 'ën uisakin kati 'ain?
14 'Imainun ka Diosan kakëxa:
—'Ëx kana axa nëtë́timoi tsókë a aín. Usa 'ain kamina israel unibu kati 'ain: 'Ënbi kana atunu mi xuti kixun kamina kati 'ain. 15 Kanan ka ësokinribi Diosan Moisés kakëxa:
—Ënëx ka 'ën anë uínsarabi nëtë́tima a 'ikën, ënëx ka 'ën anë uínsaran nëtënbi xënibua 'aínbi këñutima a 'ikën. 'Ëx kana mitsun chaitiokëkama Abraham, Isaac, Jacob, akaman Dios a 'ain, an ka mitsu kanun 'ë xuaxa. 'Ën anë ënëx ka këñutima a 'ikën; ënëx ka 'ën anë axa xënibua 'aínbi nëtë́tima a 'ikën.
16 Usa 'ain kamina bënë́kiani kuantankëxun, Israel uni apankama timëtankëxun kai kuanti 'ain: Nukën 'Ibu min chaitiokëkaman Dios, 'imainun Abraham, Isaac Jacob akaman Dios an ka 'ëmi chikirakëkin ësokin 'ë kaxa, 'ënbi kana Egiptonu 'ikë unikaman mitsu 'atimaira oia isan kixun ka 'ë kaxa. 17 'Imainun ka ësokinribi 'ë kaxa, an isa Egipto me anuaxmi tëmërakankë ënua mitsu chikínbiankin anua cananeos, hititas, amorreos, ferezeos, heveos 'imainun jebuseos; unikama 'ikë me anu mitsu buánti 'ikën, ax ka me achúshi anua ñuinanën xumañukama a 'imainun a piti ñu 'itsaira 'ianan ñu 'aisamaira 'ikë a 'ikën. 18 Uni apan kaman ka min kakëxun kuati 'ikën; usa 'ain kamina atubë mix Egiptonu 'ikë 'apu a isi kuanti 'ain, iskin kamina kati 'ain: Nukën 'Ibu hebreos unikaman Dios, an ka 'ëmi chikirakëkin 'ë kaxa. Usa 'ain kamina, nu anu uni 'ikëma menu kuantanun xuti 'ain, rabë́ 'imainun achúshi nëtë 'ikiani kuantankëxun, ñuina xaroxunkin Nukën 'Ibu Dios rabitanun kamina nu xuti aín. 19 'Aínbi kana 'ën upíokin 'unan, Egiptonu 'ikë 'apun ka min aintsikama kuantanun xutima 'ikën, usai 'iabi kana 'ën mitsua xunun sinánmiti 'ain. 20 Usa 'aínbi kana 'ëx kushiira 'ixun 'ën kushi ismikin egipcio unikama bamamikin atun isama ñu 'ati 'ain, usakin 'akin kana anun rakuë́ti ñu uínsaranbi a menuxun isama ñu 'ati 'ain; 'akëbëtan ka mikama anuaxmi kuantanun 'ain menua faraónën mitsu chikínti 'ikën. 21 'Anan kana Israel unikama aín menuax chikitia egipcio unibunën kuania atun ñu 'itsaira 'inainshinun sinánmiti aín; usakian 'inánkëx ka mëkëinshi kuanima ñuñuira kuankanti 'ikën. 22 Usa 'ain ka achúshi achúshi xanun, a rapasu 'ikë 'imainun bëtsi xanukama atubë tsókë aribi aín ñua 'inánun ñukati 'ikën, ñukákin ka upíirabu manë 'akë a 'imainun kuri 'akë akama 'imainun chuparibi a atun tuá bëbu 'imainun xanukamaribi pañumiti ñukati 'ikën, ñukákëxun ka xanukaman ñuñakima mitsu aín ñu 'inainshiti 'ikën, usakin kamina mikaman ñuñuma 'itánun egipcio unibu atun ñu kupíikëira 'imainun upíirabu a bikuanti 'ain.