2 Bëtsi nëtën ka anuxun Nukën 'Ibun Josué kakëxa, 'itsamashi maxá kuënukin 'atankëxun kamina anun amiribishi israel unibukama aín nëtokë ñu maxaka tëakin 'unánti opabuinti 'ain. 3 Kakëxun ka Josuénën maxáx kuënukin 'atankëxun kamabi Israel nukëbënë unikama aín nëtokë ñun maxaka matá me Aralot kakë anuxun tëapakëxa. 4 Usakin ka aín nëtokë ñu rëbu maxaka tëakankëxa, kamabi ax suntáru 'iisa nukëbënë unikama ax Egipto menuax ai anu uni 'ikëma me anuax këñuti maëi në́a 'ain. 5 Kamabi unikama Egipto menuax kuankë axa aín nëtokë ñu rëbu maxaka tëakë aínbi ka kuania anu uni 'ikëma menuax bakënkiankë akamax aín nëtokë ñu rëbu maxaka tëakëma 'iakëxa. 6 Usai kuani ka anu uni 'ikëma menu, cuarenta baritia 'imi nitsi axa Egipto menuax chikíkiani kuankë unikama maëakëxa. A unikaman ka Nukën 'Ibun kakësabiokin ñu 'aisama tankëxa, usa 'ikë ka an sinanatëkëntima okin atu ësokin kakëxa, mitsux kamina a me 'inánnuxun 'ën min chaitiokëkama ka anua 'aisamaira a piti ñu 'imainun a xëati ñu 'itsaira 'ikë a menu kuantima 'ain. 7 Usa 'ain ka Josuénën atun papa ñua 'ain, aín bakë bëchikëkaman nëtokë ñu rëbu maxaka tëapakëxa, ax ka Nukën 'Ibun aín papa ñukëbëtan usokin 'ati kia 'iakëxa, usa 'aish ka bërámabi aín nëtokë ñu rëbu maxaka tëakëma 'ikankëxa, atúxa kuankëbë ka anúan usakin ñu 'ati nëtë 'aíma 'iakëxa. 8 Usakian aín nëtokëñu rëbu aín maxaka tëakin sënë́onkëx ka anua 'ikankë anuaxpain pëxkúti anu pain 'ikankëxa. 9 Anuxun ka Nukën 'Ibun Josué kakëxa: 'Ësokin aín nëtokë ñu rëbu aín maxaka tëakë ënën ka egipcio unibunën aín menuxun ñu mëia tëmëra a sinani katë́kë a ëmiti 'ikën. Usakin anuxun 'axun Guilgal kakin anëa 'aish ka a me usakinbi anëkë 'ikën. 10 Usa 'ain ka Guilgal kakë anu pain israel unikama 'iakëxa, mapai rabë́ 'imainun rabë́ 'imainun rabë́ nëtë a xupibukëbëtan ka anua 'ikankë Jericó 'uramanuxun Pascua nëtë inúkin fiesta 'akankëxa. 11 A nëtënbi ka anun chamiti ñukëñunma 'akë pán këñun trigo tutush okë pikankëxa, pionkë a pëkarakëbëtan ka a menu 'apákë bikë ñu aribi pikankëxa. 12 Usakian ñu 'apákë aín bimi pikin pëukë 'ain ka atúan pikë maná ax nëtë́ti amiribishi 'ibútëkëama 'ikën, usai 'ikëbëtan ka a barin Israel unibunën Canaán menu 'apákë ñukama ashi bixun piakëxa.

13 Achúshi nëtë́n Jericó 'urama 'ixun ka Josuénën, ami achúshi uni aín manë xëtokë tuianx a bëmáno nikë isakëxa. Isi a 'urama obiani kuankin ka ñukákëxa:

—¿Mix karamina nubë 'ikë kama a 'ain, ama 'aish kaina numi nishkë unikama a 'ain? 14 —'Ëx kana axa mimi nishkë uni a 'ianan axa mibë 'ikë uni ama 'ain —kixun ka axa ami mërakë uni an kakëxa—. 'Ëx kana Nukën 'Ibun suntárukama aín 'apu 'ain. Ësakian uni an kakëxun ka Josuénën rantinpuruni aín bëmánanën me tikai tsóbukin ñukákëxa:

—¿Añu 'axúnumi 'ë kanun kara Diosan mi xuax? 15 Kakëxun ka Nukën 'Ibun suntárunën 'apun kakëxa:

—Min taxaka kamina ëchiti 'ain, anumi nikë me ënëx ka bëtsi me kamasama upíira 'aish Diosnan 'ikë kixun kakëxa. Kakëxun ka Josuénën aín banatankin an kakësabiokin 'akëxa.