Israel kama Jordán kakë baka sikarakëa bana
3
Usakian kónkëx ka pëkarakëma 'aínshi, Josué 'imainun israel unibu Sitim kakë anu paia bukukë anuax kuantankëx Jordán kakë baka anu bëbakankëxa; bëbatankëx ka sikarakënux anu pain 'ikankëxa. 2 Anuxun ka rabë́ 'imainun achúshi nëtë 'ikëbëtan aín kushibunën anua 'ikankë akamanubi kuankin 3 'ianan ka ësokin Israel unibu kakëxa: Uínsaran kaina sacerdote levita unikaman anu Nukën 'Ibun bana kuënëokë nankë a bunántisa kurin ratátakakë a buánkania iskani anun kamina uinu kaina 'ikani anuaxbi chikíkiankin nuibiankanti 'ain. 4 Usai kuankin kamina uimi karamina kuani a 'unánkanti 'ain, uinu 'ikë mitsúnbi kamina ënë me anu nikin 'unánkëma 'ain. 'Aínbi kamina bunántisa okin 'akë kurin ratakakakë anua Diosan bana kuënëokë nankë a 'uramaira oíma, a kaxu achúshi kilómetro 'ura kuanti 'ain.5 'Imainun ka Josuénën ësokin atu kakëxa: Mitsux kamina imë́ishi Nukën 'Ibu kara aín kushin uisakin ñu 'aia isnux upiti mëníokati 'ain. 6 Kanan ka sacerdotekamaribi kakëxa: Bunántisa okin 'akë kurin ratakakakë a 'ukëmëua a tanti banakama 'ikë ënë 'iarukin bibianx kamina a rëkuë́mibiani kuani unikaman ismainun abë baka sikarakëti 'ain. Usakin kakëxun ka sacerdote kaman bunántisa okin 'akë kurin ratakakakë a unikaman ismainunbi buánkëxa.
7 Usokëbëtan ka Nukën 'Ibun Josué kakëxa: Bërí ka Israel unikaman ësokin 'ën 'akëbëtan mix kamina 'ën kaískë uni atun 'apu 'ai kixun 'unánti 'ikën. Usa 'ain ka 'ën kana Moisés 'akiansaribi okin mi 'akini kixun 'unánti 'ikën. 8 Minribi kamina sacerdote an bunántisa okin 'akë kurin ratakakakë a 'ukëmëu 'ikë a tanti banakama buannun kati 'ain, kuani ka Jordán kakë baka aín kuëtsín amáti nirakëkëbëa ëskikëbë 'urira kuani anu nirakëti 'ikën.
9 Usakin kakëxun ka Josuénën Israel unikama kakëxa: Nëri kamina rikuatsinti 'ain Nukën 'Ibu Diosan ka ësokin nu 'akinkin ñu 'akatsi kiaxa mitsu kanun. 10 Ax ka nubë 'ikë kixun nukaman 'unánun ka Diosan aín kushínbi aín menu bëbakin nun cananeo, hititas, heveos, ferezeos, gergeseos, amorreos 'imainun jebuseos akamabi aín me bikuanti 'ikën. 11 Kamina kuakanti 'ain, Nukën 'Ibu kamabi men 'ibu 'ianan bunántisa okin 'akë kurin ratátakakë anua kamabi aín bana 'ikë aka sacerdote unikaman mitsun ismainunbi Jordán kakë baka a sikarakëkinti 'ikën. 12 Usa 'ain kamina mapai rabë́ 'imainun rabë́ ñaká uni anua achúshi achúshi Israel unikama kaisti 'ain. 13 Uínsaran kara sacerdotekaman bunántisa okin 'akë kurin ratakakakë anua Nukën 'Ibun kamabi men 'ibu ain bana a buani tapukikiankëbë ka tëarabëti amo rabë́ chairui aín rëbumiax 'ia ubúkë ax tikimainun kuabúkë ax amorabë́ chitëti nunkuruti 'ikën. 14 Ësokin kaia Josué sënë́nkëbë ka Israel unibu anua 'ikë anuax bunántisa okin 'akë kurin ratakakakë anua a tanti banakama 'ikë a buani sacerdotekama kuankëbë a kaxú Jordán kakë baka shítati kuankankëxa. 15 Kuankian bunántisa a pain rëkuë́nkin biani sacerdotekama baka tapukikiankëbëshi ka aín xobukë nëtë́ti baka tëarabëakëxa. Ax ka anun ñu 'apákë biti 'uxë 'aia Jordán kakë baka mita 'ain chaiira 'inun 'ëkë 'aish kuëtsëkënkëma pan 'ain 'iakëxa. 16 Ënëx ka anua israel unibu 'ikë a 'urakëoxa 'iá 'ikën, ax ka anua Adam kakë ëma 'urama, Saretán 'ikë a 'uramabi 'iakëxa, usa 'ain ka 'umpax ax kuabuti parúmpapa bamakë kakë anubi timë́kë 'iakëxa. Usakin ka Diosan anúan Israelkama Jericó kakë ëmanu kuani sikarakënun bakanu 'ikë 'umpax tëa rabëti ëskinun 'imiakëxa. 17 Usakian Jordán kakë baka ëskinun 'imikëbë Israel unibu sikarakëmainun ka sacerdote unikama anua a tanti Diosan bana 'ikë bunántisa okin 'akë, kurin ratakakakë buánkë unikama ax Jordán kakë baka ë́skia me rakákë a nëbëtsi kamabi uníxa sikarakëmainun nirakëakëxa.