32
Ësai ka Moisés kantai kiakëxa,naíkamë 'ëo 'ëx kia kamina unin kuakësokin kuati 'ain, 'imainun ka 'ëx banamainun menribi unin kuakësokin kuati 'ikën.
2 'Ën 'unánmikë banakamax ka 'uí 'ibúkësaribi 'ikën,
'imainun ka 'ëx kikë bana ënëx 'uí 'ibúti sainkësaribi 'ikën,
'imainun ka kuénkuru bërí 'ibúkin ñu 'apákë chabókë usaribi 'iti 'ikën,
'ianan ka 'umpax tus kikin anu 'ibúkin basi chabokësaribi 'iti 'ikën.
3 'Ëx kana Nukën 'Ibun anë ñui kiti 'ain:
¡Nukën 'Ibu Dios ax ka chaiira 'ianan upí 'ikë
kixun ka unikaman 'unánti 'ikën!
4 Ax ka an nu bërúankë 'ikën;
an 'akë ñux ka upíira upí 'ikën,
an 'akë ñux ka asérabi upí 'ikën.
Ax ka Dios 'aish këmëima asérabi banaia,
¡an ka uínsaranbi an ñu 'atima 'akë uni abi 'atima oima 'aínbi ka ënkinma a unikama 'atima onuxun 'aia!
5 Israel unikama 'imainun kamabi unin bakë bëchikëma upíokin sinanima ñu 'atima 'ai Diosmi banai
kia, usai banai ka aín bëchikë 'isama 'ikania:
6 ¿Mitsun kaina usakin Nukën 'Ibu 'ati 'ain?
Mitsux kamina ñu 'unánkëma 'ain, usa 'aish kamina ñu 'unánkëmabu 'ain.
¿Ax kara min papa 'ianan an mitsu unio ama 'ik?
¡An ka mi uniotankëxun mi anun tsóti 'inánkëxa!
7 Bëráma 'ia ñukama kamina amiribishi sinántëkënti 'ain,
sinánkin kamina uisai kara nëtë ióñu ñu 'iakëxa kixun;
min papa 'ianan min tita ñukánan kamina an bana ñuia
kua uni apankama mi ñuixunun ñukáti 'ain:
8 Achúshi okin ka Diosan ax kushiira 'ixun
unikama amanu amanu kuani bëtsi bëtsi menu tsóti kuanun 'imiakëxa,
'imianan ka uinu kara atun me sënë́nti 'ikë aribi kamabi menu 'ikë unikama 'unánmiakëxa.
'Aínbi ka usakin atu 'anan Israel unibu aín uni 'iti kaisakëxa,
9 usakin ka Nukën 'Ibu Jacobnën rëbúnkikama,
aín uni 'iti kaisakëxa.
10 Usa 'ixun ka anu uni 'ikëma menua 'unánkëxa,
a mex ka 'umpaxñuma 'ianan suñun bëkikin 'atimokë me 'iakëxa;
anbi ka nu bërúankin uisai karanuna 'iti 'ai akama nu 'unánmikin unían 'ain bëru napu bërúankësaribi okin nu bërúankëxa.
11 Nukën 'Ibun ka tëtëkamë 'ëon aín nánua aín tuá usaía nuanti a tamikin aín pëchi shaíkakin bërúankësa usaribiokin, nu bërúankin 'aisama ñu inútisama okin nu 'akiankëxa.
12 Nukën 'Ibun ka aín unikama 'akiankëxa uínbi ka 'akianma 'ikën;
¡Uinu 'ikë bëtsi diosanbi ka 'akianma 'ikën!
13 Anbi ka bëtsi bëtsi bashi 'amibiankin me upíira anúnribi nu buánkëxa,
buánkin ka menuaxia kookë ñu aín bimi pimianan,
maparanu 'ikë buna rëpa nu xëamiakëxa
xëamianan ka 'aisamaira maxá anu kóa olivos aín
biminu 'ikë aín xëni nu 'inánkëxa;
14 'ianan ka vaca xuma 'imainun sëruakin 'akë,
akama 'imainun carnero aín upíirabu kaísun pinun 'amiakëxa,
'anan ka Basán kakë menu 'ikë carnero 'imainun cabra aín
bënëkama aín upíirabu aribi piakën;
pianan kananuna trigo aín bimi upíbu pianan,
uvas baka chëxëokin vino 'akë aribi xëakën.
15 'Aínbi ka Jacobnën rëbúnki, an pitishi sinánkëkama,
'aisamaira pi xuati ñuina rërakati aín rani nibánibákikë usai 'ikinbi, ñuinanëa aín 'ibu aín taën 'akësokin, an unio 'ixunbi Diosan kakëxun kuaisama tankëxa;
usai 'ikin ka an kakëxunbi kuaisamatankin Dios ënkankëxa.
16 Usai 'ikin ka Dios 'aisamaira nishmikin bëtsi ñukama rabikin ax kuëënkëma ñuira 'akankëxa;
17 'anan ka Diosmabi bëtsi ñunshin 'atima ñuina 'axun këñutanun xaroxuankëxa,
a ka uinsaranbia 'unánma 'ixunbi bëríra 'unánkinbi;
aín papakaman rabia 'ikëmabi rabiakëxa,
18 Israel unibu mitsun kamina min papasa 'ixuan mi 'akinkëxunbi manuakën;
Dios an mitsu anumi tsóti 'inánkë a kamina manukankën.
19 Usokëxun isi ka Dios 'itsaira nishakëxa,
nishkin ka mitsun bakë bëchikë bëbu 'imainun xanukama 'akinkima ëankëxa;
20 ëni ka ësai kiakëxa: Bërí kana ami kasuakëkin 'ën atu,
¡uisai kara 'ia isnuxun ënin! Asérabi ka a unikamax 'aisama unibu 'aish,
ami 'unánmakin 'akinsama 'ikën.
21 'Ë kamina diosmabi bëtsi dios rabikin nishmian,
usa 'ain kana 'ënribi mitsu nishmikin 'ën uni 'ikëmabi bëtsi uni 'ën uni 'imiti 'ain, 'imikëbë ka atux 'atima okin sinani nishti 'ikën, ¡usa 'ain kana 'ën bana kuaisama tankë unikama 'ën uni 'imiti 'ain, 'imikëbë ka 'ën unikama atumi nishti 'ikën!
22 'Ëx xuamati nishkë ax ka tsi rëkiruia iskësa 'iaxa, usai 'ikin ka kamabi 'ain bashi chairukë; a menu kookë ñu bimiñu xaronan; 'ain bashi chairukë a tanain 'ikë me anubi tsi rëkirukënën ñu këñukësa usa aín nishkë 'iti 'ikën,
23 atunu kana 'aisama ñukama atux inúnun 'imiti 'ain, 'imikin kana unían aín pia ñuina 'akin nikësa usaribi okin 'ati 'ain;
24 usakin 'akëbë ka 'itsisan 'ianan numinribi këñuti 'ikën; 'ianan ka 'aisamaira 'insín anun këñuti 'ikën; usonan kana ñuina raëkëma pianankë 'imainun runu ax 'akanankë akama an pikëxa këñutanun 'imiti 'ain.
25 'Imianan ka atun bëchikëkama ëma nëbë́tsibia manë xëtokën 'akëx bamanun 'imiti aín, usai 'ikëbë ka xubunuax unikama 'itsaira rakuë́ti 'ikën; usakëbë ka tuá atun bakë bëchikë 'imainun xanu chipashkama, uni xëni 'imainun tuá xúma akamabëbi rakuë́ti bërëi këñuti 'ikën.
26 'Ënbi kana 'ura kuani amami amami abístanun 'imiti sinan, 'aínbi kana usakin 'atima sinántëkëan,
27 'aínbi kana atumi nishkë
unikamaxa 'ëmi kuai kiti 'ikë kixun sinánkin 'akëma 'ain;
'akinma kana atúxa 'ëmi kuai kánani:
Nukën 'Ibun ka atu ësokin 'akëma 'ikën;
nun kushínbi kananuna ësokin 'a kiax kiti 'ikën.
28 Israel ax ka achúshinu ñaká upiti tsóti kuëënkë unibuma 'ikën;
¡usa 'ixun upíokin 'ësëkë 'ixunbi bana parëkë unibu 'ikën!
29 Bana kuakë 'ixun ka, atun kuatsianxa; 'ianan ka uisai kara atux 'iti 'ikë kixun unántsianxa.
30 ¿Uisaxun kara achúshi unira 'ixunbi mil uni abámiakëx? ¿'Ianan kara rabë́ratsu 'ixunbi diez mil uni abámiakëx?
¡Nukën 'Ibun 'akinkinbi ënkëka usakin mitsu 'akëxa!
31 Axa numi nishkë unikamanbi ka upíokin 'unánxa, Nukën 'Ibu Dios ax ka atun dios sama 'aish kushiira kushi 'ikë kixun.
32 Atux ka ñu 'apákë 'atimanën 'atimokin tuákësa 'ikën, usa 'aish ka Sodoma 'imainun Gomorra ëmanu tsóa unikaman rëbúnkinëan uvas muka 'imainun a pi këñuti 'apákë usaribi 'ikën;
33 atun uvas baka bikë ax ka runu 'akanankë aín paësa 'ikën, ¡usa 'aish ka runun 'akëxa aín paënbi uni ñukë 'usaribi 'ikën!
34 Usa 'aínbi kana uisakin kara 'ën unikama 'atima oia kixun manukinma sinanin;
sinánkin kana ñu kupíira kupíkë 'akësaribi okin a manuaxma 'inuxun atu bërúain,
35 Anun usakin 'ati nëtë 'ikëbëtan kana anun uisakin karana 'aisatani usakin 'ati 'ain, anun ka a nëtë sënë́nkëbë 'atima okë 'iti 'ikën. Anun usakin 'ati nëtë ka 'urama 'ikën, ¡'Ianan ka basimashi usai 'iti 'ikën!
36 Usai ka Nukën 'Ibu an kaisa unikama bëtsi bëtsi okin ñu mëëmikëxa
kushiñumasa 'ia iskin 'akinti 'ikën;
usakin ka Nukën 'Ibun uniñumasa 'inua atubë 'ikë unikama 'imainun aín kushibu akama nëtë́ti 'aisamai 'iabi atu 'akinti 'ikën.
37 Usai 'ia iskin ka dioskama 'imainun Israel unikama Diosan an kati 'ikën: ¿Uinu kara mitsun dios amimi katamëanan atun 'akinun kixun ñukánan,
38 a rabikin ñuina xarokin aín nami mitsun ñuina xaroxunkin aín xëni pimianan uvas baka vino 'akë xëanun 'inan atux 'ik? Kixun ka Diosan kakëxa. An ka 'aia 'akini niruti 'ikë. An ka mitsu bërúanan 'akinti 'ikën.
39 'Ëx kana asérabi Dios ira a 'ain; usa 'ain ka 'ësaribi bëtsi Dioskama 'aíma 'ikën.
'Ën kana kamabi uni aín tsóti 'unanin, 'imainun kana anua ñuti nëtë aribi 'unanin;
'ën kana uni 'aisama okin 'atima oxunbi aín 'atimakë a mëníoxunin.
Uinu 'ikë uníxbi ka 'ëx kushiira 'ain 'ën 'atima okaskëx ënuax abáti 'aíma 'ikën.
40 'Ën kana naími okin 'ën mëkën chaioruin,
usa 'aish kana asérabi ësai kin: 'ëx kana uínsaran nëtënbi këñútimoi tsotin usa 'aish kana asérabi kin
41 usa 'ixun kana 'ën manë nibánibakikë 'itanun kuënuira okin xëtokë anun bëtsi 'anux mëníokakësari 'iti 'ain. ¡Atankëxun kana axa 'ëmi nishkë unikama uisakin karana 'aisatani usakin 'ati 'ain!
42 'Akin kana 'ën manë paka pia 'imainun manë xëtokë anun atu 'akin aín imin xëpukan kapabuinti 'ain; ¡usakin kana atu këñuti 'ain, usokin 'akëx achirabi abátima 'ikën! ¡usakin kana a ramiokë 'imainun ñatankin bikë suntáru aín bu chaxkë́irabu 'imainun 'apu akamabi 'ati 'ain!
43 Usa 'ain ka Moisés Nukën 'Ibu rabi kantatankëx sënënishi ësai ki kantakëxa: ¡Kamabi menu 'ikë unikamaxribi ka Diosan kaískë 'aíshmabi aín unikamabë a rabi kantai kuëënti 'ikën! ¡Usa 'ain ka Diosan aín unikama an 'akë uni a 'anan, ain ëmanubi tsókë aín uni Israelkama nuibakin 'akinti 'ikën usakin 'akin ka axa aín unikamami nishkë unikamaribi 'ati 'ikën!
Moisésnën ashikin Israel unikama usaía 'iti ñuixunkin katëkëan bana
44-45 Usa 'ain ka Moisés 'imainun Josué Nunnën bëchikë ax anua kamabi Israel unikama timë́kamë 'ëokë anu kuantankëx kantai, aín taëokë anuxunbi pëutankëx, aín sënë́nkë anubi sënëoín kantakëxa. 46 Usai kantai sënë́nxun ka Israel unikama kakëxa: Bërí kamina 'ën mitsu kakë banakama upíokin sinánkin mitsun bakë bëchikëkama 'unánmikin ñuixunti 'ain, atúnribia a tanti banakama kikësaibi 'iti 'unánun. 47 'Aínbi ka ënëx bëtsi ñu 'akësokin mitsun bënë́kinshi 'aisama upíokin sinánxun 'ati 'ikën; usa 'ain kamina a tanti bana ënëx kikësabi oi 'i tsóti 'itsa baritia 'imi Jordán kakë baka a sikarakëtankëxun a me bitankëx anu tsókanti 'ain.
Anua Israel unikama bëbai kuanti me Diosan Moisés ismia bana
48 A nëtënbi ka Nukën 'Ibun Moisés ësokin kakëxa: 49 Anuxun kamina Abarim kakë me anu pain bëbatankëx aín bashi Nebo kakë moabitakaman me Jericó 'ukëmanan 'ikë anuxun, kamina israel unikama 'ën 'inánti Canaán kakë me a isi kuanti 'ain. 50 Anuax kamina aín bashi mapërakëtankëx anu rakati ñuti 'ain, anuax ñui kamina min raran raraitsi kamabë min bëru ñunshin birananti 'ikën, min xukë́n Aarón aín bashi Hor kakë anuxun ñuia maínkëx aín bëru ñunshin 'iásaribiti. 51 Mi rabëtan kamina 'ën kakëxun min xukë́n Aarónbëtan Israelkaman ismainun, anua 'umpax Meribá-cadés, 'ikë anu uni 'ikëma me Sin kakë anuxun, 'ën kakësokin 'aisama tankën. 52 Usa 'ain kamina 'uranxunshi usa ka kixun 'ën Israel unikama 'inánti me a isti 'ain, 'aínbi kamina a menu mix bëbatima 'ain kixun ka Diosan Moisés kakëxa.