JOSUÉ
Diosan Josué usakian ñu 'anun ka bana
1
Usa 'ain ka Moisés Nukën 'Ibun uni ax ñukë 'ain, Josué an Moisés 'akinkë Nunnën bëchikë a Nukën 'Ibun ësokin kakëxa: 2 'Ën kaisa uni Moisés ka ñuaxa, usa 'ain kamina bërí min Jordán kakë baka kamabi Israel unikama shitákinbiani, a 'inánuxun 'ën ká me a mitsu 'inánun kuanti 'ain. 3 'Ën Moisés kásabiokin kana anu mi kuankë mekama a 'ën mitsu 'inánti 'ain. 4 'Ën mitsu 'inánti me ax ka anu uni 'ikëma me anua 'ikë aín bashikama Líbano kakë anuaxbi kuantankëx anua baka rara Éufrates 'ikë akama këñunbi kana anua hititas unikama tsókë parúmpapa anu sënë́nbi mitsunan 'inun 'inánti 'ain. 5 Uínbi ka uisaxunbi mibë 'akanankin mitsu kanantima 'ikën, 'ën kana Moisés 'asaribiokin, 'ën kushínbi 'akianan uínsarabi ënkinma mi 'akinti 'ain. 6 Usa 'ain kamina rakuë́ti sinanima kushikanti 'ain, min kamina ënë unikama me 'inánti 'ain, a me 'inánuxun kana 'ën mitsun chaitiokëkama kakën. 7 Usa 'ain kamina 'ën kakësabi oí rakuë́ti sinanima kushiti 'ain, 'imainun kamina 'ën uni Moisésnëan 'ën kakëxun mitsu kuënëoxuan bana ashi tanti 'ain. A banakama kikësokinbi 'akëbë ka kamabi min 'akë ñukamax upí 'iti 'ikën. 8 'Imainun kamina uinsaranbi ënkinma a tanti bana 'ën 'amikëxun Moisésnën kuënëo bana nëtën isanan imë́ribi isti 'ain, usakin 'akin kamina ënkinma ënë bana kikësabiokin 'ati 'ain. Usakin mi 'akëbë ka kamabi ñu mitsun 'akë ñukamax upí 'iti 'ikën. 9 'Ën kana mi kain usa 'ain kamina kushi sinani rakuë́tima 'ain. Usa 'ain kamina rakuë́kin kana 'aíma kixun sinántima 'ain, min 'Ibu Dios 'ëx kana mibë uinu karamina kuani anubi 'iti 'ain.Josué 'imainun Israel unibu Canaán kakë menu kuanux mënio ka bana
10 Usa 'ain ka Josuénën Israel uni aín kushibu ësokin kakëxa: 11 Anua 'ikankë atun xubu kamanubi kuankin kamina kamaxunbia atun pibianti ñu mëníonun kati 'ain, ënuax rabë́ 'imainun achúshi nëtë 'ikëbë kananuna Jordán kakë baka sikakiani kuanxun Nukën 'Ibu Diosan nu 'inánti me a bitsi kuanti 'ain. 12 Usokin atu katankëxun ka Josuénën Rubén 'imainun Gadnën rëbúnkikama kanan Manasésnën rëbúnkiribi kamaira kakimabi 'itsamashi, akama ësokin kakëxa: 13 Mikaman kamina sinánti 'ain, Nukën 'Ibun uni Moisés ax ka ësai kia bana a nun 'Ibu Dios an ka anumi upitax bukukanti ënë me 'inánti 'ikë kixun nun chaitiokama kakëxa. 14 Usa 'ain kamina mitsun xanu min bakë bëchikë 'imainun ami 'arakakë ñuinakama këñunbi Moisésnën mitsu 'inan me Jordán kakë baka nëkë manan ënubi ëbianti 'ain. Ëbiani kamina ax 'akanainsa unikamaxëshi aín manë xëtokë bibiani mitsun xukë́nkama ka 'akanania 'akini kuanti 'ain, 15 Nukën 'Ibun 'akinkëxuan atúnribi ainanbi 'itanun 'ibuakin me binun atu pain 'akinti 'ain. Usakin atu pain 'akintankëx kamina amiribishi Moisés Nukën 'Ibun uni an mitsu 'inan mekama baka nëkë manan 'ikë ënubi utankëxun mitsunanbi 'inun biti 'ain.
16 Ësokin kakëxun ka atúnribi Josué kakëxa:
—Asabi ka min nu kakësabiokin 'ai kananuna uinu karamina nu xuti anubi kuanti 'ain. 17 Usa 'ain kananuna min kakëxun min bana tankin 'anan, Moisésnën kakëxun 'ásabiokin 'ati 'ain. Usa 'ain kananuna nukaman kuëënin Diosan ka Moisés 'akiansaribi okin miribi 'akinti 'ikën. 18 Usa 'ain ka uin kara min kakësabiokin 'aisamatani kërutia a unix 'akë 'iti 'ikën. Usa 'ain kananuna nun mi kain uisai kara uni 'ikëbëbimi rakuëaxma kushinun.