7 Usakin pain atu katankëxun ka Moisésnën Josué kuënxun kamabi Israel unibunën kuamainun ësokin kakëxa: Min kamina rakuë́tima kushikin ënë unikama a 'inánuxuan sinántëkëntima okin Nukën 'Ibun nun chaitiokëkama ka me a binun 'akinti 'ain. 8 Nukën 'Ibun ka mi kuania 'akinkin ëntima 'ikën, usa 'ain kamina rakuë́kin; kana 'aíma kixun sinántima 'ain.

9 Usa 'ain ka Moisésnën ax kikësabi 'iti bana a kuënëotankëxun sacerdote levita unikama an bunántisa okin 'akë kurin ratakakakë anua achúshi ñu 'ati kikë bana kuënëokë Nukën 'Ibun kirika anu 'arukë an 'iaxun buánkëkama a 'imainun Israel unikaman kushibu atubëtanbia bërúanun kixun 'inánkëxa, 10 'imainun kana ësokinribia 'anun kixun kakën: Mapai achúshi 'imainun rabë́ baritia 'ikëtibi kamina anun mitsun ribin mënioi a nëtë inuti 'uta 'atankëx anu 'ikin achúshi fiesta 'ai 'ikanti 'ain, 11 usa 'ain ka Israelkamaxa xubusa okin 'akë anuxun Dios rabiti anu timëkankë 'ain ka usai ax kikësabi oi 'iti bana kuënëokë a kamabi unían kuamainun ñuiti 'ikën. 12 Usa 'ain ka kamabi Israel unikamax anu timë́ti 'ikën uni, xanu, uniakë 'imainun bëtsi menu 'ikë uni mitsubëa tsókë akamaxbi ka, ax kikësabi 'iti bana 'aia kuati 'ikën, kuankin 'unánkin ka Nukën 'Ibu Dios kikësabiokin 'anan kamabi aín banakama kuënëokë kikësabiokin 'ati 'ikën. 13 Usa 'ain ka mitsun bakë bëchikëkama, an ënë bana kuakëma atúnribi ñuixunkëxun kuankin upíokin 'unani Dios kikësabiokin 'ain upiti xënibua 'aínbi Jordán kakë baka shitákiani kuanxua biti me anu tsókin 'ati 'ikën.

14 Katankëxun ka Nukën 'Ibun Moisés ësokinribi katëkëankëxa: Ka kuat, anun mi ñuti nëtë ka 'urama kuatsinia; usa 'ain kamina Josué kuënbiani mi rabëtaxbi xubusa okin 'akë chukúma anuax 'ëbë mërananti anu kuanti 'ain, 'ën usai 'iti banakama mi ñuixunun. Usakian kakëx ka Moisés 'imainun Josué xubusa okin 'akë anu kuankëxa, 15 kuankë 'ain ka anuax Nukën 'Ibu achúshi nëtë kuinsa anu mërati xubusa okin chupa 'akë aín xëkuënubi nirakëakëxa. 16 Usai nirakëan ka anuxun Nukën 'Ibun Moisés kakëxa: Ënuax 'itsama nëtë 'ikëbë kamina mix ñuti 'ain, usaími 'ikëbëtan ka ënë unikaman 'ën bana kikësabiokin 'akima atúan biti me anu 'ikë unikaman rabikë dios a rabikin 'ë rabiti ënkin achúshi ñu 'ën manutima okin atu 'axunkëkama manukin bëtsi ñu 'ati 'ikën. 17 Usai 'ikëbë xuamati nishkin kana atu ënti 'ain; ëntankëx kana uisaxbi atumi sinántëkëntima 'ain, usa aín ka atunu 'aisamaira ñu 'ikëbë atux tëmërai, kananti 'ikën: ¿Nuxnu ësai tëmërakë ënëx kara mitsun sinánkëx nun Diosnu ënkë kupínnu 'ikë 'ik? 18 'Aínbi kana usai atux 'iti nëtë 'ikëbëa tëmërakëbëbi, 'ëx atian ira atu 'ura 'iti 'ain, usai kana bëtsi dios rabi 'ëmi 'uchakin 'aisamaira ñu 'akëbë 'iti 'ain.

