4 Usa 'ain ka Josuénën mapai rabë́ 'imainun rabë́ uni kaískë a kuënxun, 5 ësokin kakëxa: Jordán baka ëskikë nëbë́tsi anua Diosan bunántisa okin 'akë kurin ratakakakë 'ikë anua kamina mitsun achúshi achúshi ñakánu 'ikë unin maxáx 'iarukin mapai rabë́ 'imainun rabë́ sënën 'itanun biti 'ain. 6 Akamax ka a isi numi sinania nun rëbúnkikama ënuxun ka Diosan atu 'akinkin ñu chaiira 'akëxa kixun sinánti 'iti 'ikën, sinánkin ka mitsun bakë bëchikëkaman ñukáti 'ikën: ¿Uisoti nan kara ënë maxákama ënëx 'ik?, 7 kixun ñukákëxun kamina mitsun kati 'ain: Ax ka Nukën 'Ibun bunántisa okin 'akë kurin ratakakakë a sacerdotekaman Jordán kakë baka sikarakëkinkin rëkuë́mibiankëbëa baka tëarabëakëxa kixun kati 'ikën. Ënë maxakamax ka Israel unibunëan ënuax ka usai 'iakëxa kixun sinánti 'ikën.

8 Usokian Josuénën kakëxun ka an kakësabiokin. Jordán kakë baka panárabëti ëskikë anua, mapai rabë́ 'imainun rabë́ maxá achúshi achúshi Israel unin bibiankin anua 'ikankë anu buánxun maburukin nankëxa, usokin 'anúan Nukën 'Ibun Josué kakësabiokin. 9 'Amainun ka Josuénënribi mapai rabë́ 'imainun rabë́ maxáx bixun anua sacerdotekamax bunántisa okin 'akë kurin ratakakakë anua Diosan bana usai 'iti 'arukë a 'iax baka ëskikë nëbë́tsi sëtë́kë anubi bukunrukin nankëxa. A maxákama ka bëríbi anu 'ikë kixun ñuikin atun aintsikama ñuixunkankëxa.

10 Usa 'ain ka sacerdotekama bunántisa okin 'akë kurin ratakakakë anua usai 'iti bana 'ikë an uankë akamaxa Jordán kakë baka tëarabëti me rakákë anu sëtë́mainun Israel unibunën usokin 'anúan Nukën 'Ibun Josué kakësabiokin ka kamabi ñu 'akëxa. Usakin 'aminuan Moisésnën Josué kakësabiokin. 'Akëbë ka anuax unikama bënëtishi sikarakëakëxa, 11 usai unikama sikarakëti 'ukëmanan 'irui sënë́nkëbë ka sacerdote unikama an bunántisa okin 'akë kurin ratakakakë anua Diosan ñukama 'ikë uankë atúxribi sikarëkëkiani kuankin unikama inubiani rëkuë́nkiankëxa. 12 Kuankëbë ka atu kaxuribi axa 'akánanti 'unáinrakë unibu Rubénën rëbúnki, akamabë Gadnën rëbúnki 'imainun Manasésnën rëbúnkikama 'itsamashi akamaribi. Anúan 'akánanti mëníokëishi 'aish sikarakëkiani Israel unibu kuankëxa, usaía 'inun Moisés kiásabi oi ka usai 'iakëxa. 13 Kuani ka atux cuarenta mil uni sënën 'iti urama 'iakëxa, usa 'aish ka 'akanantishi 'inun mëníokakëishi 'aish rëkuë́nkiani kuamainun a inubiani Nukën 'Ibun ismainunbi anua Jericó me 'ikë au kikiani kuankankëxa. 14 A nëtën ka Nukën 'Ibun kamabi Israel unibu Josuénën usakin ñu 'aia isi rakuë́kin aín bana tankin an kakësabiokin 'anun 'imiakëxa, Moisés ñukëma pain 'ixun 'amikëxua abëtan ñu 'asarabi okin ka usokin 'akëxa.

15 Usa 'ain ka Nukën 'Ibun Josué kakëxa: 16 Sacerdote unikaman bunántisa okin 'akë anua Diosan bana kuënëokë 'arukë an buánkëma unikama a kamina kati 'ain Jordán baka panárabëti ëskikëbëa me rakákë anu sëtë́këkama a kamina kuaitanun kati 'ain. 17 Kakëxun ka Josuénën anuaxa kuaitanun kixun atu kakëxa, 18 kakëxa bënëtishi Jordán kakë baka anua atux sëtë́kë anuax kuaini këñurukin me amákëbëishi baka chitë́kë ax anubi rakarakëtëkënkin kamabi maputëkëankëxa.

19 A nëtë́an Israel unibu Jordán kakë baka anun sikarakëkë anun ka mapai rabë́ nëtë 'ianan achúshi 'uxë 'irutabakë anun ka Guilgal kakë anu nukúkankëxa ax ka amiaxa bari urukë Jericó kakë ëma 'urama 'iakëxa. 20 Anu ka Josuénën mapai rabë́ 'imainun rabë́ maxax Jordán bakanua bitsínkin bëkë a bukurunun 'amiakëxa. 21 Anuxun ka Israel unikama kakëxa: Mitsun bakë bëchikë kaman ka mikama ñukánuxun 'aia. ¿Uisoti kara ënë maxákama unin ënu buküankëx?, 22 kixun ñukákëxun kamina ësokin ñuixukanti 'ain uisai kara Israel unikama Jordán kakë baka panárabëti me rakarakëkëbë anun sikarakëti 'iakëxa kixun, 23 'imainun kamina ësokinribi ñuixunti 'ain uisakin kara Diosan Jordán kakë baka meishi rakátanun anun nux inúnun ëskimiakëxa kixun, bëráma parúmpapa xónsa kakë anun nun chaitiokëkama sikarakënun 'imiasaribi okin. 24 An ka usakin ñu 'akëxa kixun ka kamabi menu 'ikë unin Nukën 'Ibu ax ka kushiira 'ikë kixun 'unánti 'ikën, usa 'ikë kamina ashi mitsun Nukën 'Ibu ikë rabiti 'ain.