Moisés bakë́an ñuikë bana
2
Achúshi uni Israelnën rëbúnki Leví kakë uni ax ka, aín aintsikaman bëchikë achúshi xanubë biranankë 'iakëxa, 2 an ka biranantankëxun achúshi bëbu tuá 'itánun tuakëxa, tuatankëxun ka upíira 'ikë nuibakin, aín xubunu rabë́ 'imainun achúshi 'uxë 'imikin unëakëxa; 3 unëkëxia kani aín xubunu unëtisama 'ikë ka, achúshi tasá basion xo 'atankëxun anun 'umpax atsintisama okin, 'ain xabankëkama i bëpín asfalto anun xarabëtan bëtastankëxun, aín namë́nu a tuá 'aruakëxa; 'arubianxun ka Nilo kakë baka kuëbía kookë basion xo chaxkë́bu a tëmú bëspúnkin nankëxa; 4 nantankëxun ka bëbu tuára aín chirabakë kakëxa, uisai kara min rarëbakë 'ia kamina 'urama kuankinmabi isti 'ain.5 Usakian 'akë 'aínbi ka a nëtë xupibukëbë Egiptonu 'ikë 'apun bëchikë xanu chipash 'imainun an ñu 'axunkë xanukama nashi kuankëxa, kuantankëx baka kuëbí nikinbi ka xanu achúshinën, basion xo chaxkë́bu bakanua kookë tëmú bëspúkë tasá mërakëxa. Usakin mërakin ka an ñu 'axunkë xanu achúshi tasá a bitánun kixun xuakëxa. 6 Xukëxun bitsínkin bëia baakakinbi ka a 'ukëmëuküaxa tuá inia kuakëxa, kuatika ka 'apun bëchikë 'itsaira nuibati kiakëxa:
—Ënë tuakëx ka Israel unikaman bëchikë 'ikën.
7 Usa 'ain ka mërakëbë a bërúain nitsaxbi ukin aín chirabakën 'apu faraónën bëchikë kakëxa:
—¿Mi hebrea xanu achúshi an ënë tuá xuma 'amikin, kanioxunun barixunti karamina kuëënin? 8 Kakëxun ka faraónën bëchikënën kakëxa:
—Kamina achúshi xanu bariti 'ain kixun. Usakian kakëx ka xanu chipash ax a tuákën titanubi abákiani kuankëxa, 9 kuanxun kakëxa aia ka faraónën bëchikënën kakëxa:
—Ënë tuá kaina 'ë kanioxunkin bërúanxuntima 'ain, bërúankin kanioia kana mi kupíoti 'ain.
Usokian kakëxun ka aín titan bërúankin kanionuxun a tuára biakëxa, 10 bixun kaniokëxa kani chaia ka xuma 'akë ënia 'ain titan faraónën bëchikë 'inánkëxa, 'inánkëxun ka aín tuása 'ikë kaniokëxa kaniokin ka. “'Ën kana tuá bakanua bian kixun sinánkin Moisés kakin anëakëxa.”
Moisés Egiptonuax Madián kakë menu abáti kuan bana
11 Usai anuax kani aín baritia sënëni ka Moisés faraónën xubunu 'iakëxa, anuax ka achúshi nëtën aín aintsi 'imainun aín kaibu kamaribi isi kuankëxa, Egiptonu 'ikë unikaman 'aisamaira okin ñu mëëmia 'unánkë 'aish. Usakin 'unánx kuankinbi ka egipcio uni achúshinëan aín aintsi achúshi mëía mërakëxa. 12 Mërakin ka unin karaisa isima kixun isbëkinkin isakëxa, iskëxunbia uínbi isiama okin anun rabanan në́ëkin ka aín aintsi an mëëkë egipcio uni 'axun masinu maíankëxa. 13 Usakin 'oonx pëkarakëbë kuantëkënkinbi ka hebreo uni rabëtax mëëanania mërakëxa. Mërakin ka an bëtsi mëëkë uni a kakëxa:
—¿Uisa kupín kaina min aintsibëbi mëëananin? 14 Usakian kakëxunbi ka an bëtsi mëkë hebreo unin kakëxa:
—¿Uin kara mi nun 'apu 'ianan nun kushi 'inun mi 'imiax? ¿Min kaina egipcio unimi 'akësokin 'ë ribi 'ati sinanin?
Ësokian kakëxun kuati ka Moisés rakuë́akëxa, rakuë́kin ka 'ën egipcio uni rëonkë a ka 'unánxa kixun sinánkëxa. 15 Usakian Moisésnën egipcio uni achúshi rëkë a ka faraónën ñuikania kuakëxa, kuaxun ka Moisés aribi 'ati barimiakëxa; 'aínbi ka a bana kuabiani Madián kakë me anu tsóti kuani abákëxa. Usai abáx bëbatankëx ka anua 'umpax bikë kini achúshi rapasu tanti tsóakëxa.
16 Anu ka Reuel kakë Madiánu 'ikë sacerdote 'iakëxa, ax ka mapai achúshi 'imainun rabë́ bëchikë xanu chipashñu 'iakëxa. A nëtën ka xanu chipashkama atux anua 'umpax biti kininua 'umpax bixun anua ñuinakaman 'umpax xëakëkama a uakaxun aín papan ovejakama 'umpax xëami kuankëxa, 17 'aínbi ka an ñuina bërúankë unikaman anua mërakin xanu chipashkama anuaxa kuantanun kixun kakëxa. Usakin kakëbëbi nirukin ka Moisésnën atun rabanan unikama kakin xanukama 'ain ñuina 'umpax 'amiakëxa. 18 Usakian atun ñuinakama 'umpax xëamikëbë ka usai 'ikëxmabi bënëtishi anua aín papa 'ikë anu kuankëxa, kuania ka aín papan atu ñukákëxa:
—¿Uisa kupín kaina usai 'ikëxmabi bënëtishi rikuatsinin?
19 Kixuan kakëxun ka a xanukaman kakëxa:
—Achúshi egipcio unin ka nunun rabanan në́kin an ñuina bërúankë unikaman kaiabi kaxun, nun ñuinakama 'umpax bixun xëamiaxa.
20 Ësakian kakëxun ka Reuelnën kakëxa:
—¿Uinu kara a uni 'ik? ¿Uisa kupín kaina bëkinma ashira ëbëtsian? ¡piia unun ka kuëëntan!
21 Kakëx kuanxua aín bëchikënën bëkë ka, aín papa Jetrónën aín xubunu 'inun kixun Moisés kakëxa, kakëxun ka asábi ka kana min xubunu 'i bërúti 'ai kixun Moisésnën kakëxa. Usai abë basipain 'iaka aín bëchikë Séfora aín xanu 'iti 'inánkëxa, 22 'inánkëxun ka Moisésnën ami achúshi okin bëchixun Guersón kakin anëakëxa, anëtankëx ka kiakëxa: 'Ëx kana achúshi uni bëtsi menu 'ikë 'aish ënë menu 'ikë unin bëchikëma 'ain.
23 Usa 'ain ka 'itsa baritia 'inúkëbë Egiptonu 'ikë 'apu ñuakëxa. Ñuanka, Israel unibunëx 'aisamaira ñu mëëmikëx uisa kupín kara ësokinra nu ñu mëëmia kiax kikankëxa. Ësaia kikania ka Diosan kuakëxa. 24 Usai atux kia kuakin ka Diosan achúshi ñua Abraham, Isaac 'imainun Jacob akamabëtan 'a a sinánkin 'akiankëxa. 25 Usaia 'aisamaira tëmërai kia kuakin ka Diosan uisaira kara atux tsótia kixun 'unánkin 'akinti sinánkëxa.