19 Bërí kamina anun kantati bana ënë 'ën mi kamainun kuënëoti 'ain, kuënëotankëxun kamina minbi Israel unibu anun 'ëmi kantanun 'unamiti 'ain, usa 'ain ka a kanta kantakin uisai kara kia kuankin 'ën atu kuainsama tania tëmëramikëxun a sinánti 'ikën. 20 Uínsaran karana aín chaitiokama kásabiokin a menu atsini unun 'imi anun ka sinanatëkëntima okin a anua a piti ñu 'aisamaira 'imainun a xëati buna rëpa 'aisamaira 'ikë, a menuxun puchákin pianan xëai xuakanti 'ikën, usai 'ikinbi 'ë rabiti ënkin bëtsi dios kamaishi rabiti 'ikën, usakin 'ai 'ëmi manukin 'ëx usai 'iti kia banakama manuti 'iti 'ikën. 21 Uínsaran kara 'ën 'imikëx 'aisamaira masátënëi bënëtia anun ka ënë kanta atun sinánti 'ikën, usa 'ain ka atun rëbúnki kamaxribi a kanta sinani anun kantati 'ikën; 'ën bërámabi a 'inánuxun ka me anu atsínxumabi 'atima ñuira 'ati sinania kana atu 'unanin. 22 A nëtënbi kuënëoxun ka Moisésnën Israel unikama a kanta 'unánmiakëxa.

23 Usakian 'akë ka Josué Nunnën bëchikë a Nukën 'Ibun ësokin kakëxa: Josué mix kamina kushi sinanñu 'ianan rakuë́ 'itima 'ain, mix kamina 'ën mi 'akinmainun an Israel unikama a 'inánuxun 'ën ka me anu buani abë kuanti a 'ain. Usa 'aish kana 'ëx mibëbi 'iti 'ain. 24 Usa 'ain ka Moisésnën a tanti banakama kuënëokin sënëonkëxa, 25 'atankëxun ka an bunántisa okin 'akë kurin ratakakakë anua achúshi ñu 'akë kuënëokë 'arukë Nukën 'Ibunan an nikinkë, Levitas unikama aturibi kakëxa: 26 'Ën kuënëokë a tanti bana ënë kamina mitsu 'inámainun bunántisa okin 'akë kurin ratakakakë rapasu anua Diosan achúshi ñu 'akë kikë anu nankanti 'ain, anu nankë ax ka mitsun usai kananuna 'iakën kixun anua 'unánti 'iti 'ikën. 27 'Ënbi kana upíokin 'unan mitsux kamina bana kuati 'unánmaira 'ain; usa 'aish kamina 'ëx mitsubë aínbi Nukën 'Ibumi 'uchakën, ¿Usa 'aish karamina 'ëx ñukëbë uisaira 'ikanti 'ain? 28 Usa 'ain kamina uni an bana 'unánkë unikama 'imainun kamabi ñaká achúshi achúshi unikama ain 'apu 'ën ësokin mitsu kanun timë́ti 'ain, naí 'imainun men ka unin kuakësa 'itánun kuati 'ikën, usa 'ain kana 'ën mitsu ësokin kain. 29 'Ën kana 'unánin 'ëx ñukëbëtan kamina bëtsi bëtsi ñu 'akin 'ën usai 'iti ñuixunkë banakama mitsun ënxun 'ain; 'imainun kana 'unanin mitsun bakë bëchikëkamaxribi ka 'atima ñu 'ai 'itsaira tëmëranuxun 'aia, usai 'ikin kamina mitsun Nukën 'Ibu nishminuxun 'ain kixun ka Moisésnën atu kakëxa.

30 Usa 'ain ka Moisés aín pëukë anuaxbi kantakin pëutankëx kamabi Israel unikaman timëkamë 'ëoxun kuamainun sënën oi kantakin 'unánmiakëxa: