—Uiti israel uni sapi kaisa nun me ñachai ënë imë́ uonxa. 3 Usakin kakëxun ka a ëmanu 'ikë 'apun aín suntáru anu kuanxuan Rahab katánun kixun xuakëxa:

—Xukëx kuanxun ka anu bëbakin kakëxa, min xubunu bëbakë unikama a kamina chikínti 'ain, atux ka nun me ñachai uaxa. 4 'Aínbi ka a xanun a rabë́ atux ukëmapan 'aínshi unëxun ësokin kakëxa:

—Asérabi ka a unikamax 'ën xubunu uaxa, usai ukëbi kana uinu 'ikë unira kara 'ën 'unánkëma 'ain. 5 Usa 'aish ka bari kuabuti ñantabukëma 'aínshi atux kuanxa, mitsúnbi kamina 'unan xupibutia bari kuabuti ñantabukëbëtainshi ka anun ëmanu atsínti xëkuë xëpúia, usa 'ain kana uin kara atux kuanxa kixun 'unaniman. 'Aínbi kamina mitsun bënëtishi kuankin nuibianxun sapi kamina kuania atu nukuti aín kixun ka xanun kakëxa.

6 A xanunbi ka aín xubu manámi buánxun anua xapusa lino kakë barionti tsamankë a mëu unëkë 'iakëxa. 7 Usakian kakëxëshi ka 'apun suntárukama ax unikama me ñachai ukë ax isa anun kuanxa kixuan xubu 'ibu an paránkin kakëx Jordán kakë baka, ami kikiani kuani anunribi anunribia uni sikarakëkë anubi bëbakin nuiakëxa. Usokin nui kuania suntárukama ax chikikiankëma 'aínshi an xëputi bëruankë unikama a ëmanu anun atsínti xëputi xëpúakëxa.

8 Usa 'ain ka Israel uni rabë́ ax 'uxkëma 'aínshi, Rahabnën aín xubu manámi kuaruxun uni rabë́ a kakëxa: 9 'Ën sinánkëxun ka Nukën 'Ibun mitsunan 'inun ënë me mikama 'inánti 'ikën, usa 'ain kananuna nukamax 'itsaira rakuë́tin. Usa 'ain ka axa ënë menu tsókë unikama mitsux ukë kuati rakuëtan bamaia. 10 Nun kananuna 'unanin mitsux Egipto menuax chikíküatsini ukëbëtan ka Diosan anun sikarakënun parúmpapa xónsa kakë a aín nëbë́tsi ëski panárabënun 'imiakëxa. 'Imainun kananuna 'unanin mitsun kamina Sihón 'imainun Og, amorreo kakë unibunën 'apu rabë́ axa Jordán kakë baka 'ukëmanan bukukë a aín unikama këñunbi maërakatanun këñuakën. 11 Usakin mitsun 'akë kuati kananuna nukamax 'aisamaira rakuëakën, usa 'ain ka uinu 'ikë 'ën aintsikamaxi mitsubë 'akánanti kuëënima. Nun kananuna 'unanin mitsun rabikë Dios ax ka naí manámi 'ikësaribi 'ianan ënë menu kushiira 'ikën. 12 Usa 'ain kana mi ñukatin ënuxunbi kamina Nukën 'Ibun anën sinanátëkëntimokin asérabi 'ë kati 'ain, 'ën aintsikama kamina mitsu bërí 'ën 'akësaribi okin ënë ëmanu 'ikë unikama 'akinbi 'atima 'ain. Asérabi karamina këmëima 'unánnun kamina 'ë kati 'ain, 13 Usa 'ain kamina ënë me bitsi atsínkin 'ën papa 'ën tita 'imainun 'ën xukë́n 'ën rarëbakë, 'ianan abëa 'ikë unikama këñunbi nu 'atima 'ain. ¡'Akinma kamina nukama këñunbi ëñëmiti 'ain! 14 Ësokin kakëxun ka rabë́ unin kakëxa: Nun ënë me bitsi ukin min aintsikama 'aia ka Diosan nuribi bamanun 'imiti 'ikën, usa 'ain kamina nun mi kakë bana ënë uibi ñuixuntima 'ain. Usa 'ain kananuna Nukën 'Ibun ënë me 'inánkëxun bixun nukaman mi upíokin 'akinti 'ain.

15 Usa 'ain ka Rahabnën xubu ax anun ëma kënëkin buinarakin kënëkë amibi birukin a manámibi 'akë 'iakëxa, usa 'ikë ka atun me ñachai kuankë uni rabë́ a itsi në́nkë tëkërëkaxun anun aín xubu xëkuë chukúma manámi 'ikë au nanpákëxa. 16 Nanpákin ka kakëxa: Ënuax kuantankëx kamina an mi baritia 'apun xukë suntárukaman mi mërakëma 'aínshi ninu unëti kuanti 'ain. Anu kamina rabë́ 'imainun achúshi nëtë atux pain ëmanu utëkëntamainun unë́ti 'ain. Usa 'ain kamina anuaxbi min nëtënu kuanti 'ain. 17 Ësokian kakëxun ka uni rabë́ anribi kakëxa:

—Nun kananuna sinanátëkëntimokin min nu kakësabiokin asérabi 'ati 'ain. 18 'Aínbi kamina nux ënë menu bëbai ukëbëtainshi, itsi achúshi xónsa anun nux 'ibúkë ënë min xubu xëkuë chukúma ënu bënë́kinshi bëntanti 'ain. Usakin 'anan kamina min xubunu min papa min tita 'imainun min xukë́n min rarëbakëkama 'imainun min papan aintsikamaribi bënë́kinshi timëti 'ain. 19 Uix kara min xubunuax ëman chikitia 'akëx bamaia ax ka aín 'uchabi 'iti 'ikën; usa 'ain ka ax nun 'uchama 'iti 'ikën. 'Aínbi ka uin kara min xubunu 'ikë uni anu atsínxun 'aisamoia ax ka nux 'uchakë 'iti 'ikën. 20 Usa 'ain kamina uinu 'ikë unibi nun mi kakë bana ënë ñuixuntima 'ain, usama 'ain ka asérabi usakin 'axúnun mi kakë ënëx usabi 'iti 'ikën. 21 —Asabi ka usa ka 'iti 'ikë —kixun ka xanun kakëxa. Katankëxun ka na kuantanun xuakëxa. Xukëx kuankëbëtan ka aín itsi xónsa anun sënkikianxa 'ibúkë a bitankëxun aín xubu kaxú xëkuë chukúma anu bëntankëxa. 22 Usokian 'akëx ka an me ñachai ukë uni rabë́ ax kuantankëx rabë́ 'imainun achúshi nëtë 'imi ninu unëakëxa, usaía 'imainun ka suntárukaman mëranuxumabi mekama okin pë́kasmakin baribiani amiribishi Jericó kakë ëmanu kuantëkëankëxa. 23 Kuantamainun ka an me ñachai kuankë uni rabë́ axribi anua unëkë ni anuax kuanx, Jordán kakë baka shitákiani anua 'ikë anu kuanxun Josué usaía 'ikë kamabi ñuixunkin. 24 Ësokin kakëxa: Nukën 'Ibu ka asérabi a mekama binun nu 'akinti 'ikën. Usa 'ain ka a menu 'ikë unikama 'itsaira numi rakuë́tia.