Ashikin Moisésnën Israel unikama upíokin sinánxunkin ká bana
33
Anúan ñuti nëtë 'urama 'ain ka aín uni 'iti Diosan kaískë 'ixun Moisésnën upíokin sinánxunkin Israel unikama 2 ënë banakama ësokin kakëxa:Nukën 'Ibun ka aín bashi Sinaí kakë anuxunbi Seír kakë me anu bukukëbi nu pë́kakëxa. Pë́kaquin ka aín kushin barin urukin pë́kabëtsinkësokin aín bashi Parán kakë anuxunbia aín kushin pëkakë ax Meribá-Cadés anubi sënë́ankëxa; usai ukin ka unían aín mëkënan tuínxun ñu bëkësa obëtsinkin ax kushiira 'ixun a tanti aín bana bëakëxa.
3 Nukën 'Ibun ka aín unikama nuibatia, nuibanan ka uikaman kara aín bana kikësabiokin 'aia a bërúaia. Bërúanan ka uin kara a rabianan an kakë banakama kikësabiokin 'aia a 'akinia.
4 Moisésnën ka nukama a tanti Diosan bana Jacobnën rëbúnkikama 'inánkëxa,
5 'inánkin ka anua Israelkaman kushibu timë́kë anuxun atun 'apu 'ixun,
israel unikama ñakaitsi ñakaitsi timë́kë akamaribi 'inánkëxa.
6 Rubén ñui ka ësai kiakëxa:
¡Rubénën rëbúnkikamax ka ñuima tsóti 'ikën! ¡Aín aintsikama 'itsama 'aínbi kiax ka Moisés kiakëxa!
7 Usa 'ain ka Judá ñui ësairibi kiakëxa:
'Ën 'Ibu aín bana kuakin kamina Judá aín aintsi kamakëñunbi; ami nishkë unikamama 'aia usa 'ain min kushinbi 'akinti aín.
8 Usa 'ain ka Moisés Leví ñui ësai kiakëxa:
Minan ka Tumim 'imainun Urim ax 'ikën 'ën 'Ibu; min kamina levitakamanribi min kikësa okin 'aia 'inan, atu kamina Masá kakë me anuxun tankën, tankin kamina anuxunmi min unikama 'umpax 'inan Meribá kakë anuxun ñukákën,
9 atun ka minmi ká banakama kikësabiokin asérabi 'aia 'anan ka achúshi ñu min atubëtan 'a ax kikësokinbi 'aia: Usakin 'ai atux aín papa 'imainun aín tita ñui uinsaranbi kana atu iskëma 'ai kiax kia; kianan ka aín xukë́nkamakëñun aín chirabakëkama: Ñuiribi atu kana 'unánima kia, kianan ka aín bakë bëchikë bëbu 'imainun xanukamaribi: ñui uin bëchikë kara atux 'ikë kana 'unanima kiax kia.
10 Aín ñu mëëtinëx ka Jacobnën rëbúnki Israel unikama a tanti bana kikësabiokin 'anun 'unánmiti 'ikën; 'imainun ka anuxun a rabikin ñuina xaroti xubusa okin 'akë anuxun 'aímai këñutia chimapusa 'itánun anuxun ñuina xaroti 'akë anuxun ñuina xaroia.
11 Usa aín kamina mix atun 'Ibu 'ixun upíokin sinánxuni, atun ñu mëëxunkëx chuámarua tani kuëënti 'ain. 'Ianan kamina ax atumi nishkë unikama 'anun 'amianan amiribishia atubë 'akananun 'amitima 'ain, kixun ka Moisésnën Dios kakëxa.
12 Usa aín ka Benjamín ñui ësai kiakëxa:
Nukën 'Ibun nuibakë uni ax ka upitax tsotia; usa 'ikë ka Diosan ënkinma abi mitsu 'akinti 'ikën. ¡Usokin an 'akinkëx ka upitax bukuti 'ikën!
13 Ësairibi ka Josénën bakë bëchikë rabë́ ñui kiakëxa:
Nukën 'Ibun ka anua tsóti me anua upíokin sinánxukin, 'uí 'ibúkin chabókë axa me 'ukëmëu kuani 'umpax upíira i baka 'ianan xëxá upíira atunu 'inun 'imiti 'ikën,
14 'imikëbëtan ka atun kamabi baritia ñu 'apákëxa upíirabu 'inun,
Diosan 'imikëx tuaia bianan anun biti 'uxë 'ikëbëtan pëkëtia biti 'ikën,
15 'imainun kana 'ën me sapan aín bashi bërámabi këñutima oi unia, anu 'apákëxa 'aisamaira 'inun tuaia atun biti kuëënin,
16 usa 'ain ka ain menu 'apákëxun a piti ñun 'aisamaira 'itánun upíokin tuati 'ikën, 'imainun ka axa tsi rëkirukësari i pëñanakëkënu mërakin aín unikama 'akinun 'ë ká anbi ka aín xukë́nkama kaiskima José aín xukë́antun 'apu 'iti kaisakëxa.
17 Ax ka a paian aín titan tuákë vaca bënë upíira bërí 'ikën, usa 'aish ka vaca bënë raëkëma kushiira 'ixuan, aín manchanën uni 'akësaribi okin abë 'akanankin kamabi menua unikama abë 'akanankin 'ati 'ikën. Usaribi ka Efraínën aintsikama 'aisamaira 'iti 'ikën; 'imainun ka Manasésnën aintsikamaribi 'aisamaira 'aish tupuntisamaira 'iti 'ikën.
18 Ësairibi ka Zabulón 'imainun Isacar ñui Moisés kiakëxa:
Zabulónën rëbúnkikamax ka bëtsi menu aín ñu maruti kama buani kuëënti 'ikën, 'imainun ka Isacarnën rëbúnki kamaxribi, xubusa okin 'akë chupanu 'ixun an 'arakakë ñuinakama bërúai 'iti 'ikën.
19 Usa 'ixun ka kamabi menu 'ikë 'ain aintsikama kuëntankëxun abëtan, anuxun Dios rabikin ñuina xaroti, aín bashi anuxun xaroti 'ikën; usakian 'akëbë ka bëtsi menu aín ñu marui kuanxuan bikë 'aisamaira kupíkë ñu ñuribi 'iti 'ikën.
20 Ësairibi ka Gad ñui kiakëxa:
¡Diosan ka Gadnën rëbúnkikama chaiira me 'inánti 'ikën, 'inánkëxun ka asábi ka min kamina chaiira me nu 'inan kixun a rabiti 'ikën! 'Ianan ka paru 'inúan aín xanun unëax aín piti binux rakáxun ñuina aia bërúankësa usaribi okin ax ami nishkë unikama abë 'akananxun kaínti 'ikën.
21 Usa 'ain ka ainanbi 'inun bëtsi ñaká Israelkama me 'inánkin aín kushibunën,
Gadnën rëbúnkikama 'apunan 'iisa me 'inánti 'ikën.
Anuxun ka aín 'apun kakësokin 'anan;
Nukën 'Ibun bana kikësokin Israel unikama 'akinti 'ikë kixun ka Moisésnën kakëxa.
22 Ësairibi ka Dannën rëbúnkikama kai kiakëxa:
Dan ax ka achúshi paru 'inúanën tuá aín bënësa 'iti 'ikën:
Usa 'aish ka aín suntárunëx Basán kakë me anuax ami nishkë unikama abë 'akanankin 'anux tsuákiruti 'ikën.
23 Ësairibi ka Neftalí ñui kiakëxa:
Nukën 'Ibun ka Neftalí kakë uni aín aintsikama upíokin 'akinti 'ikën; usa 'ikë ka Diosan 'aisamaira 'inun upíokin sinánxunkin, ¡aín rëbumi 'ianan amiaxa bari urukë amiokin me këñunbi anua 'ikë baka atunan 'inun 'inánti 'ikën!
24 Ësairibi ka Aser ñui kiakëxa:
'Ën 'Ibu 'ëx kana aín xukënkaman 'itsaira kuëëinrakë 'ikë mi min Jacobnën bakë bëchikë Aser ënë upíokin sinánxunti kuëënin, Jacobnën bakë bëchikë raírinën rëbúkikama 'akësamaira okin.
'Anan kamina atun 'apákë olivos kakë i bimi 'aisamaira 'ain, aín xënixribi 'itsaira atunu 'inun 'imiti 'ain;
25 'imainun ka ain xëputi anúan ain ëmanu atsínti 'akë ax manë 'akë 'iti 'ikën,
usa 'ain ka anun ax ami nishkë unikama atsintisama okin 'akë 'ain tsóti 'ikën, usai 'i ka Asernën rëbúkikama atux uni aín kushibu 'aish tsóti 'ikën.
26 Usa 'ain ka anuishi sënë́nkin Moisésnën Israelkama ësokin kakëxa, nun Diosaribi bëtsi dios ka 'aíma 'ikën, nun Dios ax ka kushiira 'aish raíri dios kamasamaira 'ikën,
ax ka naínu 'ikë nëtë kuin mëu kushiira 'aish mitsu 'akini 'uti 'ikën.
27 Nukën 'Ibu Dios axa këñutima oi tsókë an ka mitsu 'akinti 'ikën; an ka ax kushiira 'ixun ënkinma nu 'akinia,
usa 'ixun ka an numi nishkë uni abámitankëxun, këñukin 'anun nu 'amiakëxa.
28 Usa 'ain kamina mitsux Diosan 'akinkëx ami katamëti tsóti 'ain, 'imainun ka mitsun rëbúnkikamaribi uínbi ubíokëma upitax bukui kuëënun 'imiti 'ikën. 'Imianan aín menu atun 'apákëx trigo a piti 'aisamaira 'ianan ka a xëati uvas baka 'akë aribi 'aisamaira 'iti 'ikën, usai 'ikëbë ka 'uíribi a menu an ñu 'apákëkama chabóti ax 'ibutíma 'ima 'ibúti 'ikën.
29 Israel unikama mitsux kamina Nukën 'Ibun ka nu 'akinia kixun sinani kuëënti 'ain,
¿uinu 'ikë ëmakamax kara mitsun ëmabë sënë́nti 'ik?
Nukën 'Ibu Diosanbi ka mi ië́miaxa usa 'ixun ka bërúanan mi 'akinia; ¡an ka ax numi nishkë unikamabë 'akanania nu 'akinti 'ikën!
Usakin 'akinkëxun ñusmokin mitsun 'akëx ka atun rabiakakë a mitsumi rakuë́ti nëtë́ti 'ikën